कुमारभास्करवर्मसंस्कृतपुरातनाध्ययविश्वविद्यालये नूतने “सम-उपाचार्या” पदे आचार्यमल्लिकाकलितायाः नियुक्तिः: सर्वैः विभागैः अभिनन्दनम्”
नलबारी (असम: )।
असम-प्रदेशस्य प्रख्याते कुमारभास्करवर्मसंस्कृतपुरातनाध्ययविश्वविद्यालये अद्य हर्षोल्लासस्य वातावरणं दृश्यते। विश्वविद्यालयस्य प्रशासनेन वरिष्ठ-आचार्या मल्लिका कलिता महोदया नूतन-सम-उपाचार्या (Rector) इति महत्त्वपूर्णे पदे नियुक्ता। इयं नियुक्तिः विश्वविद्यालयस्य इतिहासे महिलानेतृत्वस्य सुदृढं सोपानं मन्यते।
विशेषतः ८ मार्च दिनाङ्के ‘अन्ताष्ट्रिय-महिला-दिवसस्य’ पावन-अवसरे अनया घोषणया शैक्षणिक-क्षेत्रे नारी-शक्तेः उत्कर्षः प्रकटितः। विश्वविद्यालयस्य सभाङ्गणे आयोजिते गरिमामये अभिनन्दनसमारोहे कुलपति-महोदयैः सह सर्वेषां विभागानां प्रमुखाः उपस्थिताः आसन्। तत्र कुलपतिभिः प्रह्लाद रा जोशीमहोदयैः स्वभाषणेन सम-उपाचार्यमहोदयायै हार्दानि अभिनन्दनानि प्रदत्तानि। तेनोक्तं यत् एषः विश्वविद्यालयस्य कृते अतीव गौरवपूर्णः विषयः अस्ति तथा च सर्वे अपि अत्यन्तं हर्षिताः आनन्दिताश्च सन्ति।
समारोहे विश्वविद्यालयस्य विविधानां विभागानां पक्षतः आचार्य-मल्लिका-कलितायाः भव्यं स्वागतं कृतम्। संस्कृतसर्वदर्शनविभाग:, वेदाध्ययनविभागः, साहित्यविभागः, व्याकरणविभागः, धर्मशास्त्रविभागः, न्यायविभागः, शिक्षाविभागः, असमीयाविभागः, तथा योगविज्ञानविभागः इत्यादिभिः विभागैः स्व-स्व-प्रतिनिधिभिः साकं महोदयायै पुष्पगुच्छम्, अङ्गवस्त्रं च दत्वा अभिनन्दनानि व्याहृतानि।
सर्वे विभागाध्यक्षाः तस्याः दीर्घकालिक-शैक्षणिक-अनुभवस्य तथा पाण्डित्यस्य प्रशंसां कृतवन्तः। अस्मिन् अवसरे नवनियुक्ता सम-उपाचार्या अवदत् यत्— “विश्वविद्यालयस्य सर्वाङ्गीण-विकासाय, छात्राणाम् उज्ज्वल-भविष्याय तथा शिक्षायाः वैश्विके स्तरे प्रचाराय अहं पूर्णनिष्ठया कार्यं करिष्यामि। सर्वेषां विभागानां सहयोगेन वयं विश्वविद्यालयं नूतन-शिखरं नेष्यामः।”
अनया नियुक्त्या विश्वविद्यालयस्य शैक्षणिक-प्रशासनिक-कार्याणि नवीनां गतिम् ऊर्जां च प्राप्स्यन्ति इति विश्वासः प्रकटितः। अन्ते सर्वे छात्राः शोधच्छात्राः च महोदयां मिलित्वा स्व-शुभकामनाः प्रकटितवन्तः।
उत्तमम्