अम्मा रा चरखा
सै भी ज़माना था तंजे अपणे आप लोक थे सूत कतदे
जनानां चरखा चलांदियां थी मर्द फांगू कन्ने ई थे रखदे
सारा दिन कमाणे ते बाद चरखे री बारी थी औंदी
अम्मा पंद्रह बीह तहकलु बणाई कने ई थी सौंदी
रुई कने ऊन दूँईं री करदे थे चरखे पर कताई
कतणे ते पहले ई पूणियां लैन्दे थे बणाई
मर्द बी चलदे चलदे फांगुये ने करदे थे कताई
रुई कने ऊना री पहले पुम्बे ने करवाणे पौंदी थी पँजाई
कपाह पकणे ते बाद बेलुये च थे पांदे
रुई लग कने बडुएँ लग थे हुई जांदे
अम्मा रे चरखे री चीं चीं री वाज थी पछवाड़े तक जांदी
कल कतयां हुण सेई जा बच्चा दादी बोहड़ी ते थी ग्लान्दी
बगड़ी री बंणदी थी चरमखां सूत्रा री माहल
माहली पर दागले रा दूध थे लगान्दे
ऊना रे बणाइन्दे थे ओढ़ने जो कंबल
कने रुई कतीं कने कपड़े थे बणान्दे
हुण बेलू तां किती मिलणे तांजे हुन्दी नी कपाह
चरखे री चूँ चूँ बी हुण टैमा कने हुई गई दफण
अपने हत्था रे बणीरे कपड़े ई पहनदे थे सारे
हत्था ने कत्तीरे कपड़े रे ई बणान्दे थे कफ़ण
नवीं पीढ़ी कदी नी मन्नी सकदी
पई कपड़े बी कदी हत्था कने हुंदे थे त्यार
कई कई टलियाँ हुन्दी थी कपडेयाँ जो पाईरी
शर्म नी करदे थे तिन्हां कपडेयाँ कने ई जांदे थे बाहर
हुण कुण पुछदा चरखे जो देखो टैमा री मार
सिर्फ पहनणे ई अये बजारा मिलदे सब कपड़े त्यार
अपनी पसंदा रा खाओ पसंदा रा पहनो
ब्रांडेड कपड़े पहनदे हुण सूटा पर ई ख़र्चदे कई हज़ार
रवींद्र कुमार शर्मा
घुमारवीं
जिला बिलासपुर हि प्र
