संविधानदिवसः- संस्कृतभाषायाम् अनुदितां संविधानप्रतिं विमोचितवती राष्ट्रपतिः द्रौपदीमुर्मुः

संविधानदिवसः- संस्कृतभाषायाम् अनुदितां संविधानप्रतिं विमोचितवती राष्ट्रपतिः द्रौपदीमुर्मुः
हिमसंस्कृतवार्ताः। संविधानदिवसावसरे भारतसर्वकारेण एकवर्षपर्यन्तं प्रचल्यमानस्य समारोहस्य प्रारम्भः कृतः। अयं समारोहः समग्रदेशे आयोज्यते। अवधेयं वर्तते यत् संविधानसभया नवचत्वारिंशदधिक- नवदश- शततमे वर्षे नवम्बरमासस्य षड्विंशे दिनाङ्के संविधानं अङ्गीकृतम् तत्पश्चात् पञ्चाशदधिक- नवदश- शततमे वर्षे जनवरीमासस्य षड्विंशे दिनाङ्के क्रियान्वितं जातम्। अत्रावसरे राष्ट्रपतिः द्रौपदीमुर्मुः संविधान-सदनस्य केन्द्रीयकक्षे आयोजितं एकं भव्यं कार्यक्रम सम्बोधितवती यत् भारतीय-संविधानं एकं जीवितं प्रगतिशीलं च ग्रन्थरत्नं वर्तते। यस्य माध्यमेन भारतदेशेन सामाजिकन्याय- समावेशिविकासयोः लक्ष्याः प्राप्ताः। एतदनन्तरं राष्ट्रपतिः जनैः आग्रहं कृतवती यत्ते सांवैधानिक-आदर्शानाम् अनुपालनं कुर्युः इति। राष्ट्रपतिः अग्रे अवदत् यत् भारतीय संविधानस्य प्रस्तावनायां न्याय स्वतन्त्रता- समानता-बन्धुत्वानाम् आदर्शाः समङ्किताः। स्वकीये सम्बोधने राष्ट्रपतिः पञ्चदश महिला- सदस्यानां योगदानमपि स्मृतवती। एतासां महिलानां संविधानसभायां महत्वपूर्णभूमिकाः आसन्। तदनु उपराष्ट्रपतिः जगदीपधनखडः प्रोक्तवान् यत् अयं संविधानस्य पञ्चसप्ततितमः दिवसः भविष्याय बृहत्तमं सोपानं वर्तते। इयं विश्वस्य बृहत्तमाय गतिशीलाय लोकतन्त्राय महत्वपूर्णा उपलब्धिः विद्यते। अत्रान्तरे लोकसभा अध्यक्षः ओम् बिरलाः निजसम्बोधने अकथयत् यत् भारतीयसंविधानं देशस्य नागरिकाणां वर्षाणां तपसः योगदानस्य प्रतिभायाः शक्तेः च परिणामं विद्यते।
कार्यक्रमस्य वेलायां राष्ट्रपतिः एकस्याः स्मारकमुद्रायाः एकस्याः प्रैष्य-चिटिकायाः च अनावरणं कृतवती। अस्मिन् संविधान दिवसावसरे प्रधानमन्त्री नरेन्द्रमोदी केन्द्रीयमन्त्रिणः विपक्ष दलस्य नेतारः अन्ये च जनाः सम्मिलिताः अभवन्। प्रधानमन्त्री अस्मिन् अवसरे समेभ्यः नागरिकेभ्यः शुभकामनाः प्रदत्तवान्। उक्तवान् च यत् संविधानं राष्ट्रस्य मार्गदर्शकत्वेन अस्ति। तत्रैव नवदिल्ल्यां सर्वोच्चन्यायालये आयोजिते समारोहे भारतस्य मुख्यन्यायाधीशः सञ्जीवखन्नाः समारोहं सम्बोधितवान्। अवधेयं वर्तते यत् संविधानदिवसस्य पञ्चसप्ततितमे वर्ष- अवसरे राष्ट्रपतिः द्रौपदीमुर्मुः संस्कृतभाषायाम् अनुदितां संविधानप्रतिं विमोचितवती।