HP Vidhansabha Session – पुनः सम्मुखं सत्तापक्ष-विपक्षौ, विधानसभा-परिसरे परस्परं विरुद्धं कृतं प्रदर्शनम्
हिमसंस्कृतवार्ता — शिमला।
हिमाचलप्रदेश-विधानसभायाः प्रावृट्-सत्रस्य द्वितीये दिने सदनस्य आरम्भः दिवङ्गतेभ्यः पूर्व-विधायकेभ्यः शोक-संवेदना-प्रकटनेन सह अभवत्। अस्मिन् समये सर्वप्रथमं मुख्यमन्त्री सुखविन्दरसिंहसुक्खू-महोदयः, ततः विपक्षनेता जयरामठाकुरः, तदनन्तरं च मन्त्रिणः अन्ये विधायकाश्च दिवङ्गतेभ्यः पूर्व-विधायकेभ्यः स्व-श्रद्धाञ्जलिं प्राकटयन्।
अस्मात् पूर्वं सदनस्य द्वितीय-दिवसस्य कार्यविधे: प्रारम्भात् प्राक् सत्तापक्षः विपक्षश्च विधानसभा-परिसरे परस्परं सम्मुखम् आगतवन्तौ। मुख्यमन्त्रिणः सुक्खू-महोदयस्य अध्यक्षतायां काङ्ग्रेस-विधायक-दलेन हस्तेषु प्रसार-पट्टिकाः (तख्तिकाः) धृत्वा विधानसभा-परिसरे तीव्रं विरोध-प्रदर्शनं कृतम्।
अस्मिन् समये सत्तापक्षेण भारतीय-जनता-पक्षस्य (भाजपा) उपरि राष्ट्रगानस्य अपमानस्य आरोपः आरोपितः। अपरपक्षे भाजपा-विधायक-दलेन अपि विधानसभा-परिसरे हस्तेषु पट्टिकाः धृत्वा सर्वकारस्य विरुद्धं प्रदर्शनं विहितम्।
प्रदर्शन-काले भाजपा-विधायकैः पञ्चायती-राज-संस्थानां राजनैतिक-शोषणस्य तथा च अध्यक्ष-उपाध्यक्ष-पदयोः निर्वाचन-स्थगनस्य आरोपम् आरोप्य तीव्राः उद्घोषाः कृताः। एतस्मिन् विरोध-प्रदर्शने सत्तापक्षेण प्रश्नपत्र-स्तेयं लक्ष्यीकृत्य भाजपा-कार्यालयस्य विरुद्धम् अपि उद्घोषाः विहिताः।
