युव-चिकित्सक-सम्मानः-: स्वास्थ्यक्षेत्रे नूतन-ऊर्जायाः सञ्चारः

युव-चिकित्सक-सम्मानः-: स्वास्थ्यक्षेत्रे नूतन-ऊर्जायाः सञ्चारः
नूतनदेहली-: विज्ञान-प्रौद्योगिकी-मन्त्री डॉ. जितेन्द्रसिंहः नूतनदेहल्यां २६ युव-चिकित्सा-व्यवसायिनः पुरस्कारैः सम्मानितवान्।
अस्मिन् अवसरे सम्बोधयन् डॉ. जितेन्द्रसिंहः अवदत् यत् देशे स्वास्थ्यसेवाः सुदृढाः कर्तुं युव-चिकित्सकान् तेषां वृत्तिजीवनस्य (Career) प्रारम्भिकचरणे एव सम्मानितं करणं अतीव महत्त्वपूर्णं वर्तते। तेन प्रतिपादितं यत् प्रारम्भिकवर्षेषु चिकित्साक्षेत्रस्य जनानां प्रोत्साहनं तेभ्यः उत्कृष्टतां प्राप्तुं तथा च तीव्रगत्या विकसन्त्यां चिकित्साव्यवस्थायां स्वज्ञानस्य निरन्तरं वृद्धये प्रेरणां दास्यति।
चिकित्सापद्धतेः परिवर्तमानं स्वरूपं अधिकृत्य सः उक्तवान् यत् नूतन-तन्त्रांशानां तथा च कृत्रिम-प्रज्ञायाः (Artificial Intelligence) आगमनेन स्वास्थ्यसेवाक्षेत्रे क्रान्तिकारि-परिवर्तनं जायमानं अस्ति।डॉ. जितेन्द्रसिंहः स्पष्टीकृतवान् यत् यद्यपि प्रौद्योगिक्याः कारणतः रोगनिदाने (Diagnosis) उपचारे च महती उन्नतिः अभवत्, तथापि चिकित्साक्षेत्रे भिषजः (चिकित्सकस्य) भूमिका अपरिहार्या एव अस्ति।