पतञ्जलौ बालेभ्यः प्राप्यमाणाः संस्काराः कस्यचित् स्वप्नस्य साकाररूपम् इव – प्रदीप-बत्रा
हिमसंस्कृतवार्ता — डॉ मनोजशैल:, हरिद्वारम्।
पतञ्जलिविश्वविद्यालये आयोजितं त्रिदिवसीयं द्विपञ्चाशत्तमम् (५२) अखिलभारतीय-प्राच्यविद्या-सम्मेलनम् (AIOC) ऐतिहासिक-उपलब्धिभिः व्यापकसहभागितया च सह सम्पन्नम् अभवत्। पतञ्जलिविश्वविद्यालयस्य, केन्द्रीयसंस्कृतविश्वविद्यालयस्य, भारतीयविद्वत्परिषदश्च संयुक्ताश्रये आयोजितेऽस्मिन् राष्ट्रियसम्मेलने भारतीयज्ञानपरम्परायाः, संस्कृतभाषायाः, योगस्य, आयुर्वेदस्य, भारतीयदर्शनस्य, सनातनसंस्कृतेः, प्राच्यविद्यानां च संरक्षणे, संवर्धने, आधुनिकशिक्षाव्यवस्थायां तेषां समावेशे च व्यापकः विमर्शः सञ्जातः।
समापनसमारोहे प्रदेशसर्वकारस्य मन्त्रिमण्डलीय-मन्त्री (कैबिनेट-मन्त्री) प्रदीप-बत्रा, योगगुरुः स्वामी रामदेवः, आचार्यः बालकृष्णश्च सहिताः समग्रदेशात् समागताः सन्ताः, धर्माचार्याः, शिक्षाविदः, विद्वांसश्च उपस्थिताः आसन्। अस्मिन् अवसरे चतुर्विंशति-विद्वद्भिः शोधकर्तृभिश्च सह उल्लेखनीयं योगदानं दत्तवत्यः विभूतयः सम्मानिताः, पञ्चत्रिंशत् (३५) पुस्तकानि च विमोचितानि।
अखिलभारतीय-प्राच्यविद्या-सम्मेलनस्य अध्यक्षैः श्रीनिवास-वरखेडी-महोदयैः परमपूज्येभ्यः स्वामि-महाराजेभ्यः ‘विद्याधिपति-प्रशस्ति-पत्रम्’ समर्प्य सम्मानः कृतः। संस्कृतस्य, योगशास्त्रस्य, आयुर्वेदस्य, भारतीयज्ञानपरम्परायाश्च संरक्षणे संवर्धने च उल्लेखनीय-योगदानाय आचार्य-बालकृष्णः ‘महामहोपाध्यायः’ इति प्रतिष्ठितया उपाधिना विभूषितः। पतञ्जलिविश्वविद्यालयस्य प्रतिकुलपतिः साध्वी डॉ. देवप्रिया ‘महाचार्या’-सम्मानेन अलङ्कृता। व्याकरणक्षेत्रे विशिष्टवैदुष्याय योगदानाय च डॉ. शिवानी-महोदयायै ‘व्याकरण-पण्डिता-पुरस्कारः’ प्रदत्तः। अपरत्र डॉ. कविता-होले-महोदया तस्याः पाण्डित्याय विशेषज्ञतायै च सम्मानिता। विविधविषयवर्गेषु उत्कृष्टाणि शोधपत्राणि उपस्थापितवद्भ्यः चतुर्विंशतिभ्यः विद्वद्भ्यः शोधकर्तृभ्यश्च ‘सर्वश्रेष्ठ-शोधपत्र-पुरस्काराः’ वितरिताः। अखिलभारतीय-प्राच्यविद्या-सम्मेलनस्य नवनियुक्ताध्यक्षत्वेन प्रो. अरुणरञ्जनमिश्र-महोदयः मनोनीतः। सम्मेलने अखिलभारतीय-प्राच्यविद्या-सम्मेलनस्य नवनियुक्ताध्यक्षं प्रो. अरुणरञ्जनमिश्रं समाविश्य विविधानां विदुषां पदाधिकारिणां चापि अभिनन्दनं विहितम्। संस्कृतविद्वान् कविराजः मनोहरलाल-आर्य-महोदयः अपि सम्मानितः। अस्मिन् अवसरे संस्कृतभाषायाः, भारतीयशास्त्राणां, सनातनपरम्परायाश्च संरक्षणे संवर्धने च मनीषिणां भूमिका महत्त्वपूर्णा इति प्रतिपादिता।
सम्मेलनस्य समापनकाले मुख्यातिथिः प्रदेशसर्वकारस्य मन्त्रिमण्डलीय-मन्त्री प्रदीप-बत्रा अवदत् यत् सः गतेभ्यः बहुभ्यः वर्षेभ्यः पतञ्जलिना सह संयुक्तः अस्ति। पतञ्जलेः विचारधारां, कार्यशैलीं, तत्र च जायमानानि विकासकार्याणि दृष्ट्वा सः अतीव प्रसन्नतां गौरवानुभूतिं च करोति। सः अवदत् यत् अत्र बालेभ्यः यादृशी शिक्षा संस्काराश्च दीयन्ते, तत् कस्यचित् स्वप्नस्य साकारभवनम् इव अस्ति। तस्येयम् इच्छा वर्तते यत् देशस्य अन्ये जनाः संस्थानानि च इमम् आदर्शम् अङ्गीकुर्युः, इतश्च प्रेरणां गृह्णीयुः। सः अकथयत् यद् अस्माभिः मिलित्वा सनातनधर्मं, वैदिकपरम्पराः, भारतस्य च गौरवपूर्णम् इतिहासं संस्कृतिं च अधिकाधिकं प्रखरं विधातव्यम्।
अस्मिन् अवसरे परमपूज्य-स्वामि-महाराजेन पतञ्जलिपरिवारस्य अभिन्नसदस्याय तथा च सम्मेलनस्य मुख्यसंयोजकाय श्री-ललित-पोफलिया-महोदयाय, तस्य सुपुत्राय श्री-हर्षद-पोफलिया-महोदयाय, सहसंयोजकाय श्रीकान्त-बडवे-महोदयाय, श्री-राहुल-राठी-महोदयाय च कृतज्ञता ज्ञापिता।
प्रतिकुलपतिना साध्वी डॉ. आचार्या-देवप्रिया-महोदयया मानविकीसङ्कायाध्यक्षाणां प्रो. मयङ्क-अग्रवाल-महोदयानां, दूरस्थशिक्षाविभागस्य निदेशकानां प्रो. सत्येन्द्र-मित्तल-महोदयानां, कुलसचिवानां डॉ. ऋत्विक-सहाय-बिसारिया-महोदयानां, विज्ञानसङ्कायाध्यक्षाणां डॉ. ए.के. सिंह-महोदयानां, उपकुलसचिवानां डॉ. निर्विकार-महोदयानां च सहितानां सर्वेषां शिक्षकाणां, विभागाध्यक्षाणां, सङ्कायसदस्यानां, कार्यक्रमसमन्वयकानां, कर्मचारिणाम्, आयोजनसमितीनां, छात्राणां च प्रति कृतज्ञता प्रकटिता। विशेषरूपेण तेषां शिक्षकसमन्वयकानां छात्राणां च भूरिशः प्रशंसा कृता, यैः अहोरात्रं परिश्रमं कुर्वद्भिः अतिथिसत्कारस्य, पञ्जीकरणस्य, शैक्षणिकसत्राणां, शोधपत्रप्रस्तुतीकरणस्य, आवासस्य, भोजनस्य, मञ्चसञ्चालनस्य, तान्त्रिकव्यवस्थायाः (तकनीकी), सांस्कृतिककार्यक्रमाणां च सहितस्य प्रत्येकदायित्वस्य पूर्णया निष्ठया निर्वहणं विहितम्।
विश्वविद्यालयपरिवारेण निगदितं यद् अस्य ऐतिहासिकस्य आयोजनस्य साफल्यं प्रत्येकशिक्षकस्य, समन्वयकस्य, छात्रस्य च सामूहिकप्रयासस्य, समर्पणस्य, निःस्वार्थसेवाभावस्य च सुखदः परिणामः अस्ति।
