काञ्चीधाम्नि अखिलभारतीयशास्त्रोत्सवस्य भव्योद्घाटनम्: देशस्य कोणात् शतशः छात्राणां प्रतिभागिता
“संस्कृतभाषायाः प्रचारेण समाजे प्रेमसद्भावयोः उदयः भवति, न तु वैमनस्यस्य।”
जगद्गुरु श्रीशङ्करविजयेन्द्रसरस्वतीस्वामिनः, पीठाधीश्वराः, श्रीकाञ्चीकामकोटिपीठम्
काञ्चीपुरम् (तमिलनाडु): तमिलनाडुराज्यस्य ऐतिहासिकपुण्यक्षेत्रे काञ्च्यां ६३तम्याः ‘अखिलभारतीयशास्त्रीयप्रतियोगितायाः’ (शास्त्रोत्सवस्य) भव्योद्घाटनं सम्पन्नम्। केन्द्रीयसंस्कृतविश्वविद्यालयस्य कुलपतयः प्रो. श्रीनिवासवरखेडी महोदयः गतवर्षे हरिद्वारनगरे आयोजितप्रतियोगितायामेव अस्य उद्घोषणां कृतवान्। तस्यैव सङ्कल्पस्य फलश्रुतिरूपेण अस्मिन् वर्षे अयं ज्ञानयज्ञः ऐतिहासिककाञ्चीनगर्यां समायोज्यते।
विद्वत्सभा एवं उद्घाटनम्
काञ्चीस्थित-चन्द्रशेखरेन्द्रसरस्वती-विश्वमहाविद्यालयस्य प्रेक्षागृहे आयोजितस्य अस्य समारोहस्य अध्यक्षता विश्वविद्यालयस्य कुलाधिपतिना आचार्यवेम्पटिकुटुम्बशास्त्रिणा कृता। मुख्यातिथिरूपेण उपस्थिताः श्रीवेङ्कटेश्वरवैदिकविश्वविद्यालयस्य कुलपतयः आचार्यराणीसदाशिवमूर्तिमहोदयः स्वकीयायां काव्यमय्यां शैल्यां ‘शासन’ तथा ‘शंसन’ धातुभ्यां व्युत्पन्नस्य ‘शास्त्र’ शब्दस्य महिमानं वर्णितवान्। सः शास्त्रोत्सवस्य उद्देश्यं उपयोगितां च सविस्तरं स्पष्टीकृतवान्।
आतिथेयविश्वविद्यालयस्य कुलपतिः प्रो. जी. श्रीनिवासुमहोदयः काश्मीरतः कन्याकुमारीपर्यन्तं समागतानां विदुषां छात्राणां च स्वागतं कुर्वन्तः ऐतिहासिकप्रमाणानां आधारेण काञ्चीं ‘विद्यानगरी’ इति रूपेण प्रस्तुतवान्।
शास्त्रसंरक्षणाय छात्रेभ्यः सन्देशः
केन्द्रीयसंस्कृतविश्वविद्यालयस्य कुलसचिवः आचार्य रा.गा. मुरलीकृष्णमहोदयाः छात्रसमुदायं सम्बोधयन् अवदत् यत् छात्राः शास्त्रसंरक्षणाय अध्ययनाय च निरन्तरं तत्पराः भवेयुः। तेषां मते शास्त्रार्थस्य वास्तविकं लक्ष्यं श्रवण-मनन-निदिध्यासनप्रक्रियया ज्ञानस्य आत्मसात्करणमेव अस्ति। अध्यक्षीयभाषणे आचार्यवेम्पटिकुटुम्बशास्त्रिणा शास्त्रोत्सवस्य गौरवशालिनीं परम्परां स्वकीयं पूर्वयोगदानं च सप्रमाणं स्मृतम्।
श्रीचरणानाम् अनुग्रहभाषणम्
परमपूज्यपादाः **श्रीशङ्करविजयेन्द्रसरस्वतीस्वामिनः** स्वकीये आशीर्वचने प्रतिपादितवन्तः यत्—
विद्यायाः पुनरुत्कर्षः: अनादिकालात् विद्यानगरीत्वेन विख्यातायां काञ्च्यां पुनः शिक्षायाः विद्यायाश्च परमोत्कर्षः भवेत्।
शासनस्य सहयोगः-: केन्द्रसर्वकारः संस्कृतप्रचाराय कोटिशः रूप्यकाणि व्ययीकरोति, अत्र शिक्षा मन्त्रालयस्य भूमिका श्लाघनीया अस्ति।
भाषासमन्वयः-: केन्द्रीयसंस्कृतविश्वविद्यालयस्य माध्यमेन संस्कृत-प्रान्तीयभाषयोः मध्ये सुदृढः सम्बन्धः स्थापितः भवति।
नूतनाः प्रयोगाः- मन्दिरेषु ‘सुप्रभातम्’ इव संस्कृतवार्ताप्रसारणं भवेत्। सूचनापट्टेषु प्रान्तीयभाषाभिः सह संस्कृतमपि लेखनीयम्।
लोकप्रसारः-: काञ्चीतः प्रकाश्यमाना ‘संस्कृतश्री’ पत्रिका इव अन्यासु भारतीयभाषासु (कन्नड-तेलुगु-हिन्दी-मराठ्यादिषु) संस्कृतविषयकाः लेखाः निरन्तरं प्रकाशनीयाः। ‘दैनिकजागरण’ सदृशेषु पत्रेषु संस्कृतसुभाषितानां प्रकाशनं संस्कृतप्रचारे सहायकं भवति।
स्वामिचरणैः प्रयुक्तं यत् अस्माकं **प्रधानमन्त्रिणः श्रीनरेन्द्रमोदीमहोदयाः** संस्कृतज्ञाः सन्ति, बहवः मन्त्रिणः अपि संस्कृतं प्रति श्रद्धावन्तः। अतः सम्पूर्णे देशे संस्कृतप्रचाराय सङ्घटितप्रयासः करणीयः। अयं उत्सवः उत्तर-दक्षिणभारतयोः सांस्कृतिकसमन्वयस्य प्रतीकः अस्ति।
धन्यवादज्ञापनं सञ्चालनं च
कार्यक्रमस्य संयोजकैः प्रो. मधुकेश्वरभट्टमहोदयेन सर्वेषाम् अतिथीनां स्वागतं कुर्वन् सप्तमोक्षदायिनीषु काञ्च्याः वैशिष्ट्यं प्रतिपादितम्। विभागाध्यक्षैः आचार्यदेबज्यौतिमहोदयेन १९९५ तमे वर्षे काञ्च्यां सम्पन्नस्य पूर्वशास्त्रोत्सवस्य स्मृतिः सार्वजनिकं कुर्वन् सर्वेभ्यः कृतज्ञता प्रकटिता। कार्यक्रमस्य कुशलं सञ्चालनं डॉ. मयङ्कपाण्डेयमहोदयेन कृतम्।
