सिद्धार्थनगरे निवृत्तिवेतनभोगिभ्यः डिजिटलजीवितप्रमाणपत्रं समर्पयितुं सूचना
हिमसंस्कृतवार्ता: वृजेश कुमार पाण्डेय। सिद्धार्थनगरम्।
नवम्बर-दिसम्बरमासयोः कोषागारं गन्तुं विना ऑनलाइनमाध्यमेन जीवितप्रमाणपत्रं समर्पयितुं शक्यते।
सिद्धार्थनगरस्य वरिष्ठकोषाधिकारिणा निवृत्तिवेतनभोगिनां सुविधार्थं डिजिटलजीवितप्रमाणपत्रस्य प्रस्तुतिविषये प्रेसविज्ञप्तिः निर्गता। विज्ञप्त्यनुसारं सामान्यतः नवम्बर-दिसम्बरमासयोः कोषागारात् निवृत्तिवेतनं प्राप्नुवन्तः निवृत्तिवेतनभोगिनः स्वस्य जीवितप्रमाणपत्रं समर्पयितुं कोषागारे उपस्थिताः भवन्ति। किन्तु शासनव्यवस्थानुसारं निवृत्तिवेतनभोगिनां कोषागारे व्यक्तिगत रूपेण उपस्थितिः अनिवार्या नास्ति।
निवृत्तिवेतनभोगिनः आधिकारिकजालपुटे https://jeevanpramaan.gov.in� इत्यत्र स्वयमेव प्रवेशं कृत्वा डिजिटलजीवितप्रमाणपत्रं निर्मातुं शक्नुवन्ति। अथवा स्वस्य चलदूरवाण्यां प्ले-स्टोर्-माध्यमेन Jeevan Pramaan तथा Aadhaar Face RD इति अनुप्रयोगद्वयं संस्थाप्य आधारसंख्यां, आधारसम्बद्धं चलदूरवाणीक्रमाङ्कं, ई-मेल्-परिचयं च समर्प्य ओटीपी-माध्यमेन स्वस्य निवृत्तिवेतनसम्बद्धानि विवरणानि पूरयित्वा ऑनलाइनमाध्यमेन जीवितप्रमाणपत्रं समर्पयितुं शक्नुवन्ति।
यदि डिजिटलजीवितप्रमाणपत्रं समर्पयितुं तान्त्रिकी समस्या उत्पद्यते, तर्हि व्यक्तिगतसत्यापनार्थं पीपीओ-सङ्ख्या, फोटोयुक्तं बैंक-पासबुक्, पेनकार्ड्, आधारकार्ड् इत्येतेषां छायाप्रतीतयः तथा एकम् अतिरिक्तं छायाचित्रं स्वसमीपे स्थापयितुं निवृत्तिवेतनभोगिभ्यः सूचितम्।
एतेन व्यवस्थया निवृत्तिवेतनभोगिनः अनावश्यकायासात् मुक्ताः भविष्यन्ति तथा नवम्बर-दिसम्बरमासयोः कोषागारे जायमानात् अत्यधिकजनसम्मर्दात् उत्पद्यमानाभ्यः समस्याभ्यः अपि रक्षिताः भविष्यन्ति।
