बालिका संस्कृतविद्यापीठे तीज-महोत्सवस्य भव्यः आयोजनः
वार्ताप्रेषक: – दीपक शास्त्री
(हरियाणा) महिलानाम् उत्थानस्य स्वावलम्बनस्य च सन्देशः बालिका संस्कृतविद्यापीठे हरियाली-तीज-महोत्सवस्य भव्यं हर्षोल्लासपूर्णं च आयोजनम् अभवत्। अस्य कार्यक्रमस्य उद्देश्यं छात्राभ्यः भारतीयसंस्कृतेः, परम्पराणां लोकाचाराणां च परिचयं कारयितुं तथा नारी-सशक्तीकरणं महिला-स्वावलम्बनं च प्रोत्साहयितुम् आसीत्।
अस्मिन् अवसरे छात्राः उत्साहपूर्वकं विविधप्रकारकाणि स्वनिर्मितानि व्यञ्जनानि अपाचयन्। छात्राभिः गोलगप्पाः, चाट्, नमकीनम्, सैण्डविच् इत्यादीनां स्वादिष्टव्यञ्जनानां विविधाः विक्रयस्थलिकाः स्थापिताः। छात्राभिः स्वहस्तेन व्यञ्जनानि निर्माय सृजनात्मकतायाः, पाककौशलस्य, आत्मनिर्भरतायाः उद्यमशीलतायाः च परिचयः प्रदत्तः।
कार्यक्रमे बालिका संस्कृतविद्यापीठस्य प्राचार्या डॉ. सुमन शर्मा महोदयया महिलानाम् शिक्षा, सम्मानः, आत्मनिर्भरता, अधिकाराः तथा समाजे तासां महत्त्वपूर्णा भूमिका इत्यादिविषयेषु प्रेरणादायकं व्याख्यानं प्रदत्तम्। तया उक्तं यत् नारी समाजस्य विकासस्य प्रमुखा आधारशिला अस्ति तथा प्रत्येकां महिलां स्वावलम्बिनीं सशक्तां च कर्तुं समाजस्य दायित्वम् अस्ति।
तथैव अत्रि चैरिटेबल फाउण्डेशनस्य श्रीमान् शरद् अत्रि महोदयेन महिलानाम् उत्थानं, कौशलविकासः, स्वावलम्बनम्, आत्मविश्वासः तथा आर्थिक-सशक्तीकरणम् इत्यादिविषयेषु सारगर्भितं प्रेरणादायकं च व्याख्यानं प्रदत्तम्। तेन महिलाः स्वप्रतिभायाः कौशलस्य च विकासं कृत्वा आत्मनिर्भराः भूत्वा समाजस्य प्रगतौ योगदानं दातुं प्रेरिताः।
तीज-महोत्सवे छात्राभिः महिलाभिश्च मेहन्दी-अलंकरणम्, दोलाक्रीडा, लोकगीतानि, नृत्यं सांस्कृतिक-प्रस्तुतयः च आनन्देन अनुभूताः। पारम्परिक-वेषभूषया सुसज्जिताः छात्राः भारतीयसंस्कृतेः मनोहरां झलकीं प्रस्तुतवत्यः।
कार्यक्रमे वक्तारः अवदन् यत् नारी केवलं परिवारस्य आधारशिला एव न, अपितु समाजस्य राष्ट्रस्य च विकासस्य महत्त्वपूर्णा शक्तिः अस्ति। यदा महिलाः शिक्षिताः आत्मनिर्भराश्च भवन्ति, तदा सम्पूर्णः समाजः प्रगतिं करोति।
विद्यालय-परिवारेण अस्मिन् शुभावसरे सर्वाभ्यः छात्राभ्यः, शिक्षिकाभ्यः अतिथिभ्यश्च तीज-पर्वणः हार्दिकाः शुभकामनाः प्रदत्ताः। सम्पूर्णः कार्यक्रमः भारतीयसंस्कृतेः, नारीसम्मानस्य, महिला-सशक्तीकरणस्य, आत्मनिर्भरतायाः सामाजिक-उत्थानस्य च प्रेरणादायकं सन्देशं दत्त्वा सम्पन्नः अभवत्।
