VASANT PANCHAMI 2026 – मातुः सरस्वत्याः आराधनायाः महापर्व: बसन्तपञ्चम्याः पुण्यकालः २३ जनवरी प्रातः ०२:२९ वादनात्- प्रो. बिहारीलाल: शर्मा
हिमसंस्कृतवार्ता:- वाराणसी।
सम्पूर्णानन्द- संस्कृत- विश्वविद्यालयस्य (वाराणसी) कुलपतिः प्रो. बिहारीलालशर्मा जनसामान्यं सूचितवान् यत् विद्या- ज्ञान- वाचां अधिष्ठात्री देवी मातुः सरस्वत्याः कृते समर्पितः पावनः बसन्तपञ्चमी पर्वः अस्मिन् वर्षे गुरुवारवासे, २३ जनवरी २०२६ दिनाङ्के शास्त्रीयविधि-विधानेन श्रद्धया च मानयिष्यते। कुलपतिः प्रो. शर्मा उक्तवान् यत् विश्वविद्यालयस्य ज्योतिषविभागेन उपलब्धैः प्रामाणिकपञ्चाङ्गैः, धर्मशास्त्रीय- मान्यताभिः ज्योतिषीयगणनाभिः च अनुसारं बसन्तपञ्चमी (माघशुक्ल पञ्चमी) तिथिः २२ जनवरी २०२६ दिनाङ्कस्य मध्यरात्रौ २३ जनवरी दिनाङ्कस्य प्रातः ०२:२९ वादने आरप्स्यते, या २४ जनवरी २०२६ दिनाङ्कस्य प्रातः ०१:४६ वादनं यावत् प्रभावी भविष्यति। एवं प्रकारेण एषा तिथिः २३ जनवरी दिनाङ्के सम्पूर्णदिवसं, २४ जनवरी दिनाङ्कस्य प्रातः ०१:४६ वादनं यावत् विद्यमाना भविष्यति। सः स्पष्टं कृतवान् यत् शास्त्रीय- सिद्धान्तस्य “तिथिं समनु प्राप्त उदयं याति भास्करः” इत्यस्यानुसारं, २३ जनवरी २०२६ दिनाङ्के पञ्चमीतिथेः सूर्योदयेन सह संयोगः भवति, अतः अयमेव दिवसः बसन्तपञ्चमीपर्वणे श्रीसरस्वतीपूजनाय च मुख्यरूपेण मान्यः भविष्यति। अपि च, मध्यरात्रौ अपि पञ्चमीतिथिः अवशिष्टा अस्ति, अतः २४ जनवरी २०२६ दिनाङ्के सूर्योदयं यावत् विद्यारम्भः, ज्ञानदानम्, जप-तपः पूजनादिकर्माणि च कर्तुं शक्यन्ते। प्रो. शर्मा सूचितवान् यत् ज्योतिषीयदृष्ट्या अस्मिन् वर्षे बसन्तपञ्चम्यां मकरराशौ सूर्यस्य मीनराशौ च चन्द्रस्य संयोगः, पूर्वाभाद्रपदनक्षत्रं तथा शिवयोगस्य विशेषप्रभावः वर्तते, यत् ज्ञान- विद्या- बौद्धिकसाधनायै अत्यन्तं शुभं मन्यते। विशेषरूपेण २३ जनवरी २०२६ दिनाङ्के प्रातः ०७:५६ वादनात् अपराह्णे ०१:५९ वादनं यावत् श्रीसरस्वतीपूजनाय विद्यारम्भाय च श्रेष्ठमुहूर्तः उपलब्धः अस्ति। कुलपतिः प्रो. शर्मा अवदत् यत् बसन्तपञ्चमी भारतीयसंस्कृतौ ऋतुपरिवर्तनस्य, नवचेतनायाः, सृजनशीलतायाः, कलायाः बौद्धिकजागरणस्य च प्रतीकपर्व अस्ति। अयं दिवसः विद्यार्थिनां, शिक्षकाणां, साधकानां शोधार्थिनां च कृते विशेषरूपेण कल्याणकारी मन्यते। अस्मिन् अवसरे शिक्षणसंस्थाभिः विद्यालयैः सांस्कृतिकसङ्घटनैः च विविधाः धार्मिक-सांस्कृतिक-शैक्षणिककार्यक्रमाः आयोज्यन्ते। अन्ते प्रो. बिहारीलालशर्मा जनसामान्यं प्रति आह्वानं कृतवान् यत् ते उपर्युक्ततिथिं, पुण्यकालं मुहूर्तं च ध्यानं निधाय मातुः सरस्वत्याः आराधनां कुर्वन्तु तथा च बसन्तपञ्चमीपर्व श्रद्धा- शान्ति- ज्ञानसाधना- उल्लासैः सह मानयन्तु।
