विदेशात् एम.बी.बी.एस. (MBBS) कृतवतां स्नातकानाम् ‘इंटर्नशिप’-अवधिः एकवर्षं भविष्यति, मुख्यमंत्री सुक्खू-महोदयेन दत्ताः निर्देशाः
हिमसंस्कृतवार्ता: — शिमला।
मुख्यमन्त्रिणा सुखविन्दरसिंहसुक्खू महोदयेन पात्रेभ्यः वैदेशिक-चिकित्सा-महाविद्यालयेभ्यः एम.बी.बी.एस. (MBBS) कृतवद्भ्यः कोविड-१९ विभिषिका-काले उत्पन्नानाम् अपरिहार्य-परिस्थितीनां कारणेन ‘ऑन-लाइन’ माध्यमेन अध्ययनं कृतवद्भ्यः छात्रेभ्यः एकवर्षस्य प्रशिक्षणस्य (इंटर्नशिप) अनुमतिं प्रदातुं निर्देशाः दत्ताः। मुख्यमन्त्रिणा शनिवासरे छात्रैः सह स्वास्थ्यविभागस्य वरिष्ठ-अधिकारिभिः सह च आयोजितायाः उपवेशनस्य अध्यक्षतां कुर्वता प्रतिपादितं यत् राज्यसर्वकारः प्रभावितानां छात्राणां चिन्तानां समाधानं निष्पक्षेण, व्यावहारिकेण, छात्रहितैषिणा च दृष्टिकोणेन करिष्यति। प्रदेशसर्वकारः एतत् सुनिश्चितं कर्तुं कटिबद्धः अस्ति यत् कोविड-१९ विभिषिका-काले उत्पन्नानाम् परिस्थितीनां कारणेन प्रभाविताः योग्याः छात्राः कस्यापि प्रकारस्य हानिं न सहेरन्।
सुक्खू-महोदयेन प्रोक्तं यत् विदेशात् चिकित्सा-स्नातकं कृतवतां छात्राणां ‘इंटर्नशिप’-अवधिं आदाय अनिश्चयः उत्पन्नः अभवत्, यतो हि एकस्यैव शैक्षणिक-गणस्य (Batch) छात्रेभ्यः पृथक्-पृथक् अवधिः निर्धारिता आसीत्। केभ्यश्चित् छात्रेभ्यः एकवर्षस्य ‘प्रशिक्षणम्’ अनुमता, यदा च तादृशीष्वेव परिस्थितिषु कोविड-१९ काले पठनं कृतवद्भ्यः अन्येभ्यः छात्रेभ्यः वर्षद्वयस्य ‘इंटर्नशिप’ कर्तुं निर्देशाः दत्ताः। तेन कथितं यत् ‘राष्ट्रीय-चिकित्सा-आयोगेन’ (NMC) विभिषिका-काले ऑन-लाइन-माध्यमेन पठितवतां वैदेशिक-चिकित्सा-स्नातकानां कृते प्रतिपूरक-प्रशिक्षण-अवधेः उपयुक्ततायाः आकलनस्य अधिकारः राज्यसर्वकारेभ्यः समर्पितः अस्ति। एन.एम.सी. (NMC) संस्थायाः प्रावधानानि छात्रैः सोढाः वास्तविकीः कठिनता: च ध्यात्वा राज्यसर्वकारेण पात्र-अभ्यर्थिभ्यः ‘इंटर्नशिप’-अवधिः एकवर्षं निर्धारितुं निर्णयः गृहीतम्।
मुख्यमन्त्रिणा स्वास्थ्यविभागः निर्दिष्टः यत् सर्वाः आवश्यकाः औपचारिकताः शीघ्रं पूरयित्वा आवश्यकाः आदेशाः सद्यः प्रसारणीयाः, येन प्रभाविताः छात्राः अविलम्बं स्वकीयां ‘इंटर्नशिप’ आरब्धुं पूरयितुं वा शक्नुयुः। अनेन निर्णयेन प्रभावितेभ्यः चिकित्सा-स्नातकेभ्यः महती साहाय्यता लप्स्यते ते च निष्प्रतिबन्धं स्वकीयं चिकित्सा-जीवनम् (Career) अग्रे नेतुं शक्ष्यन्ति। अनेन राज्ये चिकित्सा-शिक्षायाः स्वास्थ्य-सेवानाम च गुणवत्ता अपि स्थास्यति। उपवेशने प्रधान-परामर्शक: (मीडिया) नरेशचौहानः, स्वास्थ्यसचिवः आशीषसिंहमारः, चिकित्सा-शिक्षा-निदेशकः डॉ. गोपालबेरी च उपस्थिताः आसन्।
