Himachal News : काजा-प्रकरणे काङ्ग्रेसदलं दोषी- डॉ. राजीवबिंदल:
हिमसंस्कृतवार्ता- सोलनम्।
काजायां या घटना घटिता सा न केवलं निन्दनीया, अपितु राज्यस्य काङ्ग्रेससर्वकारस्य, काङ्ग्रेसपक्षस्य च सुनियोजितं षड्यंत्रम् अपि अस्ति। यथा सर्वकारस्य भ्रष्टतत्वानि भाजपा-प्रत्याशिनां विपक्षनेतृणां च उपरि आक्रमणं कृतवन्तः, तथैव स्पष्टं भवति यत् काङ्ग्रेसदलं भीतम् उत्तेजितं च अस्ति, निर्वाचनं जेतुम् अपि कस्मिन् अपि स्तरे गन्तुं शक्नोति। भाजपा प्रदेशाध्यक्ष डॉ. राजीवबिन्दल: इत्यनेन सोमवासरे सोलननगरे आयोजिते पत्रकारसम्मेलने एते आरोपाः कृताः। तस्य विषये राज्यनिर्वाचन- आयोगाय अपि उपालम्भ: करिष्यते इति सः अवदत्। डॉ. बिन्दलः आरोपितवान् यत् एतत् सर्वं ज्ञात्वा कृतम्, परिणामः च यत् भयम् आसीत् तत् एव। काङ्ग्रेसजनाः कृष्णध्वजान् वहन्तः मार्गे उपविष्टाः, विपक्षनेत्रा सहितं उभयो: प्रत्याशिनो: उपरि आक्रमणं कृतवन्तौ। अस्याम् अव्यवस्थायां युवमोर्चा-कार्यकर्तुः पादः अपि भग्नः अभवत् ।
भाजपाप्रदेशाध्यक्षः अवदत् यत् यदि अस्मिन् आक्रमणे भाजपा-युवामोर्चा-कार्यकर्तृभिः एते नेतारः ततः न निष्कासिताः स्यु: तर्हि दुर्घटना अपि बृहत्तरा भवितुम् अर्हति स्म। अस्याः घटनायाः कारणात् निर्वाचन- आयोगस्य भूमिकायाः विषये प्रश्नाः उत्थापिताः सन्ति, राज्ये स्वतन्त्रं निष्पक्षं च निर्वाचनं विषये प्रश्नचिह्नानि अपि उत्थापितानि सन्ति। सः अवदत् यत् एतस्य विषये प्राथमिकी कृता, राज्यनिर्वाचन-आयोगस्य समक्षं च उपालंभ अपि क्रियते।
नाहने मण्ड्यां च भविष्यन्ति प्रधानमंत्रिण: मोदिन: विशाला: जनसभा:
भाजपाप्रदेशाध्यक्षः अवदत् यत् प्रधानमन्त्री नरेन्द्रमोदी मई २४ दिनाङ्के राज्यस्य भ्रमणं करोति। अस्मिन् काले सः द्वयोः स्थानयोः विशाला: जनसभाः सम्बोधयिष्यति। सः अवदत् यत् तस्य प्रथमा सभा मण्डलस्य सिरमौरस्य ऐतिहासिके चौगान-प्राङ्गणे प्रातः ९ वादने भविष्यति। तस्मिन् एव काले तस्य द्वितीया सभा मण्डीनगरस्य पड्डलभूमौ प्रातः ११:३० वादने भविष्यति। एतासां सभानाम् अनन्तरं प्रधानमंत्री मोदी पञ्जाबं प्रति प्रस्थास्यति।
