हिमाचल-पञ्चायत-निर्वाचनम् त्रिषु चरणेषु भविष्यति मतदानम्, आचारसंहिता प्रवृत्ता

हिमाचल-पञ्चायत-निर्वाचनम् त्रिषु चरणेषु भविष्यति मतदानम्, आचारसंहिता प्रवृत्ता
हिमसंस्कृतवार्ता:- शिमला।
हिमाचलप्रदेशे नगरनिकाय-निर्वाचनात् परं पञ्चायतीराज- संस्थानां निर्वाचनस्य शङ्खनादः जातः। राज्य-निर्वाचन-आयोगेन मङ्गलवासरे निर्वाचन- समयसारिणी प्रसारिता। अनेन सहैव प्रदेशे आचारसंहिता प्रवृत्ता अभवत्। हिमाचले त्रिषु चरणेषु- २६, २८ तथा ३० मई दिनाङ्केषु जिला परिषद, पञ्चायतसमिति-सदस्य, पञ्चायतप्रधान- उपप्रधान- वार्डसदस्यानां च कृते मतदानं भविष्यति। जनपद-निर्वाचन-अधिकारिणः (DC) स्व- स्व- जनपदेषु मतदान-तिथीनां निर्धारणाय अधिकृताः कृताः। प्रदेशस्य ३,७५४ पञ्चायतेषु कुल ५०,७९,०४८ मतदातार: स्व-मताधिकारस्य प्रयोगं करिष्यन्ति। एतेषु २५,६७,७७० पुरुषाः, २५,११,२४९ महिलाः, २९ अन्ये मतदातार: सम्मिलिताः सन्ति। विशेषो विषयः अयं यत् ५२,३४९ युनः प्रथमतया मतदानं करिष्यन्ति।
निर्वाचनप्रक्रियायै सम्पूर्णे प्रदेशे २१,६७८ मतदानकेन्द्राणि स्थापयिष्यन्ते। एतेषु ४५८७ मीटर् उत्तुङ्गतायां स्थितं सर्वोच्चं मतदानकेन्द्रं लाहौल- स्पीति- जनपदस्य कौमिक-विद्यालये भविष्यति, यत् भौगोलिकदृष्ट्या अतीव कठिनक्षेत्रे स्थितम् अस्ति। जनपदपरिषद्, पञ्चायतसमिति, प्रधान- उपप्रधान- पञ्चायतसदस्यानां च कृते पृथक्- पृथक् वर्णयुतानि मतपत्राणि भविष्यन्ति। एतेषां पदानां कृते आहत्य ६० लक्षं मतपत्राणि निर्मितानि। मतपत्राणां वर्णाः भिन्नाः अतः कृताः येन मतदातृषु कोऽपि भ्रमः न भवेत्। अशिक्षिताः जनाः मतपत्रस्य वर्णं दृष्ट्वा मताधिकारं प्रयोक्तुं शक्ष्यन्ति। ८० वर्षतः अधिकाः वृद्धाः मतदानकेन्द्रेषु एव मतदानं करिष्यन्ति।
राज्य- निर्वाचन- आयुक्तः अनिलखाची महोदयः पत्रकारगोष्ठ्यां निर्वाचन-समयसारिणीं घोषयन् अवदत् यत् निर्वाचनकार्यक्रमस्य अधिसूचना २९ अप्रैल दिनाङ्के भविष्यति। नामाङ्कनपत्राणां प्रस्तुतीकरणं ७, ८, ११ मई दिनाङ्केषु च भविष्यति। १२ मई दिनाङ्के नामाङ्कनपत्राणां सूक्ष्म-परीक्षणं भविष्यति। १४-१५ मई पर्यन्तं प्रत्याशिनः स्वनामानि प्रत्याहर्तुं शक्ष्यन्ति, १५ दिनाङ्के एव निर्वाचनचिह्नानां वितरणं भविष्यति। पञ्चायत- प्रधान- उपप्रधान- सदस्यानां च परिणामः मतदानस्य दिने एव सायङ्काले घोषयिष्यते, यदा तु जनपदपरिषद्-पञ्चायतसमित्योः मतगणना ३१ मई दिनाङ्के विकासखण्ड-मुख्यालये भविष्यति। तस्मिन्नेव दिने परिणामाः आगमिष्यन्ति। तेन उक्तं यत् निर्वाचनानि शान्तिपूर्णतया निष्पक्षतया च कारयितुं आयोगेन सर्वेभ्यः जनपदेभ्यः निर्देशाः दत्ताः। संवेदनशील- अतिसंवेदनशील- केन्द्रेषु विशेष- सुरक्षा- प्रबन्धाः भविष्यन्ति।
अपरतः, आचारसंहितायाः प्रवृत्तौ सत्यां नूतनाः नियुक्तयः, विकासकार्याणि, राजनैतिककार्यक्रमाः च न भविष्यन्ति। मन्त्रिणः विधायकाश्च अधुना राजकीय-यन्त्राणां प्रयोगं कर्तुं न शक्ष्यन्ति।