HP NEWS – निर्धनपरिवारेभ्यः ३०० यूनिट् परिमिता निःशुल्का विद्युत् प्राप्स्यते
हिमसंस्कृतवार्ता: – शिमला।
प्रदेशसर्वकारः पात्रेभ्यः दरिद्रतारेखातः अधः स्थितेभ्यः अर्थात् बी.पी.एल.-खाद्यान्नपत्रधारकेभ्यः अतिनिर्धनेभ्यः च विद्युत्-उपभोक्तृभ्यः ३०० यूनिट् परिमितां निःशुल्कां विद्युतं प्रदास्यति। अस्य कृते उपभोक्तृभिः आधार-पत्रस्य, बी.पी.एल.-खाद्यान्नपत्रस्य अथवा बी.पी.एल.-प्रमाणपत्रस्य तथा च नवीनतमस्य विद्युत्देयकस्य (बिजली बिल) प्रतिः सम्बद्धे विद्युत्कार्यालये समर्पणीया भविष्यति। विद्युन्मण्डलेन (बिजली बोर्ड) स्पष्टीकृतं यत् पत्राणां (दस्तावेज) असमर्पणे पात्रोपभोक्तारः लाभात् वञ्चिताः भवितुं शक्नुवन्ति।
अपरतः, शिमला-नगरे बी.पी.एल.-उपभोक्तॄणां अर्थात् अतिनिर्धनपरिवाराणां प्रत्यभिज्ञानं क्रियमाणम् अस्ति तथा च उपभोक्तॄणां विवरणं (डाटा) याचितम् अस्ति, किन्तु अधुना शिमला-नगरे द्वौ एव उपभोक्तारौ प्राप्तौ। अन्ये ये उपभोक्तारः पत्राणि समर्पितवन्तः तेषां ग्राहक-परिचय-संख्या (कंज्यूमर आईडी) न प्राप्ता। एतदतिरिक्तं शिमला-जनपदस्य अन्येषु विभागेषु उपभोक्तारः स्वपत्राणि समर्पयन्तः सन्ति।
