चम्बा-मण्डलस्य बहुचर्चित-गोवधप्रकरणे चत्वारः अभियुक्ताः निगृहीताः
हिमसंस्कृतवार्ता — चम्बा।
विकासखण्ड-चम्बायाः घघरोता-ग्रामपञ्चायते गोवधप्रकरणे आरक्षिभिः चत्वारः अभियुक्ताः निगृहीताः (बन्दीकृताः)। सदर-आरक्षिकस्थानकस्य थाना प्रभारी-निरीक्षकस्य रमणचौधरि-महोदयस्य नेतृत्वे आरक्षिदलम् उचितपदक्षेपं कृत्वा प्रकरणस्य समाधानप्राप्तौ सफलताम् अलभत। गोवंशस्य अवशेषाणां प्राप्तेः अनन्तरमेव आरक्षिविभागः अभियुक्तानाम् अन्वेषणे संलग्नो जातः आसीत्। अस्मिन् प्रकरणे क्षेत्रे व्याप्तस्य आक्रोशस्य मध्ये आरक्षिणां पदक्षेपः महत्त्वपूर्णः मन्यते। विज्ञाप्यते यत् गोवधघटनायाः अनन्तरम् आरक्षिभिः जलेदा-अरण्यात् उडाण-धारं यावत् व्यापकम् अन्वेषणाभियानं सञ्चालितम् आसीत्।
षट्चत्वारिंशत्सदस्यीयम् (४६) आरक्षिदलं क्षेत्रस्य विविधान् भागान् अन्वेष्णेन सह धारक्षेत्रे स्थितानां पशुकुटीराणां गभीरतया अन्वेषणम् अकरोत्। एतदतिरिच्य आरक्षिविभागेन प्रश्नोत्तराय विंशतिः (२०) जनाः आरक्षिकस्थाने समाहूताः आसन्। एतेषु अष्टतः दशपर्यन्तं जनैः सह पृच्छा कृता। आरक्षिणां सक्रियपदक्षेपानन्तरं प्रकरणस्य अन्वेषणम् अग्रे प्रसृतम्, अधुना च चत्वारः अभियुक्ताः निगृहीताः सन्ति। अपरत्र, चम्बा-मण्डलस्य अतिरिक्तारक्षिपर्यवेक्षकेण (ASP) दिनेशशर्मणा चतुर्णाम् अभियुक्तानां निग्रहणस्य पुष्टिः कृता। तेन विज्ञापितं यत् प्रकरणे नियमानुगुणं विधिककार्यविधि: क्रियमाणा अस्ति। आरक्षिविभागः प्रकरणसम्बद्धानां तथ्यानां प्रमाणानां च आधारेण अग्रे कार्यविधि: विधास्यति।
