अजकला रे छोरुआं रा बखरा ई कम्म
कहरें कम्म करदे नी बाबू बणी घुमदे
दारू जिथी मिली जाओ पेग लाई झुमदे
अया नियाँ रईरा इन्हां च बिल्कुल बी दम्म
अजकला रे छोरुआं रा बखरा ई कम्म
कालेज बी जांदे उथी सिगटां बीड़ियाँ पीन्दे
नशे ते बिना तां एह बिल्कुल बी नी जींदे
चिट्टे रे तां अजकल हुई गरे दीवाने
चिट्टा खाई कने कम्म करदे मनमाने
नशा करी कने टुच्च रहन्दे हर दम
अजकला रे छोरुआं रा बखरा ई कम्म
बापू तिहाडी लाई कने करदा गुजारा
छोरु जेबा हत्थां पाई घुमदा बजारा
गावें गावें गली गली हुन्दे सन्जा कट्ठे
चिट्टा खाई खाई सबी चकितिरे फट्टे
गल्लां इन्हांरी सुणी कन्ने आँखीं हुन्दी नम
अजकला रे छोरुआं रा बखरा ई कम्म
अम्मा बापू री नी चिंता न कोई ख्याल
इन्हां जो तां चाईदा बस नशे रा ई माल
न रई कोई इज़्ज़त न रई कोई लाज
किंयाँ इन्हां ते हुण बचगा समाज
ज़िन्दगी बचाइए किया एई इक्क गम
अजकला रे छोरुआं रा बखरा ई कम्म
छोटे मुंडू कुड़ियाँ बी हुई गए नशे रा शकार
जिथी बी देखो नशे रा बदी गया कारोबार
मावां बुड़ेयाँ री इज़्ज़त करी ती नलाम
नशेड़िये रा बापू गया लोक बोलदे सरेआम
कियाँ हुण बचाइए सामणे बैठिरा जम्म
अजकला रे छोरुआं रा बखरा ई कम्म
रखो सब मिली जुली तिन्हांरा ख्याल
सैजे सप्लाई करदे नशे रा एह माल
पता सबीं जो हुँदा पर दसदा नी कोई
ज़िन्दड़ी बताई देणी पावें रोई रोई
हे भगवान तिन्हां पर सटी दे तू बड्डा जेया बम्म
अजकला रे छोरुआं रा बखरा ई कम्म
— रविन्द्र कुमार शर्मा
घुमारवीं
जिला बिलासपुर (हि० प्र०)
