काङ्गड़ा-जनपदस्य बोह-उपत्यकायां प्रभावितेभ्यः २५ परिवारेभ्यः गृह-निर्माणाय लप्स्यन्ते सार्ध-अष्ट-लक्ष-रूप्यकाणि
परिवारेभ्यः गृह-निर्माणाय सर्वकारीय-भूमिः उपलब्धा कारयिष्यते: – मुख्यमंत्री सुक्खुः
हिमसंस्कृतवार्ता: — काङ्गड़ा।
हिमाचलप्रदेश-सर्वकारस्य मुख्यमन्त्रिणा सुखविन्दरसिंहसुक्खुना रविवासरे काङ्गड़ा-जनपदस्य शाहपुर-क्षेत्रस्य बोह-क्षेत्रे मेघस्फोटस्य (बादल फटने) घटनया प्रभावितानां क्षेत्राणां प्रवासं कृत्वा आश्रय-पुनर्वास-कार्याणां निरीक्षणं कृतम्। अस्मिन् अवसरे तेन राजकीय-वरिष्ठ-माध्यमिक-विद्यालये, बोह-स्थाने स्थापिते आश्रय-शिविरे निरीक्षणं कृतं तत्र च स्थापितेभ्यः प्रभावितेभ्यः परिवारेभ्यः मेलनं कृत्वा तेषां कुशलक्षेमं ज्ञातम्। मुख्यमन्त्रिणा सुखविन्दरसिंहसुक्खू महोदयेन प्रोक्तं यत् येषां २५ परिवाराणां गृहाणि अस्यां आपदि पूर्णतया विनष्टानि संजातानि, तेभ्यः गृह-निर्माणाय ७.५० लक्ष-रूप्यकाणाम् आर्थिक-साहाय्यं प्रदास्यते। एतदतिरिच्य, वस्त्राणां, पात्राणां (बर्तन) अन्येषाम आवश्यकानां गृह-वस्तूनां क्रयणाय एकलक्ष-रूप्यकाणां साहाय्यं अपि प्रदास्यते। तेन कथितं यत् येषां प्रभावितानां परिवाराणां पार्श्वे वासाय भूमिः उपलब्धा नास्ति, तेभ्यः सर्वकारः आवश्यकतानुसारं सर्वकारीयां भूमिम् अपि उपलब्धं कारयिष्यति।
स्मर्तव्यम् अस्ति यत् शाहपुरस्य बोह-घाट्याम् मेघस्फोटनेन घुड़घुं, भङ्गार, सपेड़ा इति ग्रामाणाम् आहत्य २५ परिवाराः अस्याः आपद: पूर्णतया प्रभाविताः अभवन्। सुरक्षां सर्वोच्च-प्राथमिकतां दत्त्वा सपेड़ा-ग्रामस्य १३ गृहाणि ‘सङ्कट-क्षेत्रम्’ (Danger Zone) इति घोषितानि। मुख्यमन्त्रिणा प्रोक्तं यत् येषां परिवाराणां धेनुः महिषी वा आपदि मृता, तेभ्यः ५५ सहस्र-रूप्यकाणि प्रति-पशु तथा च येषां अजा: मृताः, तेभ्यः १५ सहस्र-रूप्यकाणि प्रति-अजा साहाय्य-राशिः दीयते। येषु गृहेषु आप्लवनस्य आपदो वा जलस्य प्रवेशेन हानिः संजाता, तेभ्यः एकलक्ष-रूप्यकाणां साहाय्यं प्रदास्यते। एतेनैव प्रकारेण, क्षतिग्रस्ताभ्यः विपणिभ्यः हान्याः आधारे ५० सहस्रतः एकलक्ष-रूप्यकाणि यावत् साहाय्यं दीयते। तेन कथितं यत् येषां कृषकाणां सस्यानां (फसलों की) हानिः संजाता, तेभ्यः ५ सहस्र-रूप्यकाणि प्रति-कनाल-आधारेण क्षतिपूर्तिः दीयते। येभ्यः परिवारेभ्यः अस्थायी-रूपेण भाटके गृहेषु स्थातव्यं भविष्यति, तेभ्यः ५ सहस्र-रूप्यकाणि प्रतिमासं भाटक-साहाय्यं प्रदास्यते। एतदतिरिच्य, प्रभावितेभ्यः परिवारेभ्यः षण्मासानां धान्यं (राशन) अपि निःशुल्कम् उपलब्धं कारयिष्यते। मुख्यमन्त्रिणा ज्ञापितं यत् प्रभावितेभ्यः परिवारेभ्यः सद्यः साहाय्यं यच्छता २५ परिवारेभ्यः २५-२५ सहस्र-रूप्यकाणि तथा च १६ अन्येभ्यः परिवारेभ्यः १०-१० सहस्र-रूप्यकाणि यावत् मध्यवर्ति-साहाय्य-राशिः प्रसारिता अस्ति। पुनर्वास-कार्येषु अपि प्रशासनं वेगेन संलग्नं वर्तते।
अस्मिन् अवसरे मुख्यमन्त्रिणा रिडकमार-प्राथमिक-स्वास्थ्य-केन्द्रस्य (PHC) सामुदायिक-स्वास्थ्य-केन्द्ररूपेण (CHC) पदोन्नतेः घोषणा अपि कृता। येन क्षेत्रे स्वास्थ्य-सेवानां इतोऽपि सुदृढीकरणं विधातुं शक्ष्यते। अस्मिन् अवसरे शाहपुरस्य विधायकः उप-मुख्य-सचेतकः च केवलसिंहपठानिया, हिमाचलप्रदेश-राज्य-आपदा-प्रबन्धन-प्राधिकरणस्य उपाध्यक्षः दीपकराठौरः, ऊर्ण-सङ्घस्य (Wool Federation) अध्यक्षः मनोजकुमारः, स्थानीय-पञ्चायत-प्रधाना नीलमकुमारी, उपायुक्तः काङ्गड़ा हेमराजबैरवा, आरक्षणाधीक्षकः कुलभूषणवर्मा विविधानां विभागानां च अधिकारिणः उपस्थिताः आसन्।
