51st AIOC UDUPI : योगगुरुणा स्वामीरामदेवेन तत्वनगर्य्याम् उडुपी-कृष्णमठे कृतम् ५१ तमस्य अखिलभारतीय- प्राच्यविद्यासम्मेलनस्य उद्घाटनम्
अग्रिमयुग: संस्कृतस्य सनातनस्य च- योगगुरु: स्वामीरामदेव:
हिमसंस्कृतवार्ता: – उडुपी।
अखिलभारतीयप्राच्यविद्यासम्मेलनं पुणेद्वारा भारतीयविद्वत्परिषत् पर्यायश्रीपुत्तिगेमठ: केन्द्रीयसंस्कृतविश्वविद्यालय: नवदेहली इत्येतेषां संयुक्तोपक्रमे तत्त्वनगर्य्याम् उडुपी-कृष्णमठे ५१ तमस्य अखिलभारतीयप्राच्यविद्यासम्मेलनस्य उद्घाटनं योगगुरुणा स्वामीरामदेवेन कृतम्। दिल्लीनगरस्य केन्द्रीयसंस्कृतविश्वविद्यालयस्य कुलपतिः प्रो. श्रीनिवासवरखेडी इत्यनेन ५१तमे अखिलभारतीयप्राच्यविद्यासम्मेलने समागतानां सर्वेषां सत्पुरुषाणाम् आचार्याणां विदुषां शोधपत्रप्रस्तोतॄणां प्रतिनिधीनां च स्वागतम् विहितम्। प्रो. वरखेडी इत्यनेन अपि उक्तं यत् भारतस्य बौद्धिक-ऐतिहासिकस्थले उडुपीनगरे संस्कृतजगतः विविध- आध्यात्मिक- धार्मिकक्षेत्रेभ्यः विद्वांसः, भारतीयसंस्कृतेः, संस्कृतविषयाणां च विविधशाखानां विद्वांसः, तथैव संस्कृतविषयाणां च विभिन्नराज्यानां छात्राः समागता: सन्ति। अतः एतद् गौरवस्य विषय: वर्तते। उद्घाटनसत्रं सम्बोधयता कथितं यत् अग्रिमयुग: संस्कृतस्य सनातनस्य च अस्ति। स: काल: आयाति यदा जना: वदिष्यन्ति यत् संस्कृतेन सर्वं कर्तुं शक्यते। जना: वदन्ति स्म संस्कृतं पठित्वा किं करिष्यति। परञ्च अहं गुरुकुले पठित्वा संस्कृतं पठित्वा योगविद्यया पतञ्जलि- उद्योगेन च बहुकिमपि साधितवान्। अस्मिन् अखिलभारतीये प्राच्यविद्यासम्मेलने संस्कृतविदुषां छात्राणां समागमेन एतत् स्पष्टीभूतं एत् अग्रिमकाल: संस्कृतस्य काल: अस्ति।
पतञ्जलिविश्वविद्यालयस्य हरिद्वारस्य कुलपति: आयुर्वेदाचार्य: आचार्य: बालकृष्ण: अपि स्वीयान् विचारान् प्रकटितवान्, उक्तवान् च यत् अस्माभि: यद् साहित्यं पठ्यते सम्प्रति तस्य परिमार्जनस्य आवश्यकता अस्ति। अस्माकं भारतीये इतिहासे बहुकिमपि दूषितमस्ति यस्य अनुसन्धानम् आवश्यकम् वर्तते। सर्वकारः तु स्वकीयं कार्यं करोति परन्तु पतञ्जलिसंस्थानम् स्वीये स्तरे अपि इतिहासलेखनस्य अनुसन्धानस्य च कार्यं करोति। वैश्विकेतिहासस्य प्रायश: १० सहस्रस्थलानि अस्माभि: अन्वेषितानि। सम्मेलनं सरलस्य सम्भाषणात्मकस्य च संस्कृतस्य प्रवर्तकः शिक्षाविदः, भारतसर्वकारस्य भारतीय- भाषा- परिषदश्च अध्यक्षः पद्मश्री चमुकृष्णशास्त्री महोदय: अपि सम्बोधितवान्। केन्द्रीय- संस्कृत- विश्वविद्यालयस्य प्रकाशनविभागस्य पुस्तक- श्रृंखलानां सम्पादक: एवं संयुक्तनिदेशक: प्रो. सुज्ञान कुमार मोहन्ती एवं प्रो. गणेश टी. पण्डितः (उभौ) ज्ञापितवन्तौ यत् कुलपतिवर्यस्य दूरदर्शी मार्गदर्शनेन सरलमानकसंस्कृतं (SSS) जनानां कृते सुलभं कर्तुं, तस्य अग्रे प्रचारार्थं च तत्सम्बद्धानि बहूनि पुस्तकानि अपि सम्मेलने विमोचितानि। उल्लेखनीयं यत् कुलपतिः प्रो. श्रीनिवासवरखेड़ी इत्यनेन लिखितस्य संस्कृतभाषायां लिखितस्य अतीव महत्त्वपूर्णस्य स्वतन्त्रसमीक्षापुस्तकस्य ‘शास्त्रपद्धतिः’ इत्यस्यापि मुख्यातिथिना विद्वद्भि: गणमान्यजनैः साकं च विमोचनं कृतम्। यस्य हिन्दीभाषायां अनुवादः प्रो अजयकुमारमिश्र: केन्द्रीयसंस्कृतविश्वविद्यालय: अकरोत्। अखिलभारतीये प्राच्यविद्यासम्मेलने अस्मिन् पारम्परिकपरम्पराभि: सर्वेषाम् अभिनन्दनं विहितम्। अष्टौ मठानाम् उडुपिनगर्य्यां मठानाम् पूज्यानां स्वामिनाम् उपस्थितौ सम्मेलनस्य गौरवम् इतोऽपि वर्धितम्। सर्वै: पूज्यपादै: मुख्यातिथिना स्वामीरामदेवेन च संस्कृते एवं सम्बोधनम् कृतम्। सम्मेलने प्राच्यविद्याया: संस्कृतस्य विविधविषयाणां पक्षेषु प्राय: २५ स्थलेषु शोधपत्राणां प्रस्तुतय:, युवकविसङ्गोष्ठी, सांस्कृतिका: कार्यक्रमा:, युवपण्डितपरिषद्, वादकथाविनोद:, भारतीयज्ञानपरम्परा दशा दिशा च इत्यादय: विविधा: कार्यक्रमा: अपि भविष्यन्ति।
सम्मेलने योगगुरु बाबारामदेव द्वारा त्रिदिवसात्मकं योगशिविरम्
ध्यातव्यं वर्तते यत् सम्मेलने अस्मिन् पतञ्जलिविश्वविद्मालयस्य अपि सहयोग: वर्तते। योगगुरु बाबारामदेव: आचार्य: बालकृष्णश्च पूर्वदिने एव विशेषविमानेन उडुपीम् प्राप्तवन्तौ। अखिलभारतीये प्राच्यविद्यासम्मेलने सर्वेभ्य: त्रिदिवसात्मकस्य योगशिविरस्य प्रातःकालीन सत्रस्य आयोजनम् क्रियते।
🙏🙏