सीतापुरे संस्कृतप्रतिभान्वेषणप्रतियोगिता सम्पन्ना, छात्रैः प्रदर्शिता स्वप्रतिभा
सीतापुरम्। उत्तरप्रदेशसंस्कृतसंस्थानेन, लखनऊद्वारा आयोजितायाः ‘संस्कृतप्रतिभान्वेषणप्रतियोगिता–२०२६’ अन्तर्गतं सीतापुरजनपदस्तरीय-संस्कृतसामान्यज्ञान-संस्कृतगीतप्रतियोगितयोः आयोजनं ३१ अगस्त २०२६ दिनाङ्के श्यामदासपुरस्थिते आशुतोषबृजमोहनलालस्मारकमहाविद्यालये उत्साहपूर्णवातावरणे सम्पन्नम्। जनपदस्य विभिन्नविद्यालयेभ्यः आगतैः छात्रैः प्रतियोगितायां उत्साहेन सहभागः कृतः।
प्रतियोगितायां छात्रैः संस्कृतभाषायाः प्रति स्वीयां रुचिं, ज्ञानं प्रतिभां च प्रस्तुतम्। संस्कृतसामान्यज्ञानप्रतियोगितायां गौरवमिश्र प्रथमस्थानं, आयुषी सिंह द्वितीयस्थानं तथा अनिकेतपोरवाल तृतीयस्थानं प्राप्तम्। तथैव संस्कृतगीतप्रतियोगितायां प्रतीक्षाराजा प्रथमस्थानं, आरुषीमिश्रा द्वितीयस्थानं तथा विकासकुमारः तृतीयस्थानं प्राप्तवन्तः। विजेतृछात्रैः स्वप्रतिभायाः उत्कृष्टं प्रदर्शनं कृत्वा उपस्थितानां मनांसि आकृष्टानि।
कार्यक्रमे मौलानाआजादस्य संस्कृतशिक्षकः श्रीप्रदीपकुमारः मुख्यातिथिरूपेण उपस्थितः आसीत्। सः छात्रान् सम्बोधयन् संस्कृतप्रतिभान्वेषणस्य महत्त्वं प्रतिपादितवान् तथा संस्कृताध्ययने निरन्तरं प्रवृत्ताः भवितुं छात्रान् प्रेरितवान्।
प्रतियोगितायाः निर्णायकमण्डले फखरुद्दीनअलीअहमदराजकीयस्नातकोत्तरमहाविद्यालयस्य संस्कृतशिक्षिका डॉ. जेबाखान्, हिन्दीशिक्षकः डॉ. सलिलतिवारी, उत्तरप्रदेशसंस्कृतसंस्थाने कार्यरतः श्रीसत्येन्द्रपाठकः तथा सुश्री मन्तशाजहाँ उपस्थिताः आसन्। निर्णायकमण्डलेन छात्राणां प्रस्तुतयः सूक्ष्मतया परीक्ष्य परिणामाः निर्धारिताः।
प्रतियोगितायाः सञ्चालनं जनपदसंयोजिका सुश्री महकगुप्ता अकरोत्। सा प्रतिभागिभ्यः प्रतियोगितायाः नियमाः प्रक्रियां च अवगतवती तथा तान् उत्साहेन सहभागितायै प्रेरितवती। सम्पूर्णे कार्यक्रमे छात्रेषु विशेषः उत्साहः दृष्टः।
कार्यक्रमस्य समापनं संस्थायाः उपप्रबन्धकस्य श्री अञ्जनेय आशीष वाजपेयी इत्यस्य मार्गदर्शनेन सम्पन्नम्। सः छात्राणां प्रयासानां प्रशंसां कृत्वा संस्कृतभाषायाः अध्ययनाय, सम्भाषणाय भारतीयज्ञानपरम्परायाः च परिचयाय निरन्तरं प्रयत्नं कर्तुं प्रेरितवान्।
अवसरेऽस्मिन् उपस्थितैः अतिथिभिः निर्णायकमण्डलेन च विजेतृछात्रेभ्यः हार्दिकशुभकामनाः प्रदत्ताः। संस्कृतप्रतिभान्वेषणप्रतियोगितया छात्राणां प्रतिभायाः प्रदर्शनाय प्रभावी मञ्चः प्राप्तः तथा तेषु संस्कृतभाषायाः प्रति अनुरागः उत्साहश्च वर्धितः।
