रामटेके भरतमुनि-ललितकला-केन्द्रेण गायन-प्रतियोगितायाः सफलं आयोजनम्

रामटेके भरतमुनि-ललितकला-केन्द्रेण गायन-प्रतियोगितायाः सफलं आयोजनम्
हिमसंस्कृतवार्ता: – डॉ रेणुका बोकारे,रामटेकम्।
कविकुलगुरुकालिदाससंस्कृतविश्वविद्यालयस्य ‘भरतमुनि-ललितकला-केन्द्रस्य’ तत्त्वावधाने एका भव्या गायन-प्रतियोगिता साफल्येन आयोजिता। अस्यां प्रतियोगितायां रामटेक-नगरस्य समीपवर्ति-क्षेत्राणां च विविधेभ्यः विद्यालयेभ्यः प्रायः षष्टिः (६०) लघु-बालकाः सोत्साहं भागं गृहीतवन्तः।
एषः कार्यक्रमः माननीय-कुलगुरूणां प्रो. अतुल-वैद्य-महोदयानां दिव्य-प्रेरणया सम्पन्नः अभवत्। कार्यक्रमस्य मुख्यातिथि-रूपेण प्रो. ललिता-चन्द्राते-जोशी महोदया उपस्थिता आसीत्। विशिष्टातिथिरूपेण कुलसचिवः डॉ. रोशन-आलोने, वित्ताधिकारी श्री-विजयेंद्र-पाण्डेयः, पुस्तकालयाध्यक्षः डॉ. दीपक-कापडे च गौरवमयीं उपस्थितिं दर्जितवन्तः।
सर्वैः अतिथिभिः दीपप्रज्ज्वलनं कृत्वा कार्यक्रमस्य विधिवत् शुभारम्भः कृतः। प्रतियोगितायां श्रेष्ठ-प्रदर्शनं कृतवद्भ्यः प्रथम-द्वितीय-तृतीय-चतुर्थ-पञ्चम-स्थानं प्राप्तवद्भ्यः छात्रेभ्यः विद्यापीठस्य पक्षतः नकद-धनराशिः गौरव-प्रमाणपत्राणि च प्रदाय पुरस्कृतं कृतम्। अस्मिन् अवसरे भरतमुनि-ललितकला-केन्द्रस्य सञ्चालकः डॉ. अनिल-कुमार-दुबे महोदयः निर्णायक-मण्डले उपस्थितः आसीत्।सञ्चालकेन सूचितं यत् २०१९ तमे वर्षे केन्द्रस्य स्थापनानन्तरं विश्वविद्यालयः निरन्तरं सृजनात्मक-गतिविधीनां सञ्चालनं करोति। सः अवदत् यत् कविकुलगुरुकालिदाससंस्कृतविश्वविद्यालयः स्वकीयेभ्यः सांस्कृतिक-कार्यक्रमेभ्यः सम्पूर्णदेशे विश्रुतं स्थानं धारयति। अधुना यावत् अस्य केन्द्रस्य माध्यमेन प्रायः ४५० छात्रेभ्यः सङ्गीतस्य (गायनस्य) प्रशिक्षणं दत्तं वर्तते।