गल्ल कोई नी सुणदे
गल्ल कोई नी सुणदे मितरो ।
अज्ज कुस जो समझाइये दस्सा ।।
सारे बणेयो टौणे जहल्ले ।
बेहले कैजो रड़ाइये दस्सा ।।
जिस सुणी ने पौण लुटे ।
कैजो सच्च गलाईये दस्सा ।।
चिलगां उड़णा चौही पासें ।
धियाणा कैड्जो भरवाइये दस्सा ।।
खरे नी हुन्दे कूचे पाणे इस ।
मुल्के कैजो जलाइये दस्सा ।।
रोका जीभा चलदिया मितये ।
कैजो लपलपाइये दस्सा ।।
डंगणे पक्का काले खड़पेयां ।
कैजो दुध पियाइये दस्सा ।।
राजगुरु सुखदेव भगत सिंह ।
किंड्यां असां भुलाइये दस्सा ।।
वर्ण संकर जे जम्मे जेहड़े ।
किंड्यां मार मुकाईये दस्सा ।।
बिच दुआलां चिणे थे “शक्ति” ।
लालां कुत्थू लियाईये दस्सा ।।
लेखकः- शक्तिचन्दराणा,पपरोला
रंग बिरगी आई होली कविता संग्रह
