मुख्यमन्त्रिणा सुक्खू-महोदयेन ‘थीमैटिक-गार्डन’-परियोजनायाः शुभारम्भः कृतः, ४ कोटिरूप्यकाणां राशिः अपि प्रसारिता

मुख्यमन्त्रिणा सुक्खू-महोदयेन ‘थीमैटिक-गार्डन’-परियोजनायाः शुभारम्भः कृतः, ४ कोटिरूप्यकाणां राशिः अपि प्रसारिता
हिमसंस्कृतवार्ता: — काङ्गड़ा ।मुख्यमन्त्रिणा सुखविन्दरसिंहसुक्खू महोदयेन काङ्गड़ामण्डलस्य देहरास्थे ‘दुर्गेश-अरण्य-अंतरराष्ट्रीय-प्राणी-उद्याने’ विकसिष्यमाणायाः महत्त्वाकाङ्क्षिण्याः ‘थीमैटिक-गार्डन’-परियोजनायाः (Thematic Garden Project) शुभारम्भः कृतः। तत्रैव परियोजनायाः कार्यान्वयनाय ‘हिमाचल-प्रदेश-राज्य-जैव-विविधता-बोर्ड’ इत्यस्य माध्यमेन मुख्य-वन्यजीव-संरक्षकाय, हिमाचलप्रदेशाय ४ कोटिरूप्यकाणां (4 Crore) राशिः अपि प्रसारिता। मुख्यमन्त्रिणा प्रतिपादितं यत् इयं परियोजना हिमाचलस्य समृद्ध-जैव-विविधतायाः संरक्षणेन सह पर्यावरण-शिक्षां, वैज्ञानिक-अनुसन्धानं, पारिस्थितिक-पर्यटनम् (‘ईको-टूरिज्म’) च प्रोत्साहयितुं राज्यसर्वकारस्य कटिबद्धतां दर्शयति।
एतत् ‘थीमैटिक-गार्डन’ प्रायः २२,२४७ वर्गमीटर-क्षेत्रे विकसितं करिष्यते आगन्तुक्यश्च प्रदेशस्य विविधानाम् वनस्पतीनां प्राकृतिक-धरोहराणान जीवन्तं समृद्धं च अनुभवं प्रदास्यति। तेन उक्तं यत् अस्याः परियोजनायाः अन्तर्गतं ‘फिकेरियम’ (Ficarium) विकसितं करिष्यते, यस्मिन् ‘फैकस’ (Ficus) इत्यस्य विविधानां प्रजातीनां प्रदर्शनं विधास्यते तासां च पारिस्थितिकीयं संरक्षण-सम्बन्धी च महत्त्वं रेखाङ्कितं करिष्यते। एतदतिरिच्य, ‘आर्बोरेटम’ (Arboretum) मध्ये देशियानां वैदेशिकीनां च प्रजातीनां वृक्षाणां सङ्ग्रहः करिष्यते, यत् पर्यावरण-संरक्षणं, शिक्षां, वैज्ञानिक-अध्ययनं चोत्साहयिष्यति। परियोजनायाः अन्तर्गतं एकः दृष्टि-स्तम्भः (‘वॉच-टावर’) अपि निर्मास्यते, यतः परितः स्थितानाम् प्राकृतिकानां दृश्यानां अवलोकनं विधातुं शक्ष्यते। एतदतिरिच्य, ‘बैंबूसेटम’ (Bambusetum) मध्ये विविधानां वेणु-प्रजातीनां (बांस) प्रदर्शनं कृत्वा तासां पारिस्थितिकीयाम् आर्थिकीयं च उपयोगितां सतत-विकासे च तासां भूमिकां सूचयिष्यते। मुख्यमन्त्रिणा प्रोक्तं यत् राज्यसर्वकारः हिमाचलस्य समृद्ध-जैव-विविधतायाः संरक्षणं कृत्वा प्रदेशे सतत-विकासं प्रोत्साहयति।
तेन कथितं यत् एतत् ‘थीमैटिक-गार्डन’ संरक्षण-जागरूकतायाः, पर्यावरण-संरक्षणस्य, अनुभवात्मक-शिक्षणस्य, वैज्ञानिक-अनुसन्धानस्य च एकं महत्त्वपूर्णं केन्द्रं भूत्वा उद्भविष्यति। साकमेव एतत् प्रकृति-आधारित-पर्यटनस्य वर्धने अपि महतीं भूमिकां निर्वक्ष्यति। तेन उक्तं यत् अस्याः परियोजनायाः छात्रेभ्यः, शोधकर्तृभ्यः, पर्यटकेभ्यः, प्रकृतिप्रेमिभ्यश्च प्रदेशस्य समृद्ध-जैव-विविधतां अवगन्तुम् एकः उत्कृष्टः मञ्चः प्राप्स्यते। मुख्यमन्त्रिणा राज्य-जैव-विविधता-बोर्डस्य वनविभागस्य च अस्याः महत्त्वाकाङ्क्षि-परियोजनायाः परिकल्पनायै सज्जीकरणानां च कृते तेषां प्रयासानां प्रशंसा कृता। तेन विश्वासः प्रकटितः यत् परियोजनायाः पूर्त्यां सत्याम् अत्र आगच्छद्भ्यः पर्यटकेभ्यः यात्रायाः अनुपमः अनुभवः प्राप्स्यति तथा च इयं परियोजना देशे जैव-विविधता-संरक्षणस्य ‘ईको-टूरिज्म’ इत्यस्य च एकम् आदर्शं केन्द्रं भूत्वा उद्भविष्यति। तेन प्रोक्तं यत् अस्याः परियोजनायाः कार्यान्वयनम् मुख्य-वन्यजीव-संरक्षकेन, हिमाचलप्रदेशेन विधास्यते, यदा च ‘हिमाचल-प्रदेश-राज्य-जैव-विविधता-बोर्ड’ तान्त्रिक-मार्गदर्शनं सहयोगं च प्रदास्यति।