National News : लोकसभानिर्वाचनम् – लोकसभा-निर्वाचनस्य सप्तम चरणाय प्रचाराभियानं सजवं विधीयते
लोकसभा-निर्वाचनस्य सप्तम चरणाय प्रचाराभियानं सजवं विधीयते। भाजपादलस्य वरिष्ठो नेता प्रधानमन्त्री च नरेन्द्रमोदी रविवासरे उत्तरप्रदेशस्य मिर्जापुरे एकस्यां जनसभायाम् अवोचत् यत् देशस्य जनैः स्पष्टनीति-कारणेन तृतीयवारं भाजपादलसस्य नेतृत्वे राष्ट्रिय जनतान्त्रिक-संयुतेः प्रशासन-विरचनस्य निर्णयः स्वीकृतः। प्रधानमन्त्रिणा उक्तं यत् इण्डि-संयुतेः विपक्षिणः प्रधानमन्त्रिपदम् उपहासास्पदं विधातुं प्रयतन्ते। अपि च भाजपाध्यक्षः जे.पी नड्डा जहानाबाद-क्षेत्रे जनसभायाम् अवोचत् यत् राष्ट्रिय- जनतान्त्रिक-संयुतिः लोकसभानिर्वाचने प्रबल-बहुमतं प्राप्स्यसि। अपरत्र कांग्रेसनेता राहुलगाँन्धी हिमाचलप्रदेशस्य सिरमौर जनपदे एकां जनसभां समबोधयन् अवोचत् यत् प्रथमोयं अवसरः यदा कांग्रेस- दलं संविधान-रक्षायै निर्वाचने प्रयत्नं विदधाति ।
राजधान्यां नव-देहल्या़ विवेक-विहारे बाल-चिकित्सालये दुरापादितायां अग्नि दुर्घटनायां षड् नवजातशिशवः मृत्युमुपगताः
राजधान्यां नवदेहल्यां विवेक-विहारे एकस्मिन् बाल-चिकित्सालये दुरापादिते अग्निकाण्डे षड्-नवजात शिशवः मृत्युमुपगताः। नैके च व्रणिताः। अस्मिन् अग्निकाण्डे द्वादश शिशवः सुरक्षिताः।
अग्निकाण्डस्य कारणानि अधुना अपि न ज्ञातानि। घटनायाः सूचना गत रात्रौ सार्ध एकादशवादने अग्निशमनविभागेन दूरभाषमाध्यमेन प्राप्ता। राष्ट्रपतिः उपराष्ट्रपतिः प्रधानमन्त्री च घटनामालक्ष्य गभीर-शोकं
प्रकटितवन्तः। अपरत्र गुजरातस्य राजकोटे दुरापादिते अग्निकाण्डे मृतकानां संख्या समेध्य सप्तविंशतिः संजाता। घटनायाः अन्वीक्षणाय विशेष अन्वीक्षणदलं संघटितम्। अस्मिन् विषये सोमवासरे गुजरात-उच्चन्यायालये वादश्रवणं भविष्यति। अत्रान्तरे प्रधानमन्त्री नरेंद्र मोदी अद्य दिल्ली गुजरातयोः
अग्निघटनयोः मृतकानां परिजनेभ्यः साहाय्यम् उदघोषयत्। प्रधानमन्त्रि कार्यालयेन एकस्मिन् सामाजिक-सञ्चार-पटले प्रोदीरितं यत् प्रधानमन्त्रि राष्ट्रिय-सहाय्यकोषात् द्वि-लक्ष रूप्यकाणाम् अनुग्रह
राशिः प्रदास्यते। सममेव व्रणितेभ्यः पञ्चाशत् सहस्र रूप्यकाणि प्रदास्यन्ते।
रेमल चक्रवातस्य प्रभावः रात्रौ बङ्गदेशस्य खेपूपुरायाम् अथ पश्चिम बङ्गालस्य च सागरतटे दृष्टिम् आगच्छत्
पश्चिम बंगाल-प्रशासनेन रेमल चक्रवातं सम्मुखीकर्तुं सर्वविधोपायाः विहिताः सन्ति। रेमल चक्रवातः सम्प्रति प्रबल चक्रवात रूपेण परिवर्तितः। अस्य प्रभावः रविवासरे रात्रौ बङ्गदेशस्य खेपूपुरायाम् अथ पश्चिम बङ्गालस्य च सागरतटे दृष्टिम् आगमिष्यति। अरब-भाषायाः रेमल इति शब्दस्य अर्थः बालुका वर्तते। अयं हि प्रथमः चक्रवातः अस्ति यत् प्रावृट् कालात् पूर्वं बङ्गाल-खात्याम् आगमिष्यति। भारतीय ऋतु विज्ञानविभागेन पश्चिम बङ्गालस्य तटवर्ति-जनपदेषु ओडिशियां उत्तरभागे अद्य श्वः च प्रवल वृष्टेः सम्भावना प्रकटिता अस्ति। सममेव असमे मेघालये च वृष्ट्या सह मणिपुरे नगालंडे अरूणाचल प्रदेशे त्रिपुरायां च प्रबल वृष्टिः अनुमानिता। अत्रान्तरे कोलकाता-विमान-पत्तन प्राधिकरणेन अद्य मध्याह्नात् एकविंशतिः होरावधये कोलकाता-विमान-पत्तने विमान सञ्चालनं स्थगितम्।
प्रशासनेन अन्ताराष्ट्रियं छद्मव्यवहारं निवारयितुं दूरसञ्चार-सेवाप्रदातृभ्यः निर्देशाः प्रदत्ताः
प्रशासनेन दूरभाषमाध्येन अन्ताराष्ट्रियं छद्मव्यवहारं निवारयितुं दूरसञ्चार-सेवाप्रदातृभ्यः निर्देशाः प्रदत्ताः। सञ्चार-मन्त्रालयेन प्रोक्तं यत् छलिनः भारतीयनागरिकान् वञ्चितुम् अन्ताराष्ट्रिय-दूरभाष-सङ्ख्यानां प्रयोगं कुर्वन्ति। अनेन माध्यमेन ते अन्तर्जालीयापराधघटनाः, वित्तीयापराधान् च कुर्वन्ति। एताषां घटनानां निवारणाय दूरसंचार विभागेन दूरभाष उपभोक्तृभ्यः एका प्रणाली विनिर्मितास्ति।दूरभाष उपभोक्तृणां दूरभाषेषु एतादृशं अन्ताराष्ट्रिय-छद्म-दूरसञ्चारं निवारयितुं दूरसञ्चार सेवा-समवायेभ्यः निर्देशाः प्रदत्ताः।
हजयात्रा – भारतीयहजयात्रिणः रविवासरे हज यात्रायै जेद्दाह-विमानपत्तनं प्राप्ताः
भारतीयहजयात्रिणः अद्य हज यात्रायै जेद्दाह-विमानपत्तनं प्राप्ताः। अयं प्रथमः अवसरः यदा इमे हजयात्रिणः बस यानस्य स्थाने रेल यानेन मक्का क्षेत्रं प्रस्थिताः। जद्दाह स्थले भारतस्य महावाणिज्य- दूतावासेन सऊदी अरबस्य सम्बद्ध अधिकारिभिः सह भारतीय हजयात्रिभ्यः अयं सौविध्यं सुलभायितम्। अनुमानम् अस्ति यत् अस्मिन् वर्षे द्वात्रिंशत् सहस्र-भारतीयहजयात्रिणः विशेष सेवायाः करिष्यन्ति।
पायल-कपाडिया कॉस चलचित्र- महोत्सवे ग्रैंड पिक्स इत्याख्यः पुरस्कारः प्राप्त:
चलचित्र निर्देशिका पायल कपाडिया ऐतिह्यं विरच्य प्रथमा भारतीय संवृत्ता यया कॉस चलचित्र- महोत्सवे ग्रैंड पिक्स इत्याख्यः पुरस्कारः विजितः। गुरुवासरे रात्रौ प्रदार्शितेन चलचित्रेण द्वितीये क्रमे अयं पुरस्कारः प्राप्तः। अवधेयं यत् त्रिंशत् वर्षेषु अयं प्रथमः अवसरः यदा कस्यापि भारतीय महिला-चलचित्र- निर्देशिकायाः चलचित्रम् अस्मिन् महोत्सवे प्रदर्शितम्। एतत् चलचित्रं प्रभा नामन्या परिचारिकायाः जीवन-सम्बद्धं वर्तते। अस्मिन् एव चलचित्र महोत्सवे अभिनेत्री अनसूया सेनगुप्ता उत्तम अभिनयाय पुरस्कार-विजेत्री प्रथमा भारतीया संवृत्ता। तया अयं पुरस्कारः द शेमलेस इत्यस्मिन् चलचित्रे अनसर्टेन रिगार्ड श्रेण्यां प्राप्तः।
विश्व पैरा एथलेटिक्स चैंपियनशिप-स्पर्धामालिकायां सिमरन शर्मा स्वर्णपदकं विजितवती
भारतस्य सिमरन शर्मा जापानसिय कोबे नगरे अनुवर्तमानायां विश्व पैरा एथलेटिक्स चैंपियनशिप स्पर्धामालिकायां स्वर्णपदकं विजितवती। सिमरनेन ह्यः महिलानां द्विशत-मीटर-टी 12 इति स्पर्धायां 24.95 पल-समये स्वीय सर्वश्रेष्ठ-प्रदर्शनेन स्वर्ण पदकं विजितम्। भारतेन विश्व पैरा एथलेटिक्स चैंपियनशिप-स्पर्धायां षड् स्वर्ण पदकानि समेत्य सप्तदश-पदकानि विजितानि। अङ्क-तालिकायां भारतं षष्ठे क्रमे विद्यते।
आई पी एल
आई पी एल् क्रिकेट्-स्पर्धा-मालिकायां निर्णायके द्वन्द्वे कोलकाता नाइट्-राइडर्स-दलं सनसाइजर्स हैदराबाद-दलेन सह क्रीडिष्यति। एषा निर्णायक-स्पर्धा चेन्नई-नगरस्थे एम ए चिन्ना-स्वामी क्रीडाङ्गणे भविष्यति। भारतीय समयानुसारेण स्पर्धा सायं सार्ध सप्तवादनात् आरप्स्यते।
