१९ वर्षेषु १९१ देशानां भ्रमणम्, अधुना द्विचक्रिकया (साइकिल) भारतभ्रमणाय प्रस्थितः देवनाथः
हिमसंस्कृतवार्ता: – धर्मशाला।
पश्चिमबङ्गस्य सुन्दरवन-क्षेत्रात् आगतः सोमनदेवनाथः सम्प्रति साइकिलयानेन भारतभ्रमणं करोति। तस्य अस्य यात्रायाः उद्देश्यः ‘पुनर्मिलन भारतम्’, ‘एकं वृक्षम् एकं जीवनम्’ तथा ‘भारतीयाः युवजनाः क्रीडा च’ इत्यादीन् सन्देशान् सम्पूर्णदेशे प्रसारयितुम् अस्ति। सः अष्टाविंशतिः राज्येषु पञ्चसु च केन्द्रशासितप्रदेशेषु यात्रा पूर्णं कर्तुं लक्ष्यं कृत्वा अग्रे गच्छति। देवनाथस्य अनुसारं सः अद्यावधि पश्चिमबङ्गात् झारखण्डं, बिहारं, उत्तरप्रदेशं, पञ्जाबं तथा जम्मू-कश्मीरं च अतिक्रम्य हिमाचलप्रदेशं प्राप्तवान् अस्ति। तस्य कथनमस्ति यत् अग्रेऽपि द्विचक्रिकया देशस्य विभिन्नराज्येषु केन्द्रशासितप्रदेशेषु च यात्रा निरन्तरं भविष्यति।
देवनाथेन कथितं यत् सः २७ मई २००४ दिनाङ्के विश्वभ्रमणम् आरब्धवान्। प्रायः १९ वर्षेषु तेन १९१ देशानां सप्तमहाद्वीपानां च भ्रमणं कृतम्। अस्मिन् काले तेन ३६ राष्ट्राध्यक्षैः ७२ प्रधानमन्त्रिभिश्च सह मेलनं कृतम्। स्वकीयासु यात्रासु सः विद्यालयेषु, महाविद्यालयेषु, विश्वविद्यालयेषु तथा विभिन्नेषु संस्थानेषु गत्वा युवभिः सह संवादं कुर्वन् भारतीयसंस्कृतेः सामाजिकजागरूकतायाः च सम्बद्धान् सन्देशान् प्रसारितवान्।
तेन उक्तं यत् २००४ तः २००७ पर्यन्तम् एशियादेशानाम्, २००७ तः २००९ पर्यन्तं यूरोपस्य, २००९ तः २०१२ पर्यन्तं यूरोपस्य अन्येषां भागानां, २०१२ तः २०१५ पर्यन्तम् आफ्रिकादेशस्य तथा २०१५ तः २०१७ पर्यन्तं दक्षिण-अमेरिकायाः अण्टार्कटिकायाश्च यात्रा कृता। ततः परं तेन मध्य-अमेरिका, कैरिबियन-प्रदेशः, अमेरिका, कनाडा इत्येतैः सह रूस, साइबेरिया, मङ्गोलिया तथा चीनदेशस्य च यात्रा कृता। कोविड्-विभिषीकाया: समये चीनदेशे अवरुद्धस्य अनुभवमपि तेन स्पष्टीकृतम्। रोगस्य संगरोधनस्य च मध्ये तेन अतीव कठिनताः अनुभूताः। अनन्तरं सः दक्षिणकोरियादेशं प्राप्तवान् तथा न्यूजीलैण्डदेशेऽपि संगरोधनस्य कारणेन प्रायः एकवर्षपर्यन्तं स्थितवान्। ततः परम् ऑस्ट्रेलिया तथा दक्षिण-पूर्व-एशियादेशानां यात्रा कुर्वन् १० दिसम्बर २०२१ दिनाङ्के भारतं प्रत्यागतवान्।
अधुना देवनाथः पुनरपि साइकिलयात्रायां प्रवृत्तः अस्ति। भारतस्य विभिन्नान् भागान् परस्परं संयोजयितुं तथा युवजनान् पर्यावरणस्य, एकतायाः, क्रीडायाश्च प्रति जागरूकान् कर्तुं सः सन्देशं प्रसारयति। तस्य कथनमस्ति यत् अस्यां यात्रायां स्थानीयैः सामाजिकसङ्घटनैः युवभिश्च सह मिलित्वा कार्यं कर्तुमपि प्रयत्नः क्रियते।
