असमवार्ताः- ‘शास्त्रमन्थनम्’ इति नाम्नः १०८-व्याख्यानमालायाः षष्ठव्याख्यानम् आभासीयमाध्यमेन अतीव सुष्ठुतया अभवत् वेदान्तदर्शनस्य मोक्षसाधनविषये अतीव महत्वपूर्णविवेचना सञ्जाता।
हिमसंस्कृतवार्ता डॉ.निशिकान्तपाण्डेयः नलबारी (असमराज्यम्), ०२ मे २०२५
कुमारभास्करवर्म-संस्कृतपुरातनाध्ययनविश्वविद्यालयस्य सर्वदर्शनविभागेन सर्वदर्शनमन्थनपरिषदा च आयोजितायाः‘शास्त्रमन्थनम्’ इति नाम्नः १०८-व्याख्यानमालायाः षष्ठव्याख्याने वेदान्तशास्त्रानुसारं मोक्षसाधनानामुपरि अतीव सुन्दरविवेचनम् आभासीयमाध्यमेन सम्पन्नम्। अस्मिन् व्याख्याने भारतराष्ट्रस्य नानास्थानेभ्यः शास्त्रजिज्ञासवः छात्राः, शोधार्थिनः, अध्यापकाश्च अंशग्रहणं कृतवन्तः।अस्मिन् अवसरे मुख्यवक्तृत्वमलंकृतवान् आसीत् डॉ श्रीकरः जी. एन., केन्द्रीयसंस्कृतविश्वविद्यालयस्य अगरतलापरिसरस्य सहायकाचार्यः। सः अद्वैतवेदान्तानुसारं सर्वादौ महावाक्यानां विषये सम्यग् विवेच्य मोक्षसाधनानां विषये स्पष्टीकृतवान् । स्वव्याख्याने सः बोधितवान् यत् श्रवणमनननिधिध्यासनद्वारा एव ब्रह्मसाक्षात्कारं कर्तुं शक्यते। ब्रह्मसाक्षात्कारेण एव परमपुरुषार्थस्य अवाप्तिः भवति। तथा यः साधनचतुष्टयसम्पन्नो भवति सैव वेदान्तशास्त्रस्य अधिकारित्वेन ब्रह्मसाक्षात्कारं प्राप्य मुक्तो भवतीति।कार्यक्रमे अध्यक्षत्वेन आसन् विश्वविद्यालयस्य कुलपतयः आचार्यप्रह्लाद रा. जोशीमहोदयाः। अस्मिन् कार्यक्रमे सर्वदर्शनमन्थनपरिषदः अध्यक्षः श्री पुलक उपाध्यायः, सम्पादिका सुश्री जिमि डेका, प्रचारप्रमुखः श्री हरिप्रसन्न अधिकारी, विभागस्य अतिथ्यध्यापिका सुश्री मयूरी काकती, तथा अतिथ्यध्यापकः श्री लिराज काफ्ले इत्यादयः उपस्थिताः आसन्।मङ्गलाचरणम् विभागस्य छात्रया विदिशा शर्मा इत्यनया सम्पादितम्। कार्यक्रमस्य संचालनं विभागीयच्छात्रया निशितादेव्या कृतम्। धन्यवादज्ञापनं सर्वदर्शन विभागीयच्छात्रया निहाली शर्मा इत्यनया सम्पादितम्, शान्तिमन्त्रपाठश्च सञ्चालिकया एव विधत्तः।एतस्मिन् व्याख्याने डॉ रणजीतकुमारतिवारी (सर्वदर्शनविभागाध्यक्षः), डॉ. चम्पककलिता (मीमांसाविभागाध्यक्षः), श्री विवेकाचार्यः (पुराणइतिहासविभागाध्यक्षः), डॉ. कमललोचनात्रेयः (साहित्यविभागे अध्यापकः), डॉ. लोपामुद्रा गोस्वामी (सर्वदर्शनविभागस्य सहाध्यापिका) च अन्ये च बहवः अध्यापकाः शोधार्थिनः छात्रवर्गश्च आसन्।
सत्रस्य अन्तिमे परमपुरुषार्थावाप्तिसन्दर्भे बहवः जिज्ञासाः छात्रैः प्रकटिताः। मुख्यवक्त्रा तासां जिज्ञासानां सम्यग् अवबोधनं पुरस्सरं अतीव सुष्ठुतया वेदान्ततत्त्वानां दार्शनिकविश्लेषणमपि प्रदत्तम्। सर्वदर्शनमन्थनपरिषद् इत्ययं विद्वत्संघः सर्वदर्शनविभागस्य वर्तमानशोधार्थिनां पूर्वछात्राणां च संयोजनेन संस्थापितः। अस्याः परिषदः लक्ष्यं सर्वशास्त्रेषु यत् परमज्ञानं निहितं वर्तते, येन च मनुष्यजीवनं उन्नतिपूर्वकं भवति, तस्य ज्ञानस्य विषये सर्वान् अवाबोधनम्।एषा ‘शास्त्रमन्थनम् ’ इत्याख्या १०८-व्याख्यानमाला सर्वदर्शनमन्थनपरिषदा प्रारब्धा वर्तते।
