कृषिमन्त्री उक्तवान्- सर्वकारीयशिक्षका: आत्मनि न विश्वसन्ति, अतः एव ते स्वसन्ततिं निजीविद्यालयेषु शिक्षयन्ति
हिमसंस्कृतवार्ता: – काङ्गड़ा।
कृषिपशुपालनमन्त्री चन्द्रकुमारः अवदत् यत् सर्वकारीयविद्यालयेषु सेवारता: अधिकांशः शिक्षकाः स्वसन्ततिं निजीविद्यालयेषु पाठयितुं रोचन्ते यतोहि तेषां स्वविषये विश्वासः नास्ति। असौ ज्वाली, नगरोटा सूरियां कोटला शिक्षाखण्डस्य विद्यालयप्रमुखैः सह ज्वालीक्षेत्रस्य लोकनिर्माणविश्रामगृहे समागमस्य समये एतत् उक्तवान्।
परन्तु तेषां सर्वकारीयशिक्षकाणां प्रशंसा अपि अकरोत् ये स्वसन्ततिं सर्वकारीयविद्यालयेषु पाठयन्ति। अस्मिन् काले चन्द्रकुमारेण उक्तं यत् सर्वकारीयविद्यालयेषु छात्राणां संख्यां वर्धयितुं शिक्षकाः द्वारं द्वारं गत्वा अभियानं चालयन्तु। सः स्पष्टतया अवदत् यत् क्षेत्रे सर्वेषु विद्यालयेषु छात्राणां संख्यायाः न्यूनता चिन्ताजनकः विषयः अस्ति। सम्प्रति शिक्षकाः स्वकार्यं गम्भीरतापूर्वकं न गृह्णन्ति। तेषां वेश: अपि वेशसंहितायाः अनुरूपः नास्ति । विद्यालयेषु सम्यक् वेशसंहिता कार्यान्वितुं विद्यालयप्रमुखस्य दायित्वं भविष्यति।
चन्द्रकुमारः अवदत् यत् ये शिक्षकाः विलम्बं कुर्वन्ति तेषां विषये सूचना उच्चाधिकारिणं प्रेषणीया। सः पुनः एकमासपश्चात् सर्वेषां विद्यालयप्रमुखानाम् समीक्षासभां करिष्यति, कस्मिन् विद्यालये छात्राणां संख्या कियत् वर्धिता इति च पृच्छति।
