देवभूमौ हिमाचले भवेत् एकः संस्कृत-विश्वविद्यालयः — कुलपतिना प्रो. बिहारीलालशर्मणा प्रदेशसर्वकारः साग्रहम् अभ्यर्थितः
हिमसंस्कृतवार्ता: – बिलासपुरम्।
सम्पूर्णानन्द-संस्कृत-विश्वविद्यालय-वाराणस्याः माननीयेन कुलपतिना प्रो. बिहारीलालशर्मणा हिमाचलप्रदेशसर्वकारं प्रति देवभूमौ पृथक्-संस्कृत-विश्वविद्यालयस्य संस्थापनाय सबलम् अभ्यर्थनम् उपस्थापितम्।
कुलपतिमहोदयेन रेखाङ्कितं यद् उत्तराखण्डः, हरियाणा, देहली, उत्तरप्रदेशः, कर्णाटकम्, केरलम्, मध्यप्रदेशः, गुजरातम् इत्यादयः समेऽपि प्रमुखाः प्रदेशाः स्वकीयान् पृथक्-संस्कृत-विश्वविद्यालयान् धारयन्ति, यैः तत्रत्य-पारम्परिक-ज्ञानपरम्परायाः उच्चस्तरीय-अनुसन्धानस्य च अभूतपूर्वः विकासः जायते। किन्तु अतीव खेदस्य विषयोऽस्ति यत् ‘देवभूमिः’ इति ख्याते, ऋषीणां तपःस्थल्याम् अस्मिन् हिमाचलप्रदेशे अद्यापि एकस्यापि संस्कृतविश्वविद्यालयस्य अभावः वर्तते।
तैः स्पष्टीकृतं यत् हिमाचलप्रदेशे बहुसंख्याकाः सर्वकारीयाः अशासकीयाश्च संस्कृतमहाविद्यालयाः संवृद्धाः सन्ति, यतः प्रतिवर्षं सहस्रशः प्रतिभावन्तः शास्त्रि-स्नातकाः (शास्त्री-उत्तीर्णाः) निर्गच्छन्ति। किन्तु प्रदेशे स्वतन्त्रस्य संस्कृतविश्वविद्यालयस्य अभावात् उच्चशिक्षायै, विशिष्टानुसन्धानाय, आचार्य-विद्यावारिधि-सदृश-उच्चपदवीभ्यश्च एतेभ्यः छात्रेभ्यः स्वगृहं स्वराज्यं च विहाय सुदूरं देहलीं, वाराणसीं, जयपुरं, तिरुपतिं वा प्रति गन्तव्यं भवति। अनेन आर्थिकदृष्ट्या दुर्बलानां, विशेषतः ग्रामीण-पार्वत्यक्षेत्राणां छात्राणां कृते उच्चशिक्षायाः मार्गे महती बाधा समुत्पद्यते।
कुलपतिना प्रो. बिहारीलालशर्मणा छात्रहितं प्रदेशस्य सांस्कृतिक-गरिमां च अवधाय प्रदेशसर्वकाराय साग्रहं परामर्शः दत्तः यत्—
“हिमाचलप्रदेशस्य मध्यवर्तिनि कस्मिंश्चिद् उपयुक्ते क्षेत्रे शीघ्रमेव एकस्य सर्वसुविधायुक्तस्य संस्कृतविश्वविद्यालयस्य स्थापना विधातव्या, येन प्रदेशस्य समस्तमहाविद्यालयाः एकेनैव सूत्रेण सम्बद्धाः भवेयुः, शोधच्छात्रेभ्यश्च स्वराज्ये एव उच्चस्तरीय-अध्ययनस्य असीम-अवसराः समुपलब्धाः स्युः।”
कुलपतिमहोदयस्य अनेन आह्वानेन प्रदेशस्य संस्कृतविद्वत्समाजे, प्राध्यापकेषु, छात्रेषु च पुनरेकवारं देवभूमौ संस्कृतविश्वविद्यालय-संस्थापनायाः याचनायै नूतनः उत्साहः सञ्चारितः।
