कविकुलगुरु-कालिदास-संस्कृत-विश्वविद्यालयस्य चतुर्दशः दीक्षान्त-समारोहः सम्पन्नः
“कृत्रिम-बुद्धिमत्तायाः युगेऽपि संस्कृतभाषा अतीव प्रासङ्गिकी वर्तते” – प्रो. गणपति-यादवः
हिमसंस्कृतवार्ता: – डॉ रेणुका बोकारे, रामटेकम्
कविकुलगुरु-कालिदास-संस्कृत-विश्वविद्यालयस्य चतुर्दशः (१४) दीक्षान्त-समारोहः बुधवासरे, १८ मार्च २०२६ दिनाङ्के विश्वविद्यालयस्य रामटेक-परिसरे अतीव उत्साहेन सम्पन्नः अभवत्। अस्य भव्य-समारोहस्य अध्यक्षता विश्वविद्यालयस्य माननीय-कुलगुरुः डॉ. अतुल-वैद्य-महोदयः अकरोत्। मुख्य-अतिथि-रूपेण भारतस्य प्रख्यातः अभियान्त्रिक-वैज्ञानिकः, पद्मश्री-अलङ्कृतः प्रो. गणपति-यादव-महोदयः (पूर्वतन्-कुलगुरुः, ICT मुम्बई) उपस्थितः आसीत्।
अस्मिन् मङ्गलायोजने कुलसचिवः डॉ. रोशन-अलोने, परीक्षा-नियन्त्रकः डॉ. केशव-मोहरीरः, विद्वत्-परिषदः सदस्याः सर्वेषां सङ्कायानां अधिष्ठातारः च उपस्थिताः आसन्।
श्रीमती आशा-भालचन्द्र-पाण्डे-महोदयायै मानद-डी.लिट्. उपाधिः
विश्वविद्यालयस्य इतिहासे प्रथमतया एका महिला श्रीमती आशा-भालचन्द्र-पाण्डे महोदया ‘मानद-विद्यावाचस्पति’ (D.Litt.) उपाधिना अलङ्कृता। बहुभाषाविद् कवयित्री इयं मराठी-हिन्दी-संस्कृत-उर्दू-भाषासु २५ पुस्तकानां लेखिका अस्ति। साहित्यक्षेत्रे तस्याः महत्तरं योगदानं संलक्ष्य कुलगुरुणा डॉ. अतुल-वैद्य-महोदयेन इयं उपाधिः प्रदत्ता।
दीक्षान्त-भाषणम् : ज्ञानं विज्ञानं च
मुख्य-अतिथिः प्रो. गणपति-यादवः स्वकीये उद्बोधने ‘शान्ति-पाठेन’ सह छात्रान् मार्गदर्शितवान्। तस्य भाषणस्य मुख्यांशाः:
कृत्रिम-बुद्धिमत्ता (AI) संस्कृतं च । सः अवदत् यत् अद्यतन-सङ्गणकीय-युगे पाणिनेः अष्टाध्यायी नूतन-शोध-सम्भावनाः प्रदाति।
गीतायाः प्रासङ्गिकता: वैश्विक-सङ्घर्षेषु गीता मानसिक-अनुशासनं, नैतिकताम्, अनिश्चित-परिस्थितिषु निर्णय-क्षमतां च ददाति।
चेतना-विज्ञानम्: गीतायां वर्णितः चेतनायाः स्वरूपः अद्य ‘न्यूरो-साइन्स्’ (Neuroscience) इत्यस्य अपि विषयः वर्तते।
सः छात्रान् अवदत् यत् उच्चशिखरं प्राप्य अपि मानवीय-संवेदनाः न विस्मरन्तु, ज्ञानस्य उपयोगं समाज-कल्याणाय कुर्वन्तु।
अध्यक्षीय-भाषणे डॉ. अतुल-वैद्यः अवदत् यत् उपाधि-प्राप्तिः ज्ञानस्य अन्तः नास्ति, अपितु आरम्भः अस्ति। सः विश्वविद्यालयं ‘भारतीय-ज्ञान-परम्परायाः उत्कृष्टता-केन्द्रम्’ रूपेण विकसितुं सङ्कल्पं प्रकटितवान्।
उपाधि-पदक-वितरणस्य विवरणम्
समारोहे कुलगुरुणा आहत्य १४,५६४ छात्रेभ्यः उपाधयः वितरिताः-:
स्नातकोत्तर-उपाधयः-: २,७२२
स्नातक-उपाधयः-: ९,४९३
पदविका-प्रमाणपत्राणि-: १,९८६
मुक्त-शिक्षा-केन्द्रम्-: ३४८
विद्यावारिधिः (Ph.D.): १४ छात्रेभ्यः
पदकानि-: ५४ स्वर्णपदकानि तथा १३ नकद-पुरस्काराः।
दीक्षान्त-समारोहस्य विशिष्टाः उपलब्धयः
सर्वाधिक-पदकानि-: धनश्री सुभाष लोणकर (एम.ए. संस्कृतम्) महोदयायै ११ स्वर्णपदकानि तथा कुलपति-स्वर्णपदकम् अपि प्रदत्तम्।
सर्वोत्तम-अष्टपैलू-विद्यार्थी: अनुज रवी मञ्चावार महोदयाय ‘श्री समर्थ सद्गुरु शङ्कर महाराज रसाळ स्मृति स्वर्णपदकम्’ प्राप्तम्।
सर्वोत्तम-प्रबन्ध-पुरस्काराः उन्मेष-रत्नाकर-बोहटे, भारत-पाण्डुरङ्ग-मिसाळ, सानिका-अवधूत-बाम, अतुल-ठाकरे, देवलपल्ली-अन्वेष च शोध-प्रबन्धाय स्वर्णपदकैः अलङ्कृताः।
अस्य कार्यक्रमस्य सञ्चालनं प्रो. पराग-जोशी-महोदयेन कृतम्। परीक्षा-विभागस्य तकनीकी-दलस्य च सहयोगात् एषः समारोहः यशस्वी जातः।
