Sanskrit Competitions : राज्यस्तरीय- सूत्रान्त्याक्षरी- स्पर्धायां क्यार्टू- संस्कृत- महाविद्यालयेन सततं तृतीयवारं प्राप्तं प्रथमं स्थानम्
हिमसंस्कृतवार्ता:- डॉ. सन्तोषकुमार:, ठियोग:।
सिरमौर-जनपदस्य गोरक्षनाथ- राजकीय- संस्कृत- महाविद्यालय: नाहनम् इत्यत्र हिमाचल- संस्कृत- अकादम्या द्विदिवसात्मक- राज्यस्तरीय- अन्तर्महाविद्यालयीय- संस्कृत- प्रतियोगितानाम् आयोजनं कृतम्। १५ महाविद्यालयानां १०४ प्रतिभागिनस्तत्र विविधासु स्पर्धासु भागमगृह्णन्। राजकीय-संस्कृत-महाविद्यालय: क्यार्टू इत्यस्य प्राचार्या: डॉ. राकेशकुमारशर्ममहोदया: असूचयन् यद् तत्र डॉ. वेदप्रकाशपाण्डेयवर्यस्य डॉ. दिनेशभारद्वाजमहोदयस्य च मार्गनिर्देशने अस्माकं महाविद्यालयस्य छात्रदलमपि भागं गृहीतवत्। सूत्रान्याक्षरीस्पर्धार्थम् अक्षय: भुवनेश्वरी च, वेदमन्त्रोच्चारणाय विक्रान्त:, गीतिकास्पर्धायै सुशान्त:, श्लोकोच्चारणस्पर्धार्थं नेहा, भाषणप्रतियोगितायै रीतिका, प्रश्नोत्तरी-स्पर्धार्थं हर्षिता पीयूषश्च, सद्योभाषणाय च अक्षय: महाविद्यालयस्य प्रातिनिध्यमकुर्वन्। सर्वेषामेव प्रस्तुतय: प्रशंसनीया: आसन्। महाविद्यालयस्य प्रतिनिधिभि: छात्रै: एतासु स्पर्धासु सूत्रान्त्याक्षरी- स्पर्धायां प्रथमं स्थानम्, गीतिकास्पर्धायां द्वितीयं स्थानम्, भाषणस्पर्धायां च सान्त्वनापुरस्कार: चतुर्थं वा स्थानं प्राप्तम्। महाविद्यालयस्य कृते गौरवमयस्समाचारोऽयं यत् सूत्रान्त्याक्षरी-स्पर्धायां सततं तृतीयवारं क्यार्टू-संस्कृत-महाविद्यालयो विजयी अभवत्। प्राचार्यमहाभागै: उक्तं यत् इदं महाविद्यालय-प्राध्यापकानां प्रतिनिधिभूतच्छात्राणां च कठिनतपस: फलम्। विजयोत्सवोपलक्ष्ये महाविद्यालये हर्षमयं वातावरणमस्ति। सर्वेऽपि छात्रा:, प्राध्यापका:, प्राध्यापिका:, कर्मचारिणश्च महाविद्यालयस्य विजेतृदलं वर्धापनवचोभिरभिनन्दितवन्त:।
