प्रियङ्का गान्धी बालकेभ्यः सन्देशं प्रेषितवती, उक्तवती—निराशाः मा भवत, ऋतु: सम्यक् भवति चेत् अवश्यं मिलितुम् आगमिष्यामि
हिमसंस्कृतवार्ता: – शिमला।
ऋतो: प्रतिकूलतायाः कारणेन मण्डीजनपदस्य देउरी इत्यत्र आयोजिते कार्यक्रमे प्राप्तुं न शक्नुवती काङ्ग्रेस-महासचिवा तथा सांसद् प्रियङ्का गान्धी बालकेभ्यः सन्देशं प्रेषयित्वा तेषां उत्साहं वर्धितवती। मुख्यमन्त्रिणः राजनैतिक-सलाहकारः सुनील शर्मा बिट्टू समारोहस्थले तस्याः सन्देशं पठित्वा श्रावितवान्। प्रियङ्कया उक्तम्—“बालकाः, यूयं निराशाः मा भवत। यदा एव ऋतु: सम्यक् भविष्यति, तदा अहं युष्माभिः सह मिलितुं अवश्यं आगमिष्यामि।”
प्रियङ्का गान्धी देउरी-स्थले वर्षे २०२३ तमे घटितायाः प्राकृतिक-आपद: समयस्य परिस्थितीनां स्मरणं कुर्वती उक्तवती यत् १२ सितम्बर २०२३ दिनाङ्के सा स्वनेत्राभ्यां एतां त्रासदीं दृष्टवती आसीत्।
तदनन्तरं गतत्रिषु वर्षेषु जनाः परिश्रमेण धैर्येण च क्षतिग्रस्तं विद्यालयभवनं पुनः निर्मितवन्तः, यत् प्रशंसनीयम् अस्ति। अधुना नूतनभवने बालकानां कक्षाः प्रारब्धाः सन्ति।
बालकैः सह संवादं कुर्वती प्रियङ्का उक्तवती यत् विद्यालयः केवलं अध्ययनस्य स्थानं नास्ति, अपितु स्वप्नानां कौशलस्य च विकासाय उड्डयनस्य माध्यमम् अपि अस्ति। कश्चित् अभियन्ता, चिकित्सकः, क्रीडकः, कलाकारः अथवा अभिनेता भवितुम् इच्छति। बालकानां कौशलस्य विकासस्य आरम्भः विद्यालयादेव भवति।
सा विद्यार्थिभ्यः एकाग्रचित्तेन अध्ययनं कर्तुं, प्रसन्नतया क्रीडितुं, स्वप्नानां आशानां च विषये मुक्तरूपेण अभिव्यक्तिं कर्तुं च आह्वानं कृतवती। सा संविधानस्य मूल्यानां, समानतायाः, प्रेम्णः, एकतायाः भ्रातृत्वस्य च महत्त्वं ज्ञातुं विद्यार्थिभ्यः कथितवती।
