सक्षमाय, उत्तरदायित्वपूर्णाय, नियमानुकूलाय च प्रशासनाय अधिकारिणां प्राप्तं नवीनं ‘सखित्वम्’

सक्षमाय, उत्तरदायित्वपूर्णाय, नियमानुकूलाय च प्रशासनाय अधिकारिणां प्राप्तं नवीनं ‘सखित्वम्’
हिमसंस्कृतवार्ता, राघवनाथ झा।​पाटलिपुत्रम्, २ जूनमासः (ज्येष्ठकृष्णद्वितीया, २०८३ विक्रमीयः)। बिहारसर्वकारस्य सामान्यप्रशासनविभागस्य मुख्यजाञ्चायुक्त-निदेशालयेन प्रकाशितायाः ‘अखिलभारतीयसेवाऽधिकारिणाम् अनिवार्यसहचरः’ इति पुस्तकस्य विमोचनं मङ्गलवासरे मुख्यसचिवालयस्य सभाकक्षे आयोजित-कार्यक्रमे राज्यस्य मुख्यसचिवेन प्रत्यय-अमृतमहोदयेन कृतम्। अस्मिन् अवसरे भारतीयप्रशासनिकसेवायाः अनेके वरिष्ठाः अधिकारिणः उपस्थिताः आसन्। ​कार्यक्रमस्य शुभारम्भः सामान्यप्रशासनविभागस्य अपरमुख्यसचिवस्य बी. राजेन्द्रमहोदयस्य स्वागतभाषणेन अभवत्। ततः परं महानिदेशक-सह-मुख्यजाञ्चायुक्तः दीपककुमारसिंहः पुस्तकस्य परिचयं ददत् तस्याः उद्देश्यं उपयोगितां च प्राकाशयत्।
​तेन प्रतिपादितं यत् एषा पुस्तिका अखिलभारतीयसेवाक्षेत्रे नवयुक्तानां सेवारतानां च अधिकारिणां प्रशिक्षणाय, क्षमतावर्धनार्थं, तथा च अनुशासनिकप्रक्रियाणां प्रभावी-सञ्चालनाय विशेषरूपेण सज्जीकृता अस्ति। अस्यां पुस्तिकायां लोकसेवा-सम्बद्धाः संविधानानुशासनानि, अखिलभारतीयसेवा (अनुशासनं तथा च पुनर्याचना) नियमावली-१९६९ (एकोनसप्तत्युत्तर-एकोनविंशतिशततमीयवर्षीया), अखिलभारतीयसेवा (आचरण) नियमावली-१९६८ (अष्टषष्ट्युत्तर-एकोनविंशतिशततमीयवर्षीया), अभियोजन-स्वीकृति-सम्बद्धाः नियमाः, एकवातायनप्रणाल्याः अन्तर्गतं पुनर्याचना-पुनरीक्षणादिभिः सम्बद्धाः नवीनाः परिपत्राः, प्रमुखाः न्यायिकनिर्णयाः च संकलिताः सन्ति।​मुख्यसचिवः प्रत्यय-अमृतः पुस्तकस्य विमोचनं कुर्वन् इमां प्रशासनिक-अधिकारिणां कृते एकं महत्त्वपूर्णं सन्दर्भग्रन्थं न्यरूपयत्। तेन उक्तं यत् एषः सङ्ग्रहः अधिकारिणां सेवाधर्माणां, अनुशासनिकप्रक्रियाणां, प्रशासनिकनिर्णयानां च अवबोधने महदाधारः भविष्यति। मुख्यजाञ्चायुक्त-निदेशालयस्य दलस्य कार्याणां प्रशंसां कुर्वन् सः अवदत् यत्—अयं प्रयासः दस्तावेजीकरणस्य, प्रशिक्षणस्य, क्षमतानिर्माणस्य च दिशि अतीव उपयोगी अस्ति, तथा च आगामि-प्रशासनिक-पीढ्यै मार्गदर्शकः सिद्धो भविष्यति।
​कार्यक्रमस्य अन्ते सामान्यप्रशासनविभागस्य सचिवः मोहम्मद-सोहेलमहोदयः धन्यवादज्ञापनम् अकरोत्। तेन पुस्तकप्रकाशनं प्रशासनिकक्षमतावर्धनस्य क्षेत्रे एकं महत्त्वपूर्णं सोपानं प्रतिपादितम्।
​अस्मिन् माङ्गलिके अवसरे आरक्षिमहानिदेशकः विनयकुमारः, विकासआयुक्तः मिहिरकुमारसिंहः, प्रधानमुख्यवनसंरक्षकः अरविन्दरसिंहः इत्यादयः राज्यस्य अनेके मूर्धन्याः अधिकारिणः समुपस्थिताः आसन्।