उद्घाटित: हणोगी-आन्तर्भौमिकमार्ग:(टनल); चण्डीगढ़-मनाली-चतुष्पथ-मार्गे आरब्धः रोमाञ्चकारी प्रवासः
हिमसंस्कृतवार्ता — मण्डी।
चण्डीगढ़-मनाली-चतुष्पथ-राजमार्गे हणोगी-स्थानात् डयोड-पर्यन्तं सुखदः प्रवासः प्रारब्धः। शुक्रवासरे हणोगी-तः दवाडा-पर्यन्तं आन्तर्भौमिकमार्गस्य (Tunnel) संस्कार-कार्यं (Repair) सम्पन्नं जातम्, येन सहैव सप्तशत-मीटर् (७०० मीटर्) परिमित: आन्तर्भौमिकमार्ग: अपि यातायातार्थं मुक्त: कृत:। आन्तर्भौमिकमार्ग: एकांशतः उद्घाटित:, यस्मिन् मार्गेण उभयतः वाहनानाम् आवागमनम् आरब्धम्। उल्लेखनीयं यत् चण्डीगढ़-मनाली-चतुष्पथ-परियोजनायां पण्डोह-तः औट-पर्यन्तं विदीर्यमाणानां पर्वतानां पाषाण-पतनस्य च सङ्कटात् त्राणाय टनल-द्वयं निर्मितम् अस्ति।
डयोड-तः हणोगी-पर्यन्तं आन्तर्भौमिकमार्ग: पूर्वमेव सज्जीकृत: आसीत्, किन्तु हणोगी-समीपे पर्वतानां निरन्तर-स्खलन-कारणात् एतेसां आन्तर्भौमिकमार्गाणां अन्तः यातायात-सञ्चालनं न सम्भवति स्म। साम्प्रतं संस्कार-कार्ये पूर्णे सति आन्तर्भौमिकमार्गस्य सञ्चालनम् आरब्धम्। डयोड-तः हणोगी-पर्यन्तं निर्मितस्य आन्तर्भौमिकमार्गस्य पुनर्निर्माणाय राष्ट्रिय-राजमार्ग-प्राधिकरणेन (NHAI) पञ्चाशत्-कोटि-रूप्यकाणाम् (५० कोटि) अतिरिक्त-धनराशिः स्वीकृता आसीत्।
शापूरजी-पल्लोनजी-चतुष्पथ-निर्माण-संस्थायाः दल-प्रमुखेण आदर्श-पनहोत्रा-महोदयेन शुक्रवासरे विधिवत् पूजा-अर्चनं कृत्वा आन्तर्भौमिकमार्ग: उद्घाटित:। तेन आन्तर्भौमिकमार्ग: जन-सेवायै समर्पयितुं केन्द्रीय-मार्ग-परिवहन-मन्त्रिणः नितिन-गडकरी-महोदयस्य कृतज्ञता ज्ञापिता, धन्यवादश्च प्रकटितः।
