गुजरातस्य भावनगर-रेलस्थानकात् साप्ताहिक-रेलयानस्य उद्घाटनमकरोत् रेलमंत्री अश्विनी वैष्णवः

गुजरातस्य भावनगर-रेलस्थानकात् भावनगर-अयोध्या छावनी इत्यस्य साप्ताहिक-रेलयानस्य उद्घाटनमकरोत् रेलमंत्री अश्विनी वैष्णवः
हिमसंस्कृतवार्ता: – रेलमंत्री-अश्विनी-वैष्णवः गुजरातस्य भावनगर-रेलस्थानकात् भावनगर-अयोध्या-छावनी इत्यस्य साप्ताहिक-रेलयानस्य उद्घाटनं विहितवान्। मन्त्री रेवा-पुणे नगरयोः जबलपुर-रायपुर-नगरयोः मध्ये च अन्यद्वयं रेल-यानम् अपि समुद्घाटितवान्। मन्त्री अवोचत् यत् गत एकादश वर्षेषु चतुःत्रिंशत् सहस्त्रकिलोमीटर यावत् नूतना: रेलमार्गाः स्थापिताः, भारतीयरेल-याने अविरतं परिवर्तनं विधीयते। भावनगर-रेलस्थानके जनसमूहं सम्बोधयन्, सः रेलनेटवर्क इत्यस्य विकासाय, आधुनिकीकरणाय, विस्ताराय च, रेलयाने सुरक्षां स्वच्छतां च सुनिश्वेतुं सर्वकारस्य प्रतिबद्धतां पुनः दृढीकृतवान्। मन्त्री प्रत्यपादयत् यत् देशे त्रयोदशशत स्थानकानां पुनर्विकासः विश्वस्य बृहत्तमा स्थानक-पुनर्विकास परियोजना अस्ति । अवसरेऽस्मिन् केन्द्रीयमन्त्री मनसुख माण्डवीया, निमु बेन बम्भानिया च उपस्थितौ आस्ताम्। मध्यप्रदेशस्य मुख्यमन्त्री मोहन यादवः, छत्तीसगढस्य मुख्यमन्त्री विष्णुदेवसाई च कार्यक्रमेऽस्मिन् आभासीयरूपेण भागम् अग्रहीष्टाम्। अस्मिन् अवसरे रेलमन्त्री गुजरातस्य कृतेऽपि घोषणाः अकरोत्। राजकोट, पोरबन्दर, जुनागढ इत्येतेषु मण्डलेषु मूलसौकर्याणां कृते महत्त्वपूर्ण प्रोत्साहनं कृत्वा, पोरबन्दर-राजकोट इत्येतयोः मध्ये नूतना: रेल-सेवाः घोषिताः। एतदतिरिच्य, मन्त्री भावनगर-नौकाश्रये नूतनस्य कंटेनर्-टर्मिनल् इत्यस्य स्थापनायाः घोषणाम् अपि कृतवान्, आगामिषु कालेषु भावनगर-सूरत-नगरयोः मध्ये नूतनं वंदेभारत-रेलयानम् आरभेत इति प्रतिज्ञां कृतवान्।