HP Budget Session : अलीखड्ड-पेयजलयोजनायै पूर्वसर्वकारेण प्रदत्तं प्राविधिकम् अनुमोदनम् – संजय अवस्थी
हिमसंस्कृतवार्ता- शिमला।
मुख्यसंसदीयसचिव: (सीपीएस) संजय: अवस्थी मुख्यमन्त्रिणा प्रस्तुतस्य आयव्ययकस्य प्रशंसाम् अकरोत्। अस्मिन् आयव्ययके राज्यस्य ग्राम्य-अर्थव्यवस्थां सुदृढं कर्तुं हिमाचलं स्वावलम्बनं च कर्तुं महत्त्वपूर्णानि पदानि गृहीतानि सन्ति। सः अवदत् यत् राजनैतिकबाध्यतायाः कारणेन विपक्षः अस्य आयव्ययकस्य विरोधं करोति। विवादास्पदाया: अलीखड्ड-पेयजलयोजनायाः विषये सः अवदत् यत् पूर्वसर्वकारस्य कार्यकाले अस्याः पेयजलयोजनायाः तकनीकी अनुमोदनं प्राप्तम्, वर्तमानसर्वकारेण एतत् कार्यम् अग्रे नीतम्। इयं पेयजलयोजना अर्कीक्षेत्रस्य राजस्व-अभिलेखेषु अस्ति।
चिकित्सका: कार्य-स्थगनान्दोलने, रोगिण: विपत्तिग्रस्ता:- डॉ जनकराज:
भाजपाविधायकः जनकराजः हिमाचलस्य स्वास्थ्यसुविधानां दुर्दशां वर्तते इति उक्तवान्। चिकित्सका: कार्य-स्थगनान्दोलनं कृतवन्तः। चिकित्सालयेषु उपकरणानां, औषधानां च अभावः अस्ति। तत्र कर्मचारिणां महत् अभावः अस्ति। आदर्शस्वास्थ्यसंस्थानाम् उद्घाटनस्य घोषणा अपि नगण्या अस्ति। वैद्यानाम् एनपीए-सम्बद्धस्य विषयस्य विषये सर्वकारेण समितिः निर्मिता इति सः अवदत्। येषां कार्यं न कर्त्तव्यं तेषां कृते समितिः निर्मिता भवति।
वित्तीयस्थितौ उन्नयनं कर्तुं दृढ़पदानि ग्रहीतुं आवश्यकता अस्ति- राजेन्द्रराणा
काङ्ग्रेसविधायकः राजेन्द्रराणा उक्तवान् यत् हिमाचलप्रदेशस्य आर्थिकस्थितिं सुदृढां कर्तुं दृढ़पदानि ग्रहीतुम् आवश्यकता वर्तते। राज्ये पर्यटनक्षेत्रे बहु कार्यं कर्त्तव्यम् अस्ति। विधवापुत्राणां शिक्षणव्ययस्य वहनं प्रशंसनीयम्। सः हमीरपुरे १०० कोटिरूप्यकेण कर्करोगनिवारणसंस्थानस्य स्थापनायाः बजटे घोषणाया: स्वागतं कृतवान्।
आयव्ययकम् विवरणानां मायाजाले – त्रिलोक जम्वाल:
भाजपाविधायक: त्रिलोकजमवाल: उक्तवान् यत् राज्यसर्वकारेण प्रतिज्ञा अर्थात् गारण्टीनामधेयेन जनता भ्रामिता अस्ति। राज्ये आपदापीडिताः क्षतिपूर्तिं प्राप्तुं न शक्तवन्तः। या परिस्थिति: प्रचलति तया बिलासपुरस्य सदरसहितं 25 ग्रामपंचायता: जलं न प्राप्स्यन्ति। सः बजटं विवरणानां मायाजालं इति अकथयत्।
आयव्ययके जनाः उपेक्षिताः- बलबीरवर्मा
भाजपाविधायकः बलबीरवर्मा इत्यनेन उक्तं यत् सुक्खुसर्वकारेण स्वस्य द्वयोः आयव्ययकयो: हिमाचलस्य जनानां वञ्चनं कृतम्। सः अवदत् यत् अस्मिन् बजटे किमपि नूतनं नास्ति। राज्यस्य जना: १० गारण्टीनाम्ना सर्वकारेण वञ्चिता:, भाजपा जनान् अस्य विषये अवगतं कारयिष्यति।
प्रतिज्ञाः पूर्णाः क्रियन्ते : मोहनलालब्राक्टा
मुख्यसंसदीयसचिव: (सीपीएस) मोहनलालब्राक्टा अवदत् यत् प्रधानमन्त्री नरेन्द्रमोदी जनेभ्यः १५ लक्षरूप्यकाणि दास्यामि इति प्रतिज्ञां कृतवान्, परन्तु अद्य एतत् प्रतिज्ञा कुत्र अस्ति। विपक्षः महिलाभ्यः १५०० रूप्यकाणां दानस्य विषयं निरन्तरं उत्थापयति। सः अवदत् यत् काङ्ग्रेसपक्षेण कृताः प्रतिज्ञाः चरणबद्धरूपेण पूर्णाः भवन्ति।
आयव्ययकम् रिक्तम् – दीपराज:
भाजपाविधायकः दीपराजः मुख्यमन्त्रिणा प्रस्तुतं बजटं रिक्तम् इति उक्तवान्। अस्मिन् जनसमूहः वञ्चितः अस्ति। सर्वकारेण केन्द्रप्रायोजिताः योजनाः बजटे समाविष्टाः सन्ति। महिलाभ्यः १५००-१५०० रूप्यकाणि दास्यामि इति प्रतिज्ञां कृतवान् आसीत्। एषा घोषणा शून्या सिद्धा भवति। जीविकाया: नाम्ना यूनः वञ्चिताः भवन्ति।
