Shimla News : शिमलानगरे २९५ कोटिरूप्यकाणां व्ययेन निर्मिता भविष्यति नवबहारतः आईजीएमसीपर्यन्तं ८९० मीटरदीर्घा कन्दरा
हिमसंस्कृतवार्ता – शिमला।
हिमाचलप्रदेशस्य राजधानी शिमलानगरे सम्मर्दस्य निवारणाय राज्यसर्वकारः जाखुपर्वतस्य अधः नवबहारतः वृत्तीयमार्गे (सर्कुलर-रोड़) इन्दिरागान्धीचिकित्सामहाविद्यालयपर्यन्तं ८९० मीटरदीर्घा द्विपङ्कतिकन्दरा निर्मास्यते। मुख्यमन्त्री सुखविन्दरसिंहसुक्खुः बुधवासरे लोकनिर्माणविभागस्य अधिकारिभिः सह गोष्ठ्या: अध्यक्षतां कुर्वन् एतां सूचनां दत्तवान्। २९५ कोटिरूप्यकाणां व्ययेन कन्दराया: निर्माणं भविष्यति, यस्मात् १०० कोटिरूप्यकाणि पूर्वमेव मुक्तानि सन्ति, अस्य मासस्य अन्ते यावत् निविदाप्रक्रिया आरभ्यते इति मुख्यमन्त्री अवदत्।
शिमलानगरे विविधसमस्यानां समाधानार्थं राज्यसर्वकारः गम्भीरप्रयत्नाः कुर्वन् अस्ति, येन स्थानीयजनाः अपि च अत्र आगच्छन्तः पर्यटकाः उत्तमसुविधाः प्राप्तुं शक्नुवन्ति। वाहनानां सुचारुगत्यर्थं वृत्तमार्गे सर्वाणि विघ्नानि दूरीकर्तुं विभागाय निर्देशं दत्तवान्। अस्य अन्तर्गतं एकसप्ताहस्य अन्तः भू-अधिग्रहण-प्रक्रिया आरभ्यते । वृत्तमार्गस्य विस्तारार्थं १२२ कोटिरूप्यकाणि विनियोजितानि सन्ति। एतदतिरिक्तं ३००० वाहनानां कृते यानस्थगनस्थलस्य (पार्किङ्ग) सुविधा निर्मीयते। मुख्यमंत्रिणा उक्तं यत् राज्यसर्वकारः शिमलानगरे उपरितनतारं दूरीकर्तुं योजनायां कार्यं कुर्वन् अस्ति। विद्युत्केबलानां, प्रकाशतन्तुनां च कृते भूमिगतनलिका: विन्यस्ता भविष्यन्ति। अस्याः परियोजनायाः प्रारम्भिकपदे मॉलरोड्, लोअरबाजार, मिडिल मार्केट् क्षेत्रेषु ध्यानं दत्तम् अस्ति । एतदर्थं २३ कोटिरूप्यकाणां व्ययः भविष्यति।
