जेडी-वेंसः चतुर्दिवसीय यात्रायां भारतं सम्प्राप्तः। सायं प्रधानमन्त्रिणा मोदिना साकमपि मेलनं जातम्

जेडी-वेंसः चतुर्दिवसीय यात्रायां भारतं सम्प्राप्तः। सायं प्रधानमन्त्रिणा मोदिना साकमपि मेलनं जातम्
हिमसंस्कृतवार्ता: – अमेरिकीयः उपराष्ट्रपतिः जे. डी. वेंसः गतदिवसे नवदेहलीं प्राप्तः। चतुर्दिवसीय-भारत-यात्रायाम् आगतस्य अमेरिकीय-उपराष्ट्रपतेः जे. डी. वेंस इत्यस्य स्वागतसत्कारं सूचना-प्रसारण-मन्त्री अश्विनी वैष्णवः कृतवान्। अवधेयमस्ति यद् उपराष्ट्रपतेः वेंसस्य एषा प्रथमा भारत-यात्रा वर्तते। देहलीम् आगत्य अमेरिकायाः उपराष्ट्रपतिः जेडी वेंसः, तत्रत्या द्वितीया महिला च उषा वेंसः सपरिवारं अक्षरधाम मन्दिरं गत्वा अक्षर-पुरुषोत्तम-भगवतः पुण्यदर्शनं कृतवन्तः । अथ च सांयकाले असौ प्रधानमन्त्रिणा नरेन्द्रमोदिना साकं सम्भाषणम् कृतवान् । अमेरिकीय-उपराष्ट्रपतेः जे डी वेंसस्य भारत-यात्रा देश-द्वयस्य द्वै-पाक्षिक-सम्बन्धानां प्रगतेः समीक्षायाः, किञ्च अस्मिन् वर्षे फरवरीमासस्य त्रयोदश्यां प्रधानमन्त्रिणः नरेन्द्र-मोदिनः अमेरिका-यात्रायाः अवसरे प्रख्यापितस्य भारत-अमेरिका-संयुक्त-वक्तव्यस्य परिणामानां कार्यान्वयनस्य च कृते अवसरं प्रदास्यति। उभावपि पक्षौ परस्परं हितानां क्षेत्रीय-विकासेषु वैश्विक विकासेषु च विचार-विनिमयमपि अकुरुताम् । प्रधानमन्त्री मोदी, अमेरिकीय उपराष्ट्रपतिः वैन्स् च ऊर्जा, रक्षा, रणनीतिक प्रौद्योगिक्याः च सहकार्यं वर्धयितुं सततं प्रयत्नानाम् चर्चां कृतवन्तौ। भारत-अमेरिका-द्विपक्षीयव्यापारसन्धेः प्रगतेः स्वागतम् अपि प्रधानमन्त्री मोदी, वैन्स् च कृतवन्तौ । ततः पूर्वं जेडी वैन्सः प्रधानमन्त्रिणः निवासस्थानं प्राप्य तस्य साक्षात्कारं कृतवान् । अस्मिन् काले वैन्सस्य परिवारः तस्य समीपे आसीत् ।