नी भुलणा भराड़ीघाट
ब्लॉसपुरा ते शिमले जो जांदेयाँ
औन्दा था बीच रास्ते च भराड़ीघाट
सब औणे जाणे वाल़े खांदे थे खाणा उत्थी
ड्राइवर कने कंडक्टरां रे तां हुंदे थे पूरे ठाठ
कच्ची हुन्दी थी सड़क शिमले री
मुकदे नी थे छोटे कने बड्डे मोड़
धूड़ी कने भरी जांदे थे सारे
पूरे जिसमां रा दुखी जांदा था इक्क इक्क जोड़
पुराणियाँ हुन्दी थी बसां टाटा रियाँ
बड़ी मुश्क़िला ने बदलोंदा था गेर
स्पीड बी हुन्दी थी बड़ी घट
सवारियां चकदेयाँ त्वारदेयां हुई जांदी थी देर
अदरक कने टमाटर मिलदे थे सस्ते
लोग झोल़े.भरी भरी थे लई जांदे
भराड़ीघाटा री बटल़ोहिया री मांह री दाल़
चौल़ राजमाह कने कढ़ी खूब थे खांदे
पहली बार उजड़या भराड़ीघाट तांजे चमाखड़ी पुल
बणया नवां रुकणे कने खाणे रा ठकाणा
छडी दित्या लोकें भराड़ीघाट रुकणा
बसा वाल़ेयां बी करी त्या शुरू चमाखड़िया ई खाणा खाणा
हौल़ेयां हौल़ेयां लोक भूली गए भराड़ीघाट
याद रहया चमाखड़िया रा नाल़ूये रा पाणी
सदा नी रहन्दा कुछ बी उजड़ी जाणा हुण चमाखड़ी भी
फोरलेन तांजे धुंधणा चियें निकल़ी जाणी
फोरलेना पर बणना हुण कोई होर नवां ठकाणा
लोकां औंदेयां जांदेयां उत्थी फेरी खाणा खाणा
आदमी सिर्फ जियूंदैयाँ जो रखदा याद
भराड़ीघाट कने चमाखड़िया रा बी सबीं नांव भूली जाणा
रवींद्र कुमार शर्मा
घुमारवीं
जिला बिलासपुर हि प्र
