विपक्ष-नेतुः जयराम-ठाकुरस्य गर्जनम् — हिमकेयर-योजनायाः अन्वेषणं कलङ्कयितुं केवलं नाटकम्; २०२७ तमे वर्षे भाजपा-दलस्य भविष्यति सर्वकारः
हिमसंस्कृतवार्ता — मण्डी।
पूर्व-मुख्यमन्त्री तथा च विपक्ष-नेता जयराम-ठाकुरः नाचन-विधानसभा-क्षेत्रे पञ्चायतीराज-संस्थानां नवनिर्वाचित-जनप्रतिनिधीनां सम्मान-समारोहे भागम् अगृह्णात्। सः सर्वान् विजियिनः प्रतिनिधीन अभिनन्द्य पूर्ण-निष्ठया, समर्पणेन, जन-सेवा-भावेन च क्षेत्रस्य विकासाय संलग्नाः भवितुम् आहूतवान्। कार्यक्रमे तस्य आगमने सति स्थानीय-विधायकस्य विनोदकुमारस्य नेतृत्वे तस्य भव्यं स्वागतं विहितम्।
समारोहं सम्बोधयन् जयराम-ठाकुरः सुक्खू-सर्वकारस्य उपरि तीक्ष्णान् प्रहारान् अकरोत्। सः अवदत् यत् पञ्चायतीराज-संस्थाः लोकतन्त्रस्य दृढतमाः शृङ्खलाः सन्ति, किन्तु राज्य-सर्वकारेण पञ्चायत-निर्वाचनं स्थगयितुं सर्वे उपायाः प्रयुक्ताः। तस्य मतेन, सर्वोच्च-न्यायालयस्य हस्तक्षेपात् परमेव निर्वाचनानि सम्पूर्णाानि अभवन्। सः पक्षं कृतवान् यत् निर्वाचने जनतया काङ्ग्रेस-दलाय तीव्रा पराजयः दत्ता।
‘तालाबन्दी’ इति वर्तमान-सर्वकारस्य प्रतिमानम्
जयराम-ठाकुरेण आरोपः आरोपितः यत् मुख्यमन्त्री सुखविन्दरसिंहसुक्खू-महोदयः पञ्चायत-प्रतिनिधीन् प्रधान-पदे द्रष्टुम् एव न ऐच्छत्। सः प्रोक्तवान् यत् राज्ये वर्तमान-सर्वकारस्य प्रतिमानं (Model) केवलं ‘तालाबन्दी’ तथा राजनैतिक-प्रतिशोधस्य भावना एव सञ्जाता। चतुर्वर्षाणां कार्यकालः पूर्णप्रायः वर्तते, किन्तु विकास-दृष्ट्या प्रदेशः अद्यापि तत्रैव तिष्ठति यत्र भाजपा-सर्वकारः इमं त्यक्तवान् आसीत्।
मुख्यमन्त्रिणः अधुनातने देहली-प्रवासे कटाक्षं कुर्वन् विपक्ष-नेता काङ्ग्रेस-दलस्य आभ्यन्तरे गुटबन्दी-भावस्य आरोपं दत्तवान्। सः अवदत् यत् केचन मन्त्रिणः मुख्यमन्त्रिणं पदच्युतं कर्तुं केचन च विधायकाः आत्मानं मन्त्रित्वेन योजयितुं नवदेहलीं गतवन्तः आसन्, किन्तु काङ्ग्रेस-उच्चकनेतृत्वेन राहुल-गान्धी-महोदयेन च तेभ्यः मेलनस्य समयः अपि न प्रदत्तः। सः आरोपम् अकरोत् यत् मुख्यमन्त्री जनसभासु विना सांविधानिक-प्रक्रियां औपचारिक-पत्रं विना च मन्त्रि-पदानां वितरणस्य उद्घोषणं करोति, येन दीर्घ-कालात् प्रतीक्षारताः विधायकाः नैराश्यम् अनुभवन्ति।
२०२७ तमे वर्षे भाजपा-सर्वकार-निर्माणस्य उद्घोषणा
राजनैतिक-तथ्यानाम् उल्लेखं कुर्वन् जयराम-ठाकुरः प्रोक्तवान् यत् मण्डी-मण्डलेन २०१७ तथा २०२२ तमयोः वर्षयोः विधानसभा-निर्वाचनेषु भाजपा-दलाय महत् समर्थनं प्रदत्तम् आसीत्। सः दृढतया अकथयत् यत् २०२७ तमस्य वर्षस्य निर्वाचने मण्डी-मण्डलस्य सर्वेषु दशसु (१०) विधानसभा-आसनेषु भाजपा विजयं प्राप्स्यति। सः अवदत् यत् काङ्गड़ा-मण्डलेऽपि भाजपा-पक्षे अनुकूलं वातावरणं निर्मितं वर्तते, तत्र च दलं न्यूनातिन्यूनं द्वादशसु (१२) आसनेषु जयं प्राप्स्यति।
सः शिमला-हमीरपुर-जिवा-परिषदोः निर्वाचनेषु भाजपा-दलस्य विजयस्य दृष्टान्तं दत्त्वा अवदत् यत् मुख्यमन्त्रिणः गृह-मण्डले संसदीय-क्षेत्रेषु च जनतया काङ्ग्रेस-दलं तिरस्कृतम्। शिमला-मण्डल-परिषदः अध्यक्ष-उपाध्यक्ष-पदयोः उपरि भाजपायाः अधिकारं सः लोकतन्त्रस्य विजयः इति वर्णितवान्।
तेन आरोपः आरोपितः यत् सर्वकारेण सत्ता-बलेन जनप्रतिनिधीनां भर्त्सनस्य भयोत्पादनस्य च प्रयासाः कृताः, किन्तु जनतया प्रतिनिधिभिश्च सुक्खू-सर्वकारस्य विरुद्धं स्पष्टः सन्देशः दत्तः। जयराम-ठाकुरेण एतदपि निवेदितं यत् राजनैतिक-वैमनस्यस्य कारणात् भाजपा-दलस्य त्रयोदशानां (१३) विधायकानां पूर्व-विधायकानां चोपरि मिथ्या-प्राथमिकी (FIR) पञ्जीकृता, अधिकारिणश्च कूट-प्रकरणानां निर्माणाय पीड्यन्ते।
