बे टैमा इत वैद मरै
चाल कुचाला टट्टू ।
घर घर हण्डदी नार मरै
मर्द मरै मन खट्टू।।
दुनियादारी छड्डदी नीं न
छड्डदा कम्बऴू पट्टू।
मर्द मरै सैह् ऐबी मितरो
जे नारां पर लट्टू।।
हाड़ी रानी सीस न दिन्दी
रैहन्दी मितरो जींदी।
मर्द खरा जे हुन्दा मीरा
ज़ह्र कदी नीं पींदी।।
पैंट पलाजो सस्सू पांदियां
नुंहआं पांदियां निक्करां।
अया ज़माना नौंआं मितरो
छड्डा सबना फिकरां ।।
फटियां जीनां ऊचियां टाॅपां
चाॅएं चाॅएं लांदियां।
पर्स लई ने हत्थ मुबाइल
हट्ट बजारां जांदियां।
चादरुआं दी लोड़ कुजो ए
हुण नंगे मुण्ड भी होए।
वर्ण शंकर जम्में जद वी
पितृ सुरगे दे रोए ।।
रुआज असां दे मुक्के मितरो
चुन्नी कैजो चढ़ाणी।
पढ़ियां लिखियां आईयां नुंहआं
सिगरेट बीयर उड़ाणी ।।
जे पींदी न सास्सू मितरो
तिसकी दकियानूसी बोलण।
कुसदा कितणा लैवल अज सै
ब्हिस्की पींदेयां तोलण ।।
लाज सरम सब मुक्के इत्थू
धीयां दर दर भोंदियां।
बापू नक्के देई नीं सकदे
अम्मड़ियां वी रोंदियां।।
कोई सराबी होईंयां मितरो
अज चिट्टे चोऴुआं मण्डी।
रिश्ते किंह्यां तोपण भाऊ
छानणियां। ने छण्डी।।
जीवन दे सब मुल्ल गुआचे
दीन धर्म अज मुक्के।
संस्कारां दी जऴदी होऴी
माहणु अंबरे ऊपर थुक्के।।
शक्ति चन्द राणा ‘शक्ति’
