सेवाभारती-बिलासपुर-पक्षतः AIIMS-बिलासपुर-चिकित्सालयाय पञ्च चक्रासनयन्त्राणि (व्हीलचेयर) समर्पितानि
हिमसंस्कृतवार्ता —डॉ. मनोजशैल: बिलासपुरम् ।
सेवाभारती-सङ्घटनस्य जनपद-घटकेन (जिला इकाई) बिलासुरेण AIIMS-बिलासपुर-आयुर्विज्ञान-संस्थानाय पञ्च चक्रासनयन्त्राणि (व्हीलचेयर) उपहारीकृतानि। एतत् सेवाकार्यं सेवाभारत्याः जनपदाध्यक्षस्य श्री-देवराजशर्म-महोदयस्य अध्यक्षतायां सम्पन्नम् अभवत्।
अस्मिन् अवसरे सेवाभारत्याः जनपद-महासचिवः अमृतमहाजन-महोदयः न्यवेदयत् यत् सेवाभारती AIIMS-बिलासपुर-परिसरे दीर्घकालात् आवश्यकतावतां रुग्णानां तेषां सम्बन्धिनां च साहाय्याय विविधप्रकारकाः सेवाप्रवृत्तीः सञ्चालयन्ती अस्ति। एतासु चाय-पिष्टक-सेवा, शय्या-सेवा, सेवाभारती-साहाय्यकक्षः (हेल्पडेस्क), रुग्णवाहिनी-सेवा (एम्बुलेंस) तथा च निर्धनरुग्णानाम् उपचाराय आर्थिकसाहाय्यप्रदानं प्रमुखाः सन्ति।
तेन सूचितं यत् गते वर्षे सेवाभारत्या AIIMS-बिलासपुर-परिसरे प्रायः द्विलक्ष-अशीतिसहस्रं (२,८०,०००) जनान् यावत् स्वकीयाः विविधाः सेवाः प्रापिताः। संस्थायाः मुख्यम् उद्देश्यम् आवश्यकतावतां रुग्णानां तेषां परिवारीयाणां च कष्टकाले सहकारप्रदानं तथा च मानवीयसेवायाः माध्यमेन समाजं प्रति स्वकीयानां दायित्वानां निर्वहणम् अस्ति।
पञ्च चक्रासनयन्त्राणां समर्पणस्यायं प्रयासोऽपि अस्या एव सेवाभावनायाः अङ्गम् अस्ति, येन चिकित्सालये आगच्छतां रुग्णानाम् आवागमने महती सौविध्यता प्राप्स्यते।
