हिमाचलप्रदेश-उच्च-न्यायालयः पूरयिष्यति ३८८ पदानि, जानन्तु ‘ऑनलाइन’-आवेदनस्य अन्तिमां तिथिम्
हिमसंस्कृतवार्ता: — शिमला ।
हिमाचलप्रदेश-उच्च-न्यायालयः मण्डल-न्यायपालिकासु विविध-पदेषु नियुक्तये अधिसूचनां प्रसारितवान्। आहत्य ३८८ रिक्तताः पूरयितुं पात्र-अभ्यर्थिभ्यः ‘ऑनलाइन’-नियुक्ति-आवेदनम् आमन्त्रितम् अस्ति। आवदेनानि हिमाचलप्रदेश-उच्च-न्यायालयस्य ‘जालपुटम्’ https://highcourt.hp.gov.in/ इत्यस्याः ‘नियुक्तिपटल’-माध्यमेन कर्तुं शक्यन्ते। आवेदन-प्रक्रिया १० अगस्त-दिनाङ्कात् प्रारभ्य १० सितम्बर २०२६ दिनाङ्के रात्रौ ११:५९ वादने समाप्ता भविष्यति। अस्मिन् विषये उच्च-न्यायालयस्य पक्षतः नियुक्तये विज्ञप्तिः (Notice) प्रसारिता अस्ति।
कस्यां श्रेण्यां कति पदानि
एतेषु पदेषु ‘कोर्ट-मैनेजर’, लिपिकः (Clerk), ‘स्टेनोग्राफर’-तृतीय-श्रेणी, चालकः (Driver), ‘प्रोसेस-सर्वर’ तथा च भृत्यः/ऑर्डरली/द्वारपाल:/सफाई-कर्मचारी इत्येते सम्मिलिताः सन्ति। ‘कोर्ट-मैनेजर’-इत्यस्य पञ्च पदानि नियमित-आधारेण पूरयिष्यन्ते, येषां कृते वेतन-स्तर-१६ इत्यस्य अन्तर्गतं ४८,७०० तः १,५४,३०० रूप्यकाणां वेतनमानं निर्धारितम् अस्ति। लिपिकस्य १४१ पदानि सन्ति, येषु ८४ नियमित-आधारेण ५७ अनुबन्ध-आधारेण च पूरयिष्यन्ते। ‘स्टेनोग्राफर’-तृतीय-श्रेण्याः ७९ पदानि सन्ति, येषु ४८ नियमित-आधारेण ३१ अनुबन्ध-आधारेण च पूरयिष्यन्ते। चालकस्य नव पदानि (चत्वारि नियमित-आधारेण, पञ्च दैनिक-वेतन-भोगी) तथा च ‘प्रोसेस-सर्वर’-इत्यस्य ६५ पदानि (६१ नियमित-आधारेण, एकम् अनुबन्ध-आधारेण, त्रीणि दैनिक-वेतन-भोगी) सन्ति। भृत्यः/ऑर्डरली/द्वारपाल:/स्वच्छता-कर्मचारी इत्येतेषां ८९ पदानि सन्ति, येषु ६९ नियमित-आधारेण २० दैनिक-वेतन-भोगी-आधारेण च पूरयिष्यन्ते।
आवेदन-शुल्कं योग्यता च
आवेदन-शुल्कम् अनारक्षित-वर्गाय ४५० रूप्यकाणि आरक्षित-श्रेणीभ्यः ३०० रूप्यकाणि अस्ति। अभ्यर्थिभिः केवलम् ‘ऑनलाइन’-माध्यमेन एव आवेदनं करणीयम्। ‘कोर्ट-मैनेजर’-पदाय अभ्यर्थिनः पार्श्वे ‘एम.बी.ए.’-उपाधिना सह स्नातक-उपाधिः त्रयाणां वर्षाणाम् अनुभवश्च भवेत्। अस्य पदस्य कृते वयः-सीमा २५ तः ३५ वर्षाणि निर्धारिता अस्ति। लिपिकाय ‘स्टेनोग्राफर’-तृतीय-श्रेण्याश्च स्नातक-उपाधिः आवश्यकी अस्ति। लिपिकाय आङ्ग्लभाषायां ३० शब्दाः प्रतिनिमिषं (शब्द प्रति मिनट) हिन्दीभाषायां च २५ शब्दाः प्रतिनिमिषं ‘टाइपिंग’-गतिः अनिवार्या अस्ति। ‘स्टेनोग्राफर’-तृतीय-श्रेण्याः कृते आङ्ग्लभाषायाम् ८० शब्दाः प्रतिनिमिषं शीघ्रलिपिः (Shorthand) ४० शब्दाः प्रतिनिमिषं ‘टाइपिंग’-गतिः, हिन्दीभाषायां ३० शब्दाः प्रतिनिमिषं ‘टाइपिंग’-गतिः भवेत्। चालक-पदाय दशमी-कक्षा-उत्तीर्णता त्रयाणां वर्षाणां वैधः लघु-मोटर-यान-चालन-अनुज्ञापत्रम् (Driving License) अनिवार्यम् अस्ति। ‘प्रोसेस-सर्वर’ तथा च भृत्यः सदृशेभ्यः ‘डी’-वर्ग-पदेभ्यः द्वादशी-परीक्षा उत्तीर्णता भवेत्।
