सिरमौरः- संस्कृतसप्ताहस्य सफलायोजनाय शास्त्रिणां च लम्बितानां समस्यानां समाधानाय शिक्षाधिकारिभिः सह अमिलत् संस्कृत- शिक्षक- परिषदः प्रतिनिधिमण्डलम् ।
हिमसंस्कृतवार्ता:- डॉ नरेन्द्रराणा सिरमौरः।
राजकीय- संस्कृत- शिक्षकपरिषदः सिरमौर- प्रतिनिधिमण्डलेन शिक्षाविभागस्य वरिष्ठैः अधिकारिभिः सह मेलनं कृत्वा संस्कृतशिक्षा- सम्बद्धैः विविधैः महत्त्वपूर्णविषयैः सह विस्तारेण विचारविमर्शः कृतः।
प्रतिनिधिमण्डलेन डॉ. मदनलालवर्येण (उपशिक्षानिदेशकः, उच्चशिक्षा, मण्डल- सिरमौरः), राजीवठाकुरवर्येण (उपशिक्षानिदेशकः, प्रारम्भिकशिक्षा, मण्डल- सिरमौरः) इत्येताभ्यां सह मेलनं कृत्वा मुख्यतया द्वौ महत्त्वपूर्णौ विषयौ प्रस्तुतौ।
१. प्रतिनिधिमण्डलेन अधिकारिभ्यः प्रार्थना कृता यत् २५ अगस्ततः ३१ अगस्तपर्यन्तं आयोज्यमानस्य संस्कृतसप्ताहस्य आयोजनं सिरमौरमण्डलस्य प्रत्येकस्मिन् विद्यालये प्रभाविरूपेण उत्साहपूर्वकं च भवेत्।
परिषदा उक्तं यत् संस्कृतं केवलं कश्चन विषयः नास्ति, अपि तु भारतस्य प्राचीनज्ञानपरम्परायाः, संस्कृतेः, साहित्यस्य, दर्शनस्य संस्काराणां च आधारभूता भाषा अस्ति। विद्यालयस्तरे संस्कृतसप्ताहस्य माध्यमेन छात्रेषु संस्कृतभाषां प्रति रुचिः, गौरवम्, आदरभावः च वर्धयितुं शक्यते। परिषदपक्षतः प्रार्थना कृता यत् मण्डलस्य सर्वेभ्यः विद्यालयेभ्यः संस्कृतसप्ताहस्य आयोजनाय आवश्यकदिशानिर्देशाः अवगच्छेयु:, विद्यालयेषु च संस्कृतेन सम्बद्धानां विविधानां रचनात्मक- गतिविधिनां सम्पादनं सुनिश्चितं भवेयु:।
२. प्रतिनिधिमण्डलेन सिरमौरमण्डले कार्यरतानां शास्त्रिणां न्यायालयीय-विभागीयस्तरेषु लम्बिताः विषयाः अपि अधिकारिणां समक्षं प्रमुखतया स्थापिताः। परिषदा निवेदितं यत् शास्त्रिणां प्रकरणाणि दीर्घकालात् लम्बितानि सन्ति, तेषां विषये विभागीयस्तरे आवश्यकीं कार्यवाहीम् कृत्वा नियमानुसारं शीघ्रातिशीघ्रं समाधानं क्रियेत, येन कर्मचारिणः अनावश्यककष्टानि न प्राप्नुयुः।
अधिकारिणः एतयोः द्वयोः विषययोः सकारात्मकं शीघ्रं च निर्णयं ग्रहीष्यन्ति इति आशा परिषदा व्यक्ता। अस्मिन् अवसरे राजकीय- संस्कृत- शिक्षकपरिषदः (मण्डल-सिरमौरः) अध्यक्षः आचार्य: देवेन्द्रशर्मा, उपाध्यक्षः धनवीरशास्त्री, परामर्शक: आचार्यराधेश्यामः, प्रतिनिधिः अमित शास्त्री च उपस्थिताः आसन्।
परिषदः अध्यक्षः आचार्य: देवेन्द्रशर्मा अवदत् यत् परिषदः उद्देश्यं संस्कृतभाषायाः संरक्षणेन संवर्धनेन सह संस्कृतशिक्षकाणां प्रश्नान् उचिते मञ्चे उपस्थापयितुम् अस्ति। तेन उक्तं यत् संस्कृतसप्ताहः केवलम् औपचारिकः कार्यक्रमः न भूत्वा छात्रान् समाजं च संस्कृतस्य गौरवपूर्णपरम्परया सह योजयितुं माध्यमः भवेत्।
अधिकारिभिः प्रतिनिधिमण्डलाय समयः प्रदत्तः, विषयाः च गम्भीरतया श्रुताः, एतदर्थं परिषदा तेषां कार्तज्ञ्यं कृतम्। सिरमौरमण्डलस्य सर्वेषु विद्यालयेषु संस्कृतसप्ताहः सफलः भविष्यति, लम्बितानां प्रकरणानां च शीघ्रं समाधानं भविष्यति इत्यपि आशा व्यक्ता।
