अप्रत्याशित- मेघविस्फोट- घटनाः सङ्कुचन्तः हिमनदाः च जलवायुपरिवर्तनस्य सङ्केताः- मुख्यमन्त्री सुक्खु:

अप्रत्याशित- मेघविस्फोट- घटनाः सङ्कुचन्तः हिमनदाः च जलवायुपरिवर्तनस्य सङ्केताः- मुख्यमन्त्री सुक्खु:
हिमसंस्कृतवार्ता:- शिमला। मुख्यमन्त्री सुखविन्दरसिंहसुक्खु: अवदत् यत् जलवायुपरिवर्तनं एका गम्भीरा वैश्विकी समस्यारूपेण उद्भवति। अस्य परिणामस्वरुपं राज्ये अप्रत्याशित- मेघविस्फोटः, आकस्मिक- जलोत्प्लवः, भूस्खलनं, हिमनदानां सङ्कोचः सदृशाः घटनाः सम्मुखीभूताः। सः उक्तवान् यत् एताः घटनाः ‘प्राकृतिकसचेतना’ मत्वा तत्कालं परिष्कारात्मक- पदानि स्थापयितुं आवश्यकता अस्ति। २०२३ तमस्य वर्षस्य आपद: उल्लेखं कुर्वन् सः अवदत् यत् अस्यां प्राकृतिक-आपदि राज्ये २३,०००तः अधिकाणि गृहाणि क्षतिग्रस्तानि अभवन्। मुख्यमन्त्री सुक्खुमहोदयः मङ्गलवासरे ‘साइंटिफिक असेसमेंट ऑफ टैकलिंग नॉन कार्बन- डाईऑक्साइड एमीशनसः पाथवेज फॉर हिमाचलप्रदेश’ शीर्षकयुक्तां प्रतिवेदनम् विमुक्तवान्। अस्मिन् अवसरे सः अवदत् यत् हिमाचलप्रदेशः केवलम् एकः भौगोलिक-भूभागः नास्ति, अपि तु हिमालयस्य आत्मा वर्तते। हिमनदाः, नद्यः, वनानि, पर्वताः च अस्य परिचयाः सन्ति, येषु लक्षशः जनानां जीवनं निर्भरं वर्तते। हिमालयस्य अस्थिरतायाः दुष्परिणामाः न केवलं राज्ये, अपि तु सम्पूर्णे देशे भविष्यन्ति। सः अवदत् यत् राज्यं स्वकीयेभ्यः वैधानिक- अधिकारिभ्यः सङ्घर्षं करोति। यावत् पार्श्ववर्ति- राज्यानि ‘भाखड़ा-ब्यास-प्रबन्धन-बोर्ड’ (BBMB) इत्यस्य अवशिष्ट-धनस्य (Arrears) निस्ताराय दृढं आश्वासनं न यच्छन्ति, तावत् ‘किशाऊ’ तथा ‘रेणुका’ बन्धसदृशाः आगामी-परियोजनाः अग्रे न नेष्यन्ते। अस्मिन् विषये काश्चन सकारात्मक- प्रतिक्रियाः प्राप्ताः सन्ति।
औषधीयपादपानां कृषिसंरक्षणाय द्वौ ‘एमओयू’ इति सञ्जातौ
अस्मिन् अवसरे ‘मैसर्स डाबर इण्डिया लिमिटेड’ तथा ‘मैसर्स करण सिंह वैद्य सोलन’ इत्येताभ्यां सह राज्ये औषधीयपादपानां कृषि- संरक्षण- प्रोत्साहनाय द्वे सहमतिपत्रे हस्ताक्षरिते। प्रथम- सहमत्यानुसारं डाबर इण्डिया प्रतिवर्षं कृषकेभ्यः १२ लक्षं गुणवत्तापूर्ण-पादपान् (दशवर्षेषु १.२० कोटि- पादपान्) प्रदास्यति। निम्न- मध्य- पर्वतीयक्षेत्रेभ्यः आमलकी (आंवला), हरीतिकी (हरड़), विभीतकः (बहेड़ा), काकड़ासिंगी, लोधर च सदृशाः प्रजातयः ऊना, बिलासपुरं, हमीरपुरं, काङ्गड़ा, सिरमौर:, निम्न-शिमलाक्षेत्रेषु च वितरिष्यन्ते।
मध्य-उच्च-पर्वतीय-क्षेत्रेषु वितरणम्
मध्य-उच्च-पर्वतीय-क्षेत्रेभ्यः जटामांसी, कुटकी, सुगन्धबाला, पद्म-काष्ठम्, पुष्करमूलम् च कुल्लू, चम्बा, मण्डी, उपरि-शिमला, किन्नौर जनपदेषु वितरिष्यन्ते। अतीस, विष (वत्सनाभः) सदृशाः अल्पाइन- प्रजातयः किन्नौर- लाहौल- स्पीति- चम्बाक्षेत्राणां कृषकेभ्यः उपलब्धाः भविष्यन्ति। द्वितीयः सहमति: करणसिंहवैद्यसोलनम् इत्यनेन सह पञ्चवर्षाणां कृते सञ्जातः, यस्य अन्तर्गतं सोलनजनपदे हरिद्रा (हल्दी), अश्वगन्धा, शतावरी, तुलसी, चिरायता, हिमालयन जेंटियन इत्यादीनां कृषये ६ मुख्य-प्रजातयः चिताः। अस्मिन् १०८ बीघाभूमौ २२५ महिलाकृषकाः सम्मिलिताः भविष्यन्ति।
हिमाचलम् प्रथमं ‘हरित-ऊर्जा-राज्यं’ निर्मातुं सर्वकारः कटिबद्धः- मुख्यमन्त्री
मुख्यमन्त्री अवदत् यत् वर्तमान-राज्यसर्वकारः हिमाचलप्रदेशं देशस्य प्रथमं ‘हरित-ऊर्जा-राज्यं’ निर्मातुं कटिबद्धः अस्ति। पर्यावरण-संरक्षणाय ‘इलेक्ट्रिक- मोबिलिटी’ प्रोत्साह्यते। अस्मिन् वर्षे अप्रैलमासं यावत् एचआरटीसी विभागस्य समूहे ३०० नूतनानि ‘ई-बस’ यानानि सम्मिलितानि भविष्यन्ति। ३८,००० ई-टैक्सी-यानानां कृते ४० प्रतिशतानुदानम् प्रदीयते।
अस्मिन् अवसरे विधायकः सुरेश कुमारः, हरीश जनारथा, सचिवः (पर्यावरणम्) एस.के. सिङ्गला, डॉ. डर्वुड जैल्के, मार्टिना ओटो, जेरिन ओशो, डी. सी. राणा च उपस्थिताः आसन्।