IYD 2024 Celebration : लघ्वीकाश्यां मण्ड्यां बिजन-ढलवानविद्यालये आचरित: योगदिवस:
हिमसंस्कृतवार्ता – लघ्वीकाशी मण्डी।
अखिले देशे अन्ताराष्ट्रीययोगदिवस: प्रायोगिकरूपेण आचरित:। यस्मिन् क्रमे हिमाचलस्य सर्वेषु जनपदमुख्यालयेषु जनपदस्तरीया: कार्यक्रमा: अभवन्। लघ्वीकाश्यां मण्ड्यामपि ऐतिहासिके सेरीमञ्चे जिलास्तरीयम् आयोजनमभवत्। तत्रैव प्रदेशस्य सर्वकारीयेषु विद्यालयेषु अपि योगदिवस: महता उत्साहेन आचरित:। अस्मिन् क्रमे मण्डी जनपदस्य राजकीय- उच्च- पाठशालायां बिजन-ढलवाने मुख्याध्यापिकाया: मोनिकाठाकुराया: सान्निध्ये योगदिवस: आचरित:। यस्मिन् विद्यालयस्य शारीरिकशिक्षक: दिनेशकुमार: विविधान् योगासनान् कारितवान् तथा च शिक्षिका अंजलिशर्मा प्राणायामस्य विविधान् विधीन् कारितवती। विद्यालयस्य संस्कृतशिक्षक: डॉ. मनोज शैल: योगस्य महत्वं जीवने उपादेयता च इति प्रतिपादितवान्। मुख्याध्यापिका मोनिका ठाकुर अवदत् यत् वर्तमाने परिप्रेक्ष्ये स्वस्थजीवनाय योगस्य व्यायामस्य च अत्यावश्यकता वर्तते। यथा जीवितुं भोजनम् आवश्यकं तथैव स्वस्थरूपेण जीवितु़ं योग: आवश्यक:। केवलं योगदिवसे एव योगाभ्यास: मा भवेत् अपितु अस्मिकं दैनंदिनजीवने योगस्य समावेश: स्यात्। तदैव सर्वे भवन्तु सुखिन: सर्वे सन्तु निरामया:….. वाक्यमिदं सार्थकं भविष्यति। योगसत्रानन्तरं छात्रै: योगस्य महत्वमभिलक्ष्य विविधानि स्फोरकपत्राणि अपि निर्मितानि।
