प्रो. बिहारीलालशर्मा पुनः सम्पूर्णानन्द-संस्कृत-विश्वविद्यालयस्य कुलपति-पदे नियुक्तः; कुलाधिपतिना आनन्दीबेन-पटेल-वर्यया प्रसारित: आदेशः
हिमसंस्कृतवार्ता — वाराणसी।
उत्तर-प्रदेशस्य राज्यपालवर्यया तथा च सम्पूर्णानन्द-संस्कृत-विश्वविद्यालयस्य कुलाधिपतिना आनन्दीबेन-पटेल-महोदयया प्रो. बिहारीलालशर्मा पुनः त्रीणि वर्षाणि यावत् सम्पूर्णानन्द-संस्कृत-विश्वविद्यालयस्य (वाराणसी) कुलपति-रूपेण नियुक्तः कृतः।
अस्मिन् सन्दर्भे ‘लोक-भवनम्’ लखनऊ-तः १७ अगस्त २०२६ दिनाङ्के प्रसारिते आदेशे कुलाधिपतिना उक्तं यत् उत्तर-प्रदेश-राज्य-विश्वविद्यालय-अधिनियम-१९७३ इत्यस्य धारा-१२ इत्यस्याः उपधारा-१ इत्यस्याः प्रदत्त-शक्तीनां प्रयोगं कुर्वती सा प्रो. बिहारीलालशर्मा-महोदयं कार्यभार-ग्रहण-तिथेः आरभ्य वर्ष-त्रयस्य अवधये सम्पूर्णानन्द-संस्कृत-विश्वविद्यालयस्य कुलपति-पदे नियुङ्क्ते।
ज्ञातव्यमस्ति यत् प्रो. बिहारीलालशर्मा-महोदयः संस्कृत-जगतः लब्धप्रतिष्ठः विद्वान्, कुशल-प्रशासकः, राष्ट्रिय-स्तरे च संस्कृत-प्रचार-प्रसारार्थं समर्पितः व्यक्तित्ववान् वर्तते। तस्य कार्यकाल-विस्तारेण संस्कृत-विद्वत्-समाजे हर्षस्य तरङ्गः व्याप्तः अस्ति।
देवभूमिहिमाचलस्य संस्कृतपरिवारपक्षतः हार्दम् अभिनन्दनम्
प्रो. बिहारीलालशर्मा-महोदयस्य सम्पूर्णानन्द-संस्कृत-विश्वविद्यालयस्य कुलपति-पदे पुनर्नियुक्तौ सत्यां हिमाचल-राजकीय-संस्कृत-शिक्षक-परिषदः संरक्षक:, पूर्व-प्रदेशाध्यक्ष: डॉ मनोजशैल: परिषद: प्रदेशाध्यक्ष: कमलकान्त: गौतम:, महासचिव: डॉ अमनदीप: शर्मा वित्तसचिव: लोकपाल: तथा च सर्वै: सदस्यै: हिमसंस्कृतवार्ता-परिवारस्य समस्त-सदस्यैः च तस्मै हार्दं वर्धापनं कार्तज्ञ्यं च व्याहृतम्।
डॉ मनोजशैलेन प्रोक्तं यत् प्रो. बिहारीलालशर्मा-महोदयस्य मार्गदर्शने सम्पूर्णानन्द-संस्कृत-विश्वविद्यालयः नूतनान् सोपानान् प्राप्स्यति संस्कृत-शिक्षायाः च सर्वतोभावेन विकासः भविष्यति। समस्त-देवभूमिहिमाचल-संस्कृत-परिवारः तस्य यशस्वी-कार्यकालाय मङ्गलमयाः अनन्ताश्च शुभकामनाः प्रस्तौति।
