मुख्यमन्त्री सुखविन्द्रसिंहसुक्खुः- पर्यावरणसंवेदनशीलक्षेत्रस्य निर्माणविषये सर्वकारः जनै: सह अस्ति
हिमसंस्कृतवार्ता:- कार्यालयीय: प्रतिनिधि:।
मुख्यमन्त्री सुखविन्दरसिंहसुक्खुः शुक्रवासरे काङ्गड़ामण्डलस्य परागपुरस्य नक्कीग्रामे ‘सर्वकार: ग्रामस्य द्वारे’ कार्यक्रमे उक्तवान् यत् पौंगजलबन्धसमीपस्थं क्षेत्रं पर्यावरणसंवेदनशीलक्षेत्रं कर्तुं राज्यसर्वकारः जनै: सह तिष्ठति। सः अवदत् यत् पोङ्गजलबन्धक्षेत्रे पर्यटनक्रियाकलापानाम् प्रचारार्थं प्रयत्नाः क्रियन्ते। आगामिसमये शतकोटिरूप्यकाणां योजनाः आरभ्यन्ते। मुख्यमन्त्री उक्तवान् यत् अद्य प्रत्येकं हिमाचलीयाः एकलक्षरूप्यकाधिकं ऋणं वर्तते। क्षीणतां गच्छन्ती अर्थव्यवस्था पूर्वभाजपासर्वकारात् उत्तराधिकाररूपेण प्राप्ता, यस्य राज्यसर्वकारः पुनः मार्गे आनेतुं बहु प्रयतते। एकस्मिन् वर्षे वयं राज्यस्य अर्थव्यवस्थां २० प्रतिशतं यावत् पुनः मार्गं प्राप्तुं समर्थाः अभवम्। राज्यसर्वकारेण दुग्धस्य क्रयमूल्यं एकवारं ६ रुप्यकाणि वर्धितम् अस्ति, भविष्ये अपि तस्य वृद्धिः भविष्यति। काङ्गड़ामण्डलस्य ढगवारे २५० कोटिरूप्यकाणां दुग्धप्रसंस्करणसंस्थानं स्थाप्यते। एतावता १२०० युवानः ई-टैक्सी-अनुज्ञापत्रार्थम् आवेदनं कृतवन्तः। सुक्खुः उक्तवान् यत् पूर्वभाजपासर्वकारेण शिक्षाक्षेत्रस्य उपेक्षा कृता, यस्य कारणेन शिक्षायाः स्तरः न्यूनः अभवत्। अद्य पञ्चमश्रेण्याः छात्रः द्वितीयवर्गस्य पुस्तकमपि पठितुं न शक्नोति। अत एव शिक्षासुधारार्थं सर्वकारः दृढ़पदानि गृह्णाति। अग्रिमशैक्षणिकसत्रात् सर्वकारीयविद्यालयेषु प्रथमकक्षातः आङ्ग्लमाध्यमेन शिक्षा पाठिता भविष्यति तथा च समूहनिर्माणं कृत्वा संसाधनानाम् उत्तमः उपयोगः भविष्यति। विधवाबालानां शिक्षायाः व्ययः अपि राज्यसर्वकारः वहति, अस्य योजना च बजटे अन्तिमरूपेण निर्धारिता भविष्यति।
