आनी-क्षेत्रे जयरामस्य सुक्खू-सर्वकारोपरि तीक्ष्णः प्रहारः, उक्तवान्—पिहिताः विद्यालयाः चिकित्सालयाश्च, पशुचिकित्सालयेष्वपि आरोपितं तालकम्
हिमसंस्कृतवार्ता — कुल्लू।
पूर्वमुख्यमन्त्री प्रतिपक्षनेता च जयरामठाकुरः आनी-क्षेत्रे नवनिर्वाचितानां जनप्रतिनिधीनां सम्मानसमारोहे प्रदेशस्य काङ्ग्रेस-सर्वकारस्योपरि तीक्ष्णं प्रहारम् अकरोत्। सः अवदत् यत् स्वजनानां काठिन्यं निवारयितुं तेषां च भारं लघूकर्तुं यत् सुखं भवति, तस्य आनन्दः एव अपरः वर्तते। अस्मिन्नेव क्षेत्रे जातत्वात् संवर्धितत्वाच्च सः अत्रत्यानां जनानां समस्याः काठिन्यानि च सम्यक्तया अवगच्छति।
जनसभां सम्बोधयता जयरामठाकुरेण प्रतिपादितं यत् तस्य पूर्वतनसर्वकारेण जनानां सौकर्यार्थं कार्यं कृतं तथा च कोविड-विभीषिका-सङ्कटस्य मध्येऽपि मार्गनिर्माणक्षेत्रे कीर्तिमानानि (रिकॉर्ड) स्थापितानि। सः पक्षं कृतवान् यत् तस्य सर्वकारेण वृद्धानां कृते निवृत्तिवेतनस्य (पेंशन) प्रदानाय प्रथमे मन्त्रिमण्डलोपवेशने (कैबिनेट-गोष्ठ्याम्) एव प्रयासाः आरब्धाः आसन्।
आनी-क्षेत्रे संस्थानानां पिधानस्य आरोपः
जयरामठाकुरः आक्षेपम् अकरोत् यत् मुख्यमन्त्री सुखविन्दरसिंहसुक्खू-महोदयः सत्ताग्रहणात् परं जनानां सौकर्याय उद्घाटितानि सहस्राधिकाणि संस्थानानि पिहितवान्। सः अवदत् यत् आनी-विधानसभाक्षेत्रे विद्यालयानां, चिकित्सालयानां, सर्वकारीयकार्यालयानां च सहैव षडधिकाः पशुचिकित्सालयाः अपि पिहिताः। सः अकथयत् यद् आनी-क्षेत्रं पशुपालने दुग्धोत्पादने च महत्त्वपूर्णां भूमिकां निर्वहति। ईदृशावस्थायां पशूनाम् उपचाराय पशुचिकित्सालयानाम् आवश्यकता वर्तते। सः सर्वकारस्योपरि पशुपालकानां समस्यानाम् उपेक्षायाः आरोपम् अकरोत्।
बीबीएमबी (BBMB) तथा ‘वाइल्डफ्लावर हॉल’ प्रकरणयोः अपि उत्थापिताः प्रश्नाः
प्रतिपक्षनेत्रा मुख्यमन्त्रिणः उपरि उपलब्धीनां श्रेयग्रहणाक्षेपं कुर्वता ‘बीबीएमबी’ तथा ‘वाइल्डफ्लावर हॉल’ इत्याख्यौ विषयौ उत्थापितौ। सः अवदत् यत् बीबीएमबी-संस्थायाः अन्तिमः विजयः २०११ तमे वर्षे तत्कालीनमुख्यमन्त्रिणः प्रेमकुमारधूमलस्य सर्वकारस्य कार्यकाले सञ्जातः आसीत्। अपरत्र ‘वाइल्डफ्लावर हॉल’ सम्बद्धः विजयः अक्टोबर् २०२२ मध्ये लब्धः आसीत्, यदा तु सुखविन्दरसिंहसुक्खू-महोदयः अस्य मासद्वयानन्तरं मुख्यमन्त्री अभवत्।
सुन्दरसिंहठाकुरम् अधिकृत्य अपि विहिता टिप्पणी
जयरामठाकुरेण विधायकं सुन्दरसिंहठाकुरम् अधिकृत्य अपि मुख्यमन्त्री लक्षीकृतः। सः अवदत् यत् मन्त्रिपदप्रदानस्य नाम्नि तस्मै दीर्घकालात् प्रतीक्षा कारिता वर्तते। सः परामर्शं प्रददात् यत् सुन्दरसिंहठाकुरेण मन्त्रिपदस्य अपेक्षया स्वस्वाभिमानः प्राथमिकतया स्वीकरणीयः मुख्यमन्त्रिणे च स्पष्टतया वक्तव्यं यत् सः मन्त्री भवितुं नेच्छति।
पञ्चायतनिर्वाचनस्य काङ्ग्रेस-दलस्य पराजयस्य च प्रतिपादनम्
जयरामठाकुरः प्रावोचत् यत् मुख्यमन्त्री स्वकीयसर्वकारस्य स्थितिं विलोक्य पञ्चायतनिर्वाचनं कारयितुं नैच्छत्। सः आरोपम् अकरोत् यत् निर्वाचनस्य स्थगनाय प्रकरणं सर्वोच्चन्यायालयं यावत् नीतं तथा च अधिवक्तृषु कोटिशः रूप्यकाणि व्ययीकृतानि। सः अवदत् यद् भाजपा-दलेन निर्वाचनसञ्चालनाय प्रयासाः विहिताः अन्ततः च निर्वाचनानि सम्पन्नानि। जयरामठाकुरेण विश्वास: कृत: यद् जिला-परिषदः निर्वाचने काङ्ग्रेस-दलेन द्वादशसु मण्डलेषु एकादशसु (११/१२) पराजयः अनुभूतः, यदा तु चम्बा-मण्डले भाजपा-दलं केवलम् एकेन मतेन पृष्ठतः अभवत्। सः आगामिनि विधानसभा-निर्वाचनेऽपि काङ्ग्रेस-दलस्य पराभवस्य पक्षम् अकरोत्।
निर्वाचन-प्रतिज्ञासु स्वास्थ्यसुविधासु चापि सर्वकार: आक्षिप्त:
प्रतिपक्षनेत्रा काङ्ग्रेस-दलस्य निर्वाचन-प्रतिज्ञासु प्रश्नान् उत्थापयता पृष्टं यत् प्रदेशस्य कियतीभ्यः महिलाभ्यः १५०० रूप्यकाणां सम्मानराशिः प्रदत्ता? सः युवकेभ्यः वृत्तिप्रदानस्य (रोजगारस्य) प्रतिज्ञायामपि सर्वकारम् आक्षिप्तवान् आरोपं च अकरोत् यत् कोविड-विभीषिकाले रुग्णानां साहाय्यं कृतवन्तः केचन युवानः अपि सेवातः निष्कासिताः। सः आनी-क्षेत्रे स्वास्थ्यसेवानां स्थितावेव चिन्तां प्रकटयन् अवदत् यत् चिकित्सालयेषु वैद्यानां स्वास्थ्यकर्मिणां (पैरामेडिकल-कर्मिणां) च महती न्यूनता वर्तते। बहुषु स्थानेषु क्ष-किरण (X-Ray) पराश्रव्यध्वनि (Ultrasound) सदृशाः सुविधाः अपि नोपलभ्यन्ते। सः इदमपि आरोपयत् यत् लोकयानानाम् अर्धाधिकाः मार्गाः पिहिताः सन्ति, दुग्धोत्पादकेभ्यश्च समये भुक्ति: न प्रदीयते।
जयरामठाकुरः अवदत् यत् मुख्यमन्त्री प्राकृतिकापदः समये आनी-विधानसभाक्षेत्रे केवलम् एकवारमेव सम्प्राप्तः, यदा तु तस्य मुख्यमन्त्रित्वकार्यकाले सः सप्तवारम् अत्र आगतवान् आसीत्। सः स्वसर्वकारस्य काले मार्ग-स्वास्थ्य-शिक्षा- ‘जलजीवन-अभियान’-अन्तर्गततया शतशः कोटिरूप्यकाणां योजनानां सञ्चालनस्य प्रतिपादनम् अकरोत्।
