शिमला-शीतोत्सवस्य आरम्भः महानाट्यां २०६ महिलाः एकत्र नृत्यं कृतवत्यः

शिमला-शीतोत्सवस्य आरम्भः महानाट्यां २०६ महिलाः एकत्र नृत्यं कृतवत्यः, भव्या सांस्कृतिकी शोभायात्रा अपि निर्गता
हिमसंस्कृतवार्ता:- डॉ. पद्मनाभ:, शिमला ।हिमाचलप्रदेशस्य राजधानी शिमलानगरे मालमार्गे बुधवासरे अपराह्ने शीतोत्सवस्य (विंटर कार्निवल) शुभारम्भः महानाट्या तथा सांस्कृतिक-शोभायात्रया कृतः। महिला-शिशु-विकास-विभागेन आयोजितायां अस्यां महानाट्यां द्वयोः खण्डयोः २०६ महिलाः एकत्र नाट्ये लीलया नृत्यं कृतवत्यः। शिमला- नगरीयखण्डात् ८६ महिलाः, मशोबरा-खण्डात् १२० महिलाः अत्र सम्मिलिताः। सर्वाः महिलाः पारम्परिक- वस्त्राणि रेजटा, धाटू च धारयित्वा हिमाचलस्य संस्कृतिं प्रदर्शितवत्यः। अस्मिन् अवसरे स्थानीयजनाः पर्यटकाः चापि उत्साहेन नाटीनृत्ये भागं गृहीतवन्तः।शोभायात्रायां प्रदेशस्य द्वादश-जनपदेभ्यः आगतानि सांस्कृतिकदलानि स्व-स्व-लोकपरम्पराः वेशभूषाः च प्रदर्शयन्तः प्रस्तुतिं कृतवन्तः। तत्र पारम्परिकं ठोडानृत्यं दर्शकानां महतीं प्रशंसां अलभत्। नवदिनपर्यन्तं प्रचलति। अस्मिन् भव्य-उत्सवे देशस्य प्रदेशस्य च ७० कलाकाराः स्व-स्व-प्रस्तुतिभिः सहभागं करिष्यन्ति। संगीत-नृत्य-लोकसंस्कृतेः एषः संगमः द्रष्टुं बहवः पर्यटकाः शिमलां प्राप्तवन्तः। मुख्यमन्त्री सुखविन्द्रसिंहसुक्खूः मुख्यातिथिरूपेण उपस्थितः अभवत् तथा हरितध्वजं दर्शयित्वा शोभायात्रां प्रस्थितवान्। पाण्डालस्य चतुर्दिक्षु अवरोधकाः स्थापयित्वा सुरक्षाव्यवस्था कृताऽस्ति।प्रथमा “स्टार-नाइट” बुधवासरे आयोजिता, यस्यां प्रसिद्धः पञ्जाबीगायकः रोहनप्रीतः सिंहः रात्रौ ८:३० तः १०:०० पर्यन्तं प्रस्तुति: अददत्। तस्मात् पूर्वं रात्रौ ८:१० तः ८:३० पर्यन्तं पञ्जाबी-गायिका पूजा पण्डिता प्रस्तुति: करिष्यति। तत्र पारम्परिक-महानाट्यस्य आयोजनम् अपि भविष्यति, यत्र स्थानीय-जनाः कलाकाराश्च एकत्र नृत्यं कृत्वा हिमाचली-संस्कृतेः दृश्यं प्रदर्शयिष्यन्ति।नगर-निगमस्य महापौरः सुरेन्द्रः चौहानः अवदत् यत् एषः उत्सवः प्रदेशस्य सांस्कृतिक-एकतां विरासतां च दर्शयितुं प्रमुखम् आकर्षणम् भविष्यति। अस्मात् पूर्वं रिज-मैदाने सायं पञ्चवादने सांस्कृतिक-सन्ध्या आरभ्यते, यस्यां सूफी, पहाड़ी, कांगड़ी तथा पञ्जाबी कलाकाराः स्व-स्व-प्रस्तुतिभिः वातावरणं रमणीयं करिष्यन्ति।
बालकानां कृते विशेषव्यवस्था
शीतोत्सवे अस्मिन् वर्षे बालकानां कृते विशेष-व्यवस्था कृताऽस्ति। रानीझांसी उद्याने बालकानां कृते क्रीडनकरेलयानं स्थापितम् अस्ति, यत्र बालकाः रेलयान-यात्रायाः आनन्दं लभन्ते। महापौरः सुरेन्द्रः चौहानः अपि अवदत् यत् अत्र महिलानां कृते विक्रयस्थलानि (स्टॉल) स्थापितानि सन्ति, यत्र पर्यटकाः आगत्य सीड्डू, मालपुए अन्यानि वस्तूनि च क्रेतुं शक्नुवन्ति। अतः परं रिज-प्राङ्गणे खाद्य- वस्त्र- आदि- विक्रयस्थलेषु अपि जनानां महान् सम्मर्द: दृश्यते।