द्विवर्षेभ्यः न्यूनेभ्यः बालकेभ्यः कास-शीत-द्रव्यौषधं न दातव्यम्-स्वास्थ्यसेवामहानिदेशालयः

द्विवर्षेभ्यः न्यूनेभ्यः बालकेभ्यः कास-शीत-द्रव्यौषधं न दातव्यम्-स्वास्थ्यसेवामहानिदेशालयः
हिमसंस्कृतवार्ताः। मध्यप्रदेशे राजस्थाने च प्रतिबन्धितकासौषधस्य सेवनं कृत्वा बालकानां मृत्योः अनन्तरं केन्द्रसर्वकारेण निर्देशाः अधिसूचिताः। द्विवर्षेभ्यः न्यूनेभ्यः बालकेभ्यः कास-शीत-द्रव्यौषधं न दातव्यम् इति सर्वकारेण उक्तम् । स्वास्थ्यसेवामहानिदेशालयेन बालरोगिषु कासौषधस्य उपयोगविषये निर्देशपत्रम् अधिसूचितम्। सामान्यतया पञ्चवर्षेभ्यः न्यूनानां बालकानां कृते ते न शस्यन्ते । कस्यापि औषधस्य उपयोगाय सावधानीपूर्वकं नैदानिकमूल्यांकनं, निकटनिरीक्षणं, समुचितमात्रायाः कठोरपालनं, न्यूनतमप्रभावी अवधिः, बहुविधौषधसंयोजनानां परिहारः च आवश्यकाः भवन्ति अपि च, निर्धारितौषधानां पालनविषये जनसमूहं शिक्षितं कर्तुं शक्यते । मध्यप्रदेशे राजस्थाने च प्रतिबन्धितौषधस्य सेवनं कृत्वा आहत्य ११ बालकाः मृताः। तेषु मध्यप्रदेशस्य छिन्द्वरामण्डले मृतानां संख्या नव अभवत् । परन्तु प्रारम्भिक अन्वेषणेन औषधस्य प्रतिरूपेकेषु DEG अथवा EG इत्यस्य लेशाः न प्राप्ताः, ये वृक्कं प्रभावितं कर्तुं शक्नुवन्ति।
कासौषधस्य प्रतिरूपकेषु हानिकारकं रसायनं नास्ति
नई दिल्ली। मध्यप्रदेशे राजस्थाने च बालकानां मृत्योः कासस्यऔधधेन सह सम्बद्धानां प्रतिवेदनानां विषये स्वास्थ्यपरिवारकल्याणमन्त्रालयेन स्पष्टीकरणं कृतम्। मन्त्रालयेन स्पष्टीकृतं यत् एनसीडीसी, एनआईवी, सीडीएससीओ इत्यादीनां विविधसंस्थानां संयुक्तदलेन स्थलं गत्वा औषधस्य, रक्तस्य प्रतिरूपकानि एकत्रितानि। मध्यप्रदेशराज्यस्य खाद्य-औषधप्रशासनेन अपि त्रीणां प्रतिरूपकाणां परीक्षणं कृतम्, ये डाइथिलीनग्लाइकोल् अथवा एथिलीनग्लाइकोल् मुक्ताः इति ज्ञातम्। इदानीं एनआईवी, पुणे इत्यस्य अन्वेषणेन एकस्मिन् प्रकरणे लेप्टोस्पायरोसिस् संक्रमणस्य पुष्टिः अभवत् । स्वास्थ्यमन्त्रालयेन उक्तं यत् जलस्य, मशकानां इत्यादीनां वाहकानां, श्वसनमार्गस्य च प्रतिरूपकाणां परीक्षणं प्रचलति।