मुकेशअग्निहोत्री अवदत्— जलशक्तिविभागे अस्मिन् वित्तवर्षे पूरयिष्यन्ते ४,००० पदानि, भविष्यति जलशुद्धीकरणम्
हिमसंस्कृतवार्ता: — ऊना ।
उपमुख्यमन्त्रिणा मुकेशअग्निहोत्रिणा प्रोक्तं यत् जलशक्तिविभागे अस्मिन् वित्तवर्षे प्रायः ४,००० पदेषु नियुक्तिः विधास्यते। तेन कथितं यत् पर्याप्त-जनशक्तिं (मैनपावर) विना कापि योजना सफला भवितुं न शक्नोति। अतः सर्वकारः विभागं सुदृढं विधातुं युवकेभ्यः जीविका-प्रदानाय च विशेष-बलं यच्छन् अस्ति। उपमुख्यमंत्री शनिवासरे हरोली-क्षेत्रस्य पालकवाह-सभागारे जलशक्तिविभागस्य, हमीरपुर-मण्डलस्य पक्षतः आयोजितायाः ‘जलसंभरण-सेचन-योजनानां सञ्चालनं, संवर्धनं, जलगुणवत्ता-निरीक्षणम्’ इति विषये एकदिवसीयायाः कार्यशालायाः अभिसंमुखीकरण-कार्यक्रमस्य च सम्बोधनं करोति स्म। अस्मिन् अवसरे तेन विभागस्य उत्कृष्टं कार्यं कुर्वन्तः कर्मचारिणः सम्मानिताः अपि कृताः। तेन नवनियुक्ताः पैरा-पम्प-ऑपरेटर्, पैरा-फिटर्, मल्टीपरपज-वर्कर् तथा च वाटर-गार्ड इति कर्मचारिणः विभागस्य ध्वजवाहकाः प्रोक्ताः कथितं च यत् प्रदेशस्य जनेभ्यः स्वच्छं सुरक्षितं च पेयजलं प्रापयितुं तेषां महती भूमिका अस्ति। तेन उक्तं यत् तेषां भविष्यत् उज्ज्वलं वर्तते ते च धैर्येण सह कार्यं कुर्वन्तः तिष्ठेयुः। एषा ५८ वर्षीयावधिं यावत् पेंशन-लाभयुक्ता सेवा अस्ति। तेन विश्वासः प्रदत्तः यत् वर्तमान-सर्वकारस्य कार्यकाले एतेषां कर्मचारिणां हितैः सम्बद्धाः निर्णायकाः निर्णयाः ग्रहीष्यन्ते।
२,००० कोटिरूप्यकाणां व्यापका योजना प्रवर्तिष्यते
मुकेशअग्निहोत्रिणा कथितं यत् प्रदेशे पेयजलस्य गुणवत्तां परिष्कर्तुं जलशुद्धीकरणव्यवस्थां च आधुनिकीं विधातुं प्रायः २,००० कोटिरूप्यकाणां व्यापका योजना प्रवर्तिष्यते। योजनायाः अन्तर्गतं आधुनिक-प्रविधि-आधारिताः जलशुद्धीकरण-प्रणाल्यः स्थापयिष्यन्ते, येन प्रदेशवासिभ्यः स्वच्छं सुरक्षितं च पेयजलं प्राप्स्यति जलजन्यासु व्याधिषु अपि ह्रासः आगमिष्यति। तेन प्रोक्तं यत् जलशक्तिविभागः इमां योजनां चरणबद्ध-रूपेण प्रवर्त्यन् अस्ति।
फिनासिंह-सेचन-परियोजनायै ३०० कोटिरूप्यकाणि
तेन ज्ञापितं यत् काङ्गड़ामण्डलस्य फिनासिंह-सेचन-परियोजनां पूरयितुं ३०० कोटिरूप्यकाणि स्वीकृत्य दत्तानि सन्ति। तेन उक्तं यत् प्रदेशे जलशक्तिविभागस्य कोटिशः रूप्यकाणां विकासपरियोजनासु वेगेन कार्यं प्रचलति। उपमुख्यमन्त्रिणा मादकद्रव्य-दुर्व्यसनस्य विरुद्धं निर्णायके युद्धे सर्वेषां सहयोगः आहुतः तेन प्रोक्तं यत् दुर्व्यसन-सम्बद्धेषु प्रकरणेषु संलिप्ताः ३६ कर्मचारिणः सेवायाः निष्कासिताः सन्ति। तेन कथितं यत् सर्वकारः अस्मिन् विषये किमपि शैथिल्यं न सहिष्यते।
मुकेशेन भाजपा-नेतॄन् प्रति व्यङ्ग्यपातं कृतम्
तेन उक्तं यत् विकासकार्येषु राजनीतिं कुर्वन्तः जनाः जनता सम्यक् जानाति। भाजपा-नेतॄन् प्रति व्यङ्ग्यपातं कुर्वन् तेन कथितं यत् ये स्वयं काञ्चन सिद्धिं न गणयितुं शक्नुवन्ति, तेभ्यः परेषां कृतानि विकासकार्याणि अपि न रोचन्ते। तेन प्रोक्तं यत् तस्य एकमेव लक्ष्यं स्वर्णिमस्य विकसितस्य च हरोली-क्षेत्रस्य निर्माणम् अस्ति। सः राजनीतिं न, अपितु विकासस्य राजनीतिं विश्वसिति जनतायाः हिते च कार्यं कुर्वन् स्थास्यति। उपमुख्यमन्त्रिणा उद्घोषितं यत् आगामिसंवत्सरात् जलशक्तिविभागे उत्कृष्टं कार्यं कुर्वताम् कर्मचारिणां सम्माननस्य परम्परा आरप्स्यते। तेन कर्मचारिणः आहुताः यत् ते स्वकीयेन उत्कृष्टेन कार्येण व्यवहारेण च जनानां विश्वासं जयन्तु विभागस्य च प्रतिष्ठां इतोऽपि सुदृढां कुर्वन्तु।
